पोलीस बसले बाजुला, अल्पवयीन मुलगा ठेवला उपमुख्यमंत्र्यांच्या सुरक्षेला; महिलांची करतोय चेकींग
एकनाथ शिंदेंच्या सभेला येणाऱ्या महिलांची मेटल डिटेक्टरमधून तपासणी करताना या अल्पवयीन मुलाचा व्हिडिओ एबीपी माझाच्या कॅमेऱ्याने कैद केला आहे
अकोला : राज्यातील नगरपालिका निवडणुकांच्या (Election) अनुषंगाने स्थानिक स्वराज्य संस्थांच्या निवडणुकांच्या प्रचाराला अंतिम गती प्राप्त झाली आहे. निवडणुकीचा प्रचार अंतिम टप्प्यात असून उपमुख्यमंत्री एकनाथ शिंदे (Eknath Shinde) आज अकोला जिल्ह्यातील हिवरखेड येथे प्रचारसभेसाठी येणार होते. मात्र, या सभेला येणाऱ्या महिलांची तपासणी चक्क पोलिसांनी शिंदे गटाचा कार्यकर्ता असलेल्या एका अल्पवयीन मुलाच्या हाती दिल्याचं पाहायला मिळालं. या मुलाच्या गळ्यात शिवसेनेचा गमछा आमि डोक्यावर शिवसेनेची कॅप दिसून येत आहे. विशेष म्हणजे, शेजारीच चार ते पाच महिला पोलीस (Police) कर्मचारीही बसलेल्या आहेत. त्यामुळे, पोलीस बसले बाजुला आणि अल्पवयीन मुलगा ठेवला उपमुख्यमंत्र्यांच्या सुरक्षेला अशी चर्चा सभास्थळी रंगली आहे.
एकनाथ शिंदेंच्या सभेला येणाऱ्या महिलांची मेटल डिटेक्टरमधून तपासणी करताना या अल्पवयीन मुलाचा व्हिडिओ एबीपी माझाच्या कॅमेऱ्याने कैद केला आहे. खरंतर उपमुख्यमंत्री एकनाथ शिंदे यांना झेड प्लस सुरक्षा व्यवस्था आहे. मात्र, त्यांच्या सभास्थळी सुरक्षेतील ही घोडचूक एखाद्या वेळेस मोठी चूक ठरू शकते. कारण, पोलीस यंत्रणेचा हा मोठा गहाळपणा दिसून येत असून अकोला पोलीस या महिला कर्मचाऱ्यांवर कारवाई करणार का? हा सवाल आता या निमित्ताने निर्माण झाला आहे.
दरम्यान, तेल्हारा तालुक्यातील हिवरखेड येथील शिवसेनेच्या प्रचारार्थ उपमुख्यमंत्री एकनाथ शिंदे यांची जाहीर सभा रद्द करण्यात आल्याची माहिती मिळत आहे. अमरावती येथील बेलोरा विमानतळावरून विमान उडविण्यास वैमानिकांनी नकार दिल्याने एकनाथ शिंदे फोनवरून सभेला संबोधित करण्याची शक्यता आहे. अकोट, तेल्हारा, मुर्तिजापूर आणि हिवरखेड नगरपालिकेच्या उमेदवारांचा एकत्रित प्रचारासाठी हिवरखेडमध्ये शिंदेंची सभा होती. यासभेला एकनाथ शिंदे येणार नसल्याने सभेसाठी आलेल्या लोकांचा हिरमोड झाल्याचं दिसून आलं.
मुख्यमंत्री फडणवीसांचीही झाली सभा
अकोला जिल्ह्यातील पहिल्यांदाच होत असलेल्या हिवरखेड नगरपालिकेच्या निवडणुकीकडे संपूर्ण जिल्ह्याचं लक्ष लागलं आहे. 26 ऑगस्ट 2024 ला हिवरखेड ग्रामपंचायतीचे थेट नगरपालिकेत रूपांतर करण्यात आले. त्यामुळे, नगरपालिकेत पहिले सत्ताधारी होण्यासाठी सर्वच राजकीय पक्षांनी कंबर कसली आहे. सातपुडा पर्वतरांगांच्या पायथ्याशी असलेल्या हिवरखेड गावचं राजकीय वातावरण सध्या चांगलंच तापलं. येथे प्रचारासाठी मुख्यमंत्री देवेंद्र फडणवीस येऊन गेले. तर एकनाथ शिंदेही आपल्या पक्षाच्या प्रचारासाठी हिवरखेड्यात येणार होते. राज्याच्या राजकारणात एकत्र असलेल्या सत्ताधारी आणि विरोधी आघाडीतील सर्वच पक्ष येथे एकमेकांच्या विरोधात उभे ठाकल्याने येथे निवडणुकीत रंगत आहे.
हेही वाचा
तेलंगणाहून निघालेले दाम्पत्य बेपत्ता, विहिरीत आढळी कार; ग्रामस्थांची गर्दी, पोलिस घटनास्थळी
महत्त्वाच्या बातम्या
