परभणीतील महिलांचे फोटो मॉर्फ प्रकरण विधानसभेत; फडणवीसांनी केली पोलीस अधिकाऱ्याच्या निलंबनाची घोषणा

Maharashtra Assembly Winter Session: गृहमंत्री देवेंद्र फडणवीस यांनी संबधित एपीआयचे निलंबन केले असून, पोलीस निरीक्षकाची तत्काळ बदली करण्याची घोषणा केली आहे. 

Devendra Fadnavis

Maharashtra Assembly Winter Session: भाजप आमदार अतुल भातखळकर (Atul Bhatkhalkar) यांनी राष्ट्रवादी काँग्रेसचे ज्येष्ठ नेते आणि माजी मंत्री छगन भुजबळ (Chhagan Bhujbal) यांचा मॉर्फ केलेल्या फोटोचे पडसाद विधानसभेत उमटले असतानाच, परभणीतील महिलांचे फोटो मॉर्फ करत व्हायरल करण्यात आल्याप्रकरणी भाजप आमदार मेघना बोर्डीकरांनी (Meghana Bordikar) हिवाळी अधिवेशनात तारांकित प्रश्न उपस्थित केला.

सोशल माध्यमांमधील महिलांचे फोटो जमा करून त्यांना मॉर्फ करत परदेशी नंबरवरून ते वाईट पद्धतीने शेअर करण्यात आल्याचा धक्कादायक प्रकार परभणी जिल्ह्यात काही दिवसांपूर्वी समोर आला होता. या प्रकरणी जिंतूर पोलीस ठाण्यात अज्ञाताविरोधात गुन्हा देखील दाखल करण्यात आला होता. मात्र गुन्हा दाखल होऊन देखील पोलिसांकडून तपासात उदासीनता पाहायला मिळाल्याने, असे प्रकार सुरूच होते. त्यामुळे भाजप आमदार मेघना बोर्डीकर यांनी हिवाळी अधिवेशनात आज हा मुद्दा मांडत प्रश्न लावून धरला. त्यांच्या प्रश्नाला उत्तर देतांना राज्याचे उपमुख्यमंत्री तथा गृहमंत्री देवेंद्र फडणवीस यांनी संबधित एपीआयचे निलंबन केले असून, पोलीस निरीक्षकाची तत्काळ बदली करण्याची घोषणा केली आहे. 

मॉर्फ केलेले फोटो व्हाट्सअ‍ॅपवर

परभणीच्या जिंतूरमध्ये मागच्या काही दिवसांपासून महिलांचे फोटो सोशल माध्यमांमधून जमा करून त्याला अश्लीलतेची जोड देत ते पुन्हा सोशल माध्यमांमध्ये व्हायरल करण्याचा धक्कादायक प्रकार समोर आला होता. +48 या आंतरराष्ट्रीय कोड नंबरवरून अशा प्रकाराने मॉर्फ केलेले फोटो व्हाट्सअ‍ॅपवर पाठवले जात होते. दरम्यान जिंतूर तहसील कार्यालयातील काही महिला कर्मचाऱ्यांचे फोटो बदनामीच्या हेतूने फोटोमॉर्फ करून समाज माध्यमावर व्हायरल करण्यात येत होते. त्यामुळे महिला कर्मचाऱ्यांचा पतीच्या फिर्यादीवरून गुन्हा दाखल करण्यात आला होता. मात्र या प्रकरणात पोलीस निरीक्षकाने तपास करण्यास उदासीनता दाखवली होती. त्यामुळे असे प्रकार सुरूच होते. अखेर याबाबत आमदार मेघना बोर्डीकर यांनी अधिवेशनात हा मुद्दा उपस्थित केला. 

अन्  अखेर पोलिसात गुन्हा दाखल झाला...

मागील काही दिवसांपूर्वी जिंतुर तहसील कार्यालयातील महिलांचे मार्फ केलेले फोटो व्हायरल केल्याचा धक्कादायक प्रकार उघडकीस आला होता. परंतु त्या महिला कर्मचाऱ्यांनी पोलिसात गुन्हा दाखल करण्याचे धाडस केले नाही. परिणामी गुन्हेगाराचे मनोबल वाढत गेले. त्यामुळे आरोपीने आणखी काही तहसील कार्यालयातील महिलांचे मॉर्फ फोटो शहरातील महिलांच्या मोबाईलवर व्हायरल केले. या घटनेने शहरातील महिलांमध्ये भीतीचे वातावरण निर्माण झाले होते. घटना वाढत असल्याने अखेर पीडीत महिलांच्या पतीच्या तक्रारीवरून आरोपी विरोधात गुन्हा दाखल करण्यात आला होता.

पोलिसांकडून तपासात उदासीनता

गुन्हा दाखल झाला होऊनही पोलीस निरीक्षकाने घटनेची गंभीरपणे दखल घेतली नाही. त्यामुळे आरोपीचे कारनामे काही थांबायला तयार नव्हते. त्यामुळे अखेर आमदार मेघना बोर्डीकरांनी हिवाळी अधिवेशनात तारांकित प्रश्न उपस्थित केला. यावेळी राज्याचे उपमुख्यमंत्री तथा गृहमंत्री देवेंद्र फडणवीस यांनी उत्तर दिले. ज्यात जिंतुर पोलीस ठाण्याचे एपीआय यांचे निलंबन केले असून, पोलीस निरीक्षकांची तडकाफडकी बदली करण्यात आली आहे. तर एकंदरीत घटनेचे गांभीर्य पाहता अधिकाऱ्याचे व कर्मचाऱ्यांचे निलंबन करून काहीही होणार नसून, आरोपीचा तत्काळ छडा लावून गजाआड करावे अशी भावना शहरातील महिलांनी व्यक्त केली आहे.