Nashik Lok Sabha : ' नाशिकच्या जागेसाठी शेवटच्या क्षणापर्यंत लढणार', अजितदादांच्या राष्ट्रवादीचा दावा कायम, महायुतीत तिढा वाढणार?

Nashik Lok Sabha : अजित पवारांच्या राष्ट्रवादीतील नेत्याने आम्ही शेवटच्या क्षणापर्यंत नाशिकच्या जागेसाठी लढू, असे म्हटले. त्यामुळे नाशिकच्या जागेवरून महायुतीत तिढा वाढण्याची शक्यता वर्तवली जात आहे.

Ajit Pawar, Eknath Shinde and Devendra Fadnavis ( Image Source :PTI )

Nashik Lok Sabha Constituency : एकीकडे नाशिक लोकसभा मतदारसंघात महाविकास आघाडीकडून (Mahavikas Aghadi) शिवसेना शिंदे गटाने राजाभाऊ वाजे (Rajabhau Waje) यांना उमेदवारी जाहीर करून तीन आठवड्यांचा कालावधी लोटला आहे. तर दुसरीकडे महायुतीच्या जागावाटपात (Mahayuti Seat Sharing) अजूनही उमेदवार ठरलेला नाही. मंत्री छगन भुजबळांच्या (Chhagan Bhujbal) माघारीनंतर नाशिकची जागा शिवसेना शिंदे गटाला (Shiv Sena Shinde Faction) सुटेल, अशी शक्यता वर्तवली जात होती. मात्र आता अजित पवारांच्या राष्ट्रवादीतील (NCP Ajit Pawar Faction) नेत्याने आम्ही शेवटच्या क्षणापर्यंत नाशिकच्या जागेसाठी लढू, असे म्हटले आहे. त्यामुळे नाशिकच्या जागेवरून महायुतीत तिढा वाढण्याची शक्यता वर्तवली जात आहे.

महायुतीतून शिवसेना शिंदे गटाचे विद्यमान खासदार हेमंत गोडसे (Hemant Godse) हे पुन्हा एकदा उमेदवारीसाठी जोर लावत होते. त्यातच त्यांनी आज मध्यरात्रीच्या सुमारास मुख्यमंत्री एकनाथ शिंदे (Eknath Shinde) यांची भेट घेतली. या भेटीत नाशिकची जागेवर चर्चा करण्यात आली. नाशिकमधून हेमंत गोडसेंनाच उमेदवारी मिळणार, असे जवळपास निश्चित झाल्याचे वृत्त आहे. मात्र अजूनही नाशिकच्या जागेवरून अजित पवारांच्या राष्ट्रवादीने दावा सोडलेला नाही. 

भुजबळांनी माघार घेतली तरी नाशिकवर दावा कायम 

राष्ट्रवादीचे प्रवक्ते आनंद परांजपे (Anand Paranjpe) म्हणाले की, राष्ट्रवादीने नाशिकचा आपला दावा सोडलेला नाही. छगन भुजबळ यांनी माघार घेतली असली तरी आमचा दावा कायम आहे. शिरुरचे उमेदवार शिवाजी आढळराव पाटील हे 25 तारखेला आपला उमेदवारी अर्ज भरतील. यासाठी महायुतीचे प्रमुख नेते उपस्थित राहणार आहेत. त्यानंतर डेक्कनजवळच्या नदी पात्रात मोकळ्या जागेवर सभा देखील होणार आहे.

आम्ही शेवटच्या क्षणापर्यंत नाशिकच्या जागेसाठी लढणार

2009 पासून ते 2014 पर्यंत नाशिकमध्ये घडाळ्याच्या चिन्हावर आमचे उमेदवार निवडून आले आहेत. त्यामुळे नाशिकवर आमचा दावा कायम आहे. साताऱ्याची जागा आम्ही दिलेली आहे. त्यामुळे आम्ही शेवटच्या क्षणापर्यंत नाशिकच्या जागेसाठी लढणार आहेत. इतर लोक जागा मागत असतील, तो त्यांचा अधिकार आहे. मात्र आम्ही दावा सोडलेला नाही, असे त्यांनी म्हटले आहे. आता नाशिकच्या जागेचा तिढा महायुतीत आणखी वाढणार का? हे पाहणे महत्वाचे ठरणार आहे. तसेच नाशिकमधून शिवसेना, राष्ट्रवादी की भाजप नक्की कुठल्या पक्षाच्या उमेदवाराला संधी मिळणार? याकडे आता सर्वांचे लक्ष लागले आहे. 

आणखी वाचा