Nashik Rain : नाशकात 24 तासात 80 मिमी पावसाची नोंद, नांदूरमध्यमेश्वरमधून 36 हजार क्युसेकने विसर्ग, पाच ते सात गावांचा संपर्क तुटला

Nashik Rain Update : शहरासह जिल्ह्यात दोन दिवसांपासून मुसळधार पाऊस सुरू आहे. गेल्या 24 तासात शहरासह इतर भागात 80 मिमी पावसाची नोंद झाली आहे.

Nandurmadhyameshwar Dam

Source : ABP Majha Reporter, Nashik

Nashik Rain Update नाशिक : शहरासह जिल्ह्यात दोन दिवसांपासून मुसळधार पाऊस (Heavy Rain) सुरू आहे. गेल्या 24 तासात शहरासह इतर भागात 80 मिमी पावसाची नोंद झाली आहे. यामुळे जिल्ह्यातील पाच धरणांमधून विसर्ग सुरु करण्यात आला आहे. नांदूरमध्यमेश्वर धरणातून 36 हजार क्युसेकने पाण्याचा विसर्ग सुरु असून पाच ते सात गावांचा संपर्क तुटला आहे. 

दोन दिवसांपासून सुरु असलेल्या संततधार पावसामुळे नाशिकच्या गोदा घाटावर पूरसदृश्य परिस्थिती पाहायला मिळत आहे. रामकुंडावरील (Ramkund) अनेक छोटी-मोठी मंदिरे पाण्याखाली गेल्याचे चित्र आहे. प्रशासनाकडून गोदाकाठ परिसरातील दुकाने हटविण्यास सुरुवात करण्यात आली आहे. प्रशासनाकडून नदीकाठच्या लोकांना सतर्कतेचा इशारा देण्यात आला आहे.  

नांदूरमध्यमेश्वर धरणातून 36 हजार क्युसेकने विसर्ग

नाशिक जिल्ह्यातील दारणा, भावली, कडवा, पालखेड या धरणातून सरासरी 15 हजार क्यूसेक पाण्याचा विसर्ग सुरू आहे. तर, सर्वाधिक पाण्याचा विसर्ग नांदूरमध्यमेश्वर (Nandurmadhyameshwar Dam) धरणातून सुरू आहे. 36 हजार क्युसेक पाण्याचा विसर्ग नांदूरममध्यमेश्वर धरणातून सुरू आहे. त्यामुळे नांदूरसह इतर पाच ते सात गावांचा संपर्क तुटला आहे. नदीकाठच्या गावांना सतर्कतेचा इशारा प्रशासनाकडून देण्यात आला आहे. 

नाशिकला आज ऑरेंज अलर्ट

दोन दिवसांपासून राज्यात मुसळधार पाऊस (Heavy Rain) सुरु आहे. हवामान खात्याने पालघर, पुणे आणि सातारा जिल्ह्यांना रेड अलर्ट जारी केला आहे, तर नाशिक, ठाणे, मुंबई, रायगड, रत्नागिरी आणि सिंधुदुर्ग या जिल्ह्यांना ऑरेंज अलर्ट (Orange Alert) जारी करण्यात आला आहे. 

सुरगाण्यात धुव्वाधार पाऊस

सुरगाणा (Surgana) येथे शनिवारी सकाळपासूनच पावसाने जोर धरला असल्याने नार, पार, मान, तान आणि अंबिका नद्यांना पूर आला आहे. अनेक ठिकाणी सांडवा पूल पाण्याखाली गेले. तर काही ठिकाणी जनावरे वाहून गेल्याच्या घटना घडल्या आहेत. अनेक ठिकाणी वीजपुरवठा खंडित झाला आहे. तर पिंपळसोंड गावाचा तालुक्याशी संपर्क तुटला आहे. 

त्र्यंबकला मुसळधार पाऊस, गंगासागर तलाव भरला

त्र्यंबकेश्वर (Trimbakeshwar) येथे संततधार सुरू असल्याने गंगासागर तलाव भरून ओसंडत आहे. तर परिसरातील नदी-नाले दुथडी भरून वाहत आहेत. येथील अहिल्या, अंबोली, बेझे धरण भरल्याने जादा पाणी गंगापूर धरणाकडे प्रवाहित झाले आहे. त्यामुळे गंगापूर धरणाची पाणीपातळी वाढल्याचे जलसंपदा विभागाकडून सांगण्यात आले.

आणखी वाचा