Nashik MHADA : नाशिक म्हाडासाठी अर्ज करण्यासाठी 20 मार्चपर्यंत मुदतवाढ, 502 घरांसाठी निघणार लॉटरी
Nashik MHADA Lottery : म्हाडा नाशिक मंडळातर्फे 502 सदनिका विक्रीकरिता ऑनलाईन अर्ज सादर करण्यासाठी 20 मार्चपर्यंत मुदतवाढ देण्यात आली आहे. ऑनलाईन, ऑफलाईन अनामत रकमेचा 21 मार्चपर्यंत स्वीकार केला जाणार आहे.
मुंबई : नाशिक गृहनिर्माण व क्षेत्रविकास मंडळातर्फे (म्हाडाचा घटक) नाशिकमधील मखमलाबाद शिवार, सातपूर शिवार, पाथर्डी शिवार, विहितगाव शिवार, हिरावाडी, म्हसरुळ शिवार, तपोवन द्वारका, वडाळा नाशिक शिवार, पिंपळगाव बहुला, नांदुर दसक, देवळाली, मौजे दसक या ठिकाणी विविध गृहनिर्माण प्रकल्पांतर्गत २० टक्के सर्वसमावेशक घटकांतर्गत ५०२ सदनिकांच्या विक्रीकरिता ऑनलाईन अर्ज नोंदणी व अर्ज सादर करण्यासाठी दि. २० मार्च, २०२५ रोजी रात्री ११.५९ वाजेपर्यंत मुदतवाढ देण्यात आली आहे, अशी माहिती नाशिक मंडळाचे मुख्य अधिकारी मुख्य अधिकारी शिवकुमार आवळकंठे यांनी दिली.
नाशिक मंडळाच्या सदनिका विक्री सोडतीत सहभागी होण्यासाठी ऑनलाइन अर्ज नोंदणीला दिनांक ७ फेब्रुवारी, २०२५ रोजी दुपारी २.३० वाजेपासून प्रारंभ झाला. सुधारित वेळापत्रकानुसार अर्जदारांना दिनांक २० मार्च, २०२५ रोजी रात्री ११.५९ वाजेपर्यंत ऑनलाईन अर्ज नोंदणी करता येणार आहे. नोंदणीकृत अर्जदारांना २० मार्च २०२५ रोजी रात्री ११.५९ वाजेपर्यंत अर्जदारांना ऑनलाईन अर्ज सादर करता येणार आहे.
दिनांक २१ मार्च, २०२५ रात्री ११.५९ पर्यंत ऑनलाईन अनामत रकमेची स्वीकृती केली जाणार आहे. दिनांक २१ मार्च, २०२५ रोजी दुपारी ०४.०० वाजेपर्यंत RTGS/NEFT द्वारे अनामत रकमेचा भरणा अर्जदारांना करता येईल. सोडतीसाठी स्वीकृत अर्जांच्या अंतिम यादीची प्रसिद्धी दिनांक ०९ एप्रिल, २०२५ रोजी सायंकाळी ६.०० वाजता म्हाडाच्या https://housing.mhada.gov.in या संकेतस्थळावर केली जाणार आहे. सोडतीचा दिनांक व वेळ नंतर जाहीर केला जाणार असल्याचे आवळकंठे यांनी सांगितले.
मुख्य अधिकारी आवळकंठे म्हणाले की, नाशिक मंडळाची ही सोडत दोन घटकांमध्ये विभागण्यात आली आहे. सोडतीत २० टक्के सर्वसमावेशक गृहनिर्माण योजनेअंतर्गत एकूण ३०० सदनिकांचा समावेश असून ऑनलाइन अर्ज नोंदणी व अर्ज भरणा करण्यासाठी https://housing.mhada.gov.in या संकेतस्थळाला इच्छुक अर्जदारांनी भेट द्यावी.
तसेच २० टक्के सर्वसमावेशक गृहनिर्माण योजनेतील प्रथम येणार्या स प्रथम प्राधान्य योजनेअंतर्गत २०२ सदनिका विक्रीसाठी उपलब्ध आहेत. त्यासाठी https://lottery.mhada.gov.in या संकेतस्थळावर नोंदणी करून अनामत रकमेचा भरणा अर्जदाराने करण्याचे आवाहन मंडळाने करण्यात आले आहे. तसेच सदनिका सोडतीसंदर्भातील माहिती पुस्तिका https://lottery.mhada.gov.in या म्हाडाच्या अधिकृत संकेतस्थळावर इच्छूक अर्जदारांकरिता उपलब्ध करून देण्यात आली आहे. यामध्ये सोडत प्रक्रियेत सहभाग घेण्याबाबतची सविस्तर माहिती, नियमावली, मार्गदर्शक सूचना नमूद करण्यात आली आहे. सर्व इच्छूक अर्जदारांनी सोडतीत सहभाग घेण्याआधी या माहिती पुस्तिकेचे अवलोकन करण्याचे आवाहन मंडळाने केले आहे.
नाशिक मंडळाच्या सोडतीत सहभाग घेऊ इच्छिणाऱ्या अर्जदारांना मुख्य अधिकारी श्री. आवळकंठे यांनी आवाहन केले आहे की, मंडळातर्फे सदनिकांच्या वितरणासाठी कोणालाही प्रतिनिधी, सल्लागार व प्रॉपर्टी एजंट म्हणून नेमलेले नाही. अर्जदाराने कोणत्याही अशा व्यक्तीशी परस्पर व्यवहार करू नये तसे केल्यास नाशिक मंडळ अथवा म्हाडा प्रशासन कोणत्याही व्यवहारास / फसवणूकीस जबाबदार राहणार नाही. तसेच म्हाडाची IHLMS 2.0 ही संगणकीय प्रणाली अत्यंत पारदर्शक, सोपी व सुलभ आहे करिता इच्छुक अर्जदारांनी याच सोडत प्रणालीच्या सहाय्याने सोडत प्रक्रियेमध्ये सहभाग घ्यावा.
महत्त्वाच्या बातम्या
