Nashik Hit & Run : नाशिक हिट अँड रन प्रकरणी मोठी अपडेट, मुख्य संशयित स्वतःच न्यायालयात हजर

Nashik Hit and Run : मद्यसाठा घेवून धावणाऱ्या अज्ञात वाहनाचा पाठलाग करताना राज्य उत्पादन शुल्क विभागाचे सरकारी वाहन उलटल्याचा प्रकार चांदवड-मनमाड रोडवरील हरनुल टोलनाक्याजवळ घडला होता.

Nashik Accident News

Source : Other

नाशिक : मद्यसाठा घेवून धावणाऱ्या अज्ञात वाहनाचा पाठलाग करताना राज्य उत्पादन शुल्क विभागाचे (State Excise Department) सरकारी वाहन उलटल्याचा प्रकार चांदवड-मनमाड रोडवरील हरनुल टोलनाक्याजवळ घडला होता. या अपघातात राज्य उत्पादन शुल्कचा एक कर्मचारी जागीच ठार तर दोघे पोलीस (Police) जखमी झाले होते. पोलिसांकडून अज्ञात वाहनाचा शोध सुरू होता. आता या प्रकरणात मुख्य संशयित व अन्य एकास पोलिसांनी ताब्यात घेतले आहे. 

याबाबत अधिक माहिती अशी की, सिल्व्हासा येथून नवसारी येथे अवैध दारूसाठा वाहतूक करणाऱ्या वाहनाचा राज्य उत्पादन शुल्क विभाग नाशिकच्या पथकाने लासलगाव येथील पोलीस कर्मचाऱ्यांना सोबत घेत चांदवड-मनमाड रोडवर पाठलाग सुरू केला होता. यावेळी हरनूल शिवारात राज्य उत्पादन शुल्क विभागाच्या वाहनाने अवैध दारू वाहतूक करणाऱ्या वाहनाला अडवण्याचा करण्याचा प्रयत्न केला असता वाहनाने धडक दिल्यामुळे राज्य उत्पादन शुल्क विभागाचे वाहन रस्त्याच्या कडेला शेतात उलटले. या अपघातात चालक कैलास कसबे जागीच ठार झाला. तर तीन कर्मचारी जखमी झाले. 

मुख्य संशयित स्वतःहून न्यायालयात हजर

आता या प्रकरणी अपघातातील मुख्य संशयित व अन्य एकास पोलिसांनी ताब्यात घेतले आहे. मुख्य संशयित चांदवड न्यायालयात स्वतःहून हजर झाला. देविदास कांतीलाल पटेल असे संशयिताचे नाव आहे. पोलिसांनी तपासाचा वेग वाढविल्यानंतर संशयित स्वतःहून न्यायालयात हजर झाला. पोलिसांकडून संशयिताची चौकशी सुरू करण्यात आली आहे. 

कठोर कारवाई केली जाणार 

दरम्यान, नाशिकमध्ये घडलेल्या हिट अँड रन (Nashik Hit And Run) प्रकरणाची राज्य उत्पादन शुल्क विभागाचे मंत्री शंभूराज देसाई (Shambhuraj Desai) यांनी दखल घेतली होती. शंभूराज देसाई यांनी म्हटले होते की, राज्य उत्पादन शुल्कच्या नाशिक विभागाच्या दोन टीमला विदेशी बनावटीची दारू एका वाहनात असल्याचा माहिती मिळाली. त्यानंतर ते या वाहनाचा पाठलाग करताना टीमवर हल्ला करण्यात आला होता. यामध्ये एक कर्मचारी मृत्युमुखी पडला तर दोन कर्मचारी जखमी झाले आहेत. आम्ही संबंधित मृत्युमुखी पडलेल्या कुटुंबाला विभागाकडून मदत देऊ. पण आमची जी मोहीम सुरू आहे ती अशीच सुरु राहील. कर्तव्य बजावत असताना कर्मचार्‍याचा जीव घेणं योग्य नाही. यावर कठोर कारवाई केली जाणार आहे. ती गाडी अजूनही मिळाली नाही, पोलीस गाडीचा शोध सुरू आहेत, असे त्यांनी म्हटले आहे.