नाशिकमध्ये महिनाभरात सात हजार टवाळखोरांवर कारवाईचा बडगा, दोन कोटींचा अवैध मद्यसाठा जप्त
Nashik Crime : शहर व ग्रामीण पोलिसांनी महिनाभरात तब्बल २ कोटी २७ लाख ४४ हजार ६७५ रुपयांचा अवैध मद्यसाठा व गुटखा साठा जप्त केला आहे. तसेच ७ हजार ४६३ टवाळखोर व गुन्हेगारांवर कारवाई केली.
Nashik Crime News : लोकसभा निवडणूकीच्या पार्श्वभूमीवर (Lok Sabha Election 2024) आदर्श आचारसंहिता लागू झाल्यापासून शहर व ग्रामीण पोलिसांनी (Nashik Police) महिनाभरात तब्बल दोन कोटी 27 लाख 44 हजार 675 रुपयांचा अवैध मद्यसाठा (Illegal liquor) व गुटखा साठा जप्त (Seized) केला आहे. तसेच ७ हजार ४६३ टवाळखोर व गुन्हेगारांवर प्रतिबंधात्मक कारवाई केली.
लोकसभा निवडणूकीचा बिगुल वाजताच देशभरात आचारसंहिता (Code of Conduct) लागू झाली. आचारसंहिता काळात कायदा व सुव्यवस्था अबाधित ठेवण्यासाठी शहर व ग्रामीण पोलिसांनी बंदोबस्ताचे चोख नियोजन केले. शहरात पोलीस आयुक्त संदीप कर्णिक (Sandeep Karnik) व ग्रामीणमध्ये पोलीस अधीक्षक विक्रम देशमाने (Vikarm Deshmane) यांच्या मार्गदर्शनाखाली बंदोबस्ताचे नियोजन करून गुन्हेगारांवर प्रतिबंधात्मक कारवाई करणे, अवैध मद्यवाहतूक, गुटखा वाहतूक रोखणे, अंमली पदार्थ विक्री रोखण्यावर भर देण्यात आला.
शहर पोलिसांची कामगिरी
शहर पोलिसांनी आचारसंहिता लागू झाल्यापासून गुटख्याची वाहतूक केल्याप्रकरणी 9 गुन्हे दाखल करीत 34 लाख 36 हजार 573 रुपयांचा गुटखा साठा जप्त केला. तसेच 14 कट्टे, 22 काडतुसे, 71 धारदार शस्त्रे जप्त केली आहेत. तसेच 7 लाख 50 हजार 155 रुपयांची 1 हजार 533 लिटर देशी-विदेशी मद्यसाठा जप्त करण्यात आला आहे. एमडी प्रकरणी तीन व गांजा प्रकरणी तीन गुन्हे दाखल केले. तसेच 3 हजार 832 टवाळखोर व गुन्हेगारांवर फौजदारी प्रक्रिया संहिता अंतर्गत व शस्त्रबंदी कायद्यानुसार कारवाई करण्यात आली आहे.
ग्रामीण पोलिसांची कामगिरी
ग्रामीण पोलिसांनी अवैध मद्य विक्री व वाहतूक प्रकरणी 1 हजार 319 गुन्हे दाखल करुन 1 कोटी 29 लाख 12 हजार 907 रुपयांचा मद्यसाठा जप्त केला आहे. त्याप्रकरणी 1 हजार 233 संशयितांविरोधात गुन्हे दाखल आहेत. तसेच अवैध गुटखा प्रकरणी 97 जणांविरोधात 80 गुन्हे दाखल करून 56 लाख 45 हजार 40 रुपयांचा गुटखा साठा जप्त केला आहे. तर 3 हजार 631 टवाळखोर, गुन्हेगारांवर फौजदारी प्रक्रिया संहिता अंतर्गत व शस्त्रबंदी कायद्यानुसार कारवाई केली आहे.
100 गुन्हेगारांवर तडीपारीची कारवाई
सराईत गुन्हेगारांवर वचक ठेवण्यासाठी शहर व ग्रामीण पोलिसांनी तडीपारी, मोक्का, स्थानबद्ध अशा कारवाई केल्या आहेत. त्यानुसार शहर पोलिसांनी 2 व ग्रामीण पोलिसांनी एका टोळीवर मोक्का कारवाई केली आहे. तर एमपीडीए कायद्यानुसार 10 गुन्हेगारांवर स्थानबद्धतेची कारवाई करण्यात आली आहे. तर सुमारे 100 गुन्हेगारांना जिल्ह्यातून तडीपार करण्यात आले आहे.
आणखी वाचा
महत्त्वाच्या बातम्या
ट्रेंडिंग न्यूज
