Nashik Accident News: अमेरिकेहून नाशिकला आला, मित्रांसोबत फिरायला गेला अन् काळाने गाठले, 24 वर्षीय शंतनूचा दुर्दैवी अंत

Nashik Accident News: नाशिक-गिरणारे रस्त्यावरील 'गंमतजमंत' हॉटेलजवळील पुलावर झालेल्या भीषण अपघातात 24 वर्षीय तरुणाचा मृत्यू झालाय.

Nashik Accident News

Source : ABP Majha

Nashik Accident News: शिक्षणासाठी अमेरिकेला गेलेला तरुण दोन वर्षांनंतर मायदेशी परतला, घरात आनंदाचे वातावरण होते. मात्र, काळाने नियतीचा असा खेळ मांडला की, घरी परतल्याच्या अवघ्या 48 तासांतच या उच्चशिक्षित तरुणाचा भीषण कार अपघातात दुर्दैवी मृत्यू झाला. नाशिक-गिरणारे रस्त्यावरील 'गंमतजमंत' हॉटेलजवळील पुलावर हा अपघात घडला. शंतनू जयंत बुऱ्हाडे (24, रा. दीपज्योती, धनराजनगर, जेलरोड) असे मृताचे नाव आहे. या अपघातात शंतनूचे दोन मित्रही गंभीर जखमी झाले असून, त्यांची प्रकृती चिंताजनक आहे.

Nashik Accident News: नेमकी घटना काय?

शंतनू उच्चशिक्षणासाठी अमेरिकेत वास्तव्यास होता. दोन दिवसांपूर्वीच तो नाशिकमध्ये आपल्या घरी परतला होता. शनिवारी (दि. 4) दुपारी 4 वाजेच्या सुमारास तो आपल्या दोन मित्रांसह कारने (MH 46 Z 0067) गंगापूर बॅकवॉटर आणि धरण परिसर फिरण्यासाठी गेला होता. निसर्गाचा आनंद घेऊन रात्री साडेआठच्या सुमारास गिरणारेकडून नाशिककडे परतत असताना, गोदावरी नदीच्या पुलाजवळ असलेल्या 'गंमतजमंत' हॉटेललगत शंतनूचे कारवरील नियंत्रण सुटले.

Nashik Accident News: कारचा चक्काचूर, झाडावर जाऊन आदळली

कारचा वेग जास्त असल्याने ती रस्त्यावर अनेकदा उलटली आणि शेवटी कडेला असलेल्या एका झाडावर जाऊन जोरात आदळली. हा अपघात इतका भीषण होता की कारचा अक्षरशः चक्काचूर झाला. यामध्ये शंतनूच्या डोक्याला गंभीर दुखापत झाल्याने मोठ्या प्रमाणावर रक्तस्त्राव झाला आणि जागीच त्याचा मृत्यू झाला. जखमी मित्रांना स्थानिक नागरिकांनी आणि पोलिसांनी तातडीने रुग्णालयात दाखल केले असून, त्यांच्यावर उपचार सुरू आहेत.

Nashik Accident News: एकुलता एक मुलगा गेल्याने कुटुंबावर कोसळले आभाळ

शंतनूचे वडील इंडिया सिक्युरिटी प्रेसमध्ये (ISP) कार्यरत आहेत. शंतनू हा कुटुंबातील एकुलता एक मुलगा होता. अमेरिकेतील शिक्षण पूर्ण करून मुलगा मोठा होऊन घरी परतल्याचा आनंद कुटुंबात होता, मात्र अवघ्या काही तासांतच काळाने झडप घातल्याने बुऱ्हाडे कुटुंबावर दुःखाचा डोंगर कोसळला आहे. या घटनेमुळे जेलरोड परिसरात हळहळ व्यक्त केली जात आहे.

Nashik Accident News: नवा 'ब्लॅकस्पॉट' ठरतोय 'गंमतजमंत'चा पूल?

ज्या पुलाजवळ हा अपघात झाला, तिथे गेल्या काही दिवसांत वारंवार भीषण अपघात होत आहेत. वळण आणि अरुंद रस्ता यामुळे हा परिसर आता नवा 'ब्लॅकस्पॉट' म्हणून समोर येत आहे. प्रशासनाने येथे तातडीने उपाययोजना कराव्यात, अशी मागणी स्थानिक नागरिकांकडून केली जात आहे. याप्रकरणी नाशिक तालुका पोलीस अधिक तपास करत आहेत.

आणखी वाचा