Nashik News : नाशिकमध्ये हजार एकर जागेवर इलेक्ट्रॉनिक क्लस्टर, उद्योगमंत्री उदय सामंत यांची घोषणा
Nashik News : नाशिकच्या औद्योगिक क्षेत्रासाठी (Nashik) आनंदाची बातमी असून लवकरच इलेक्ट्रॉनिक क्लस्टर (Electronic Cluster) उभारले जाणार आहे.
Nashik News : नाशिकच्या औद्योगिक क्षेत्रासाठी (Nashik Industrial Area) एक आनंदाची बातमी असून नाशिकमध्ये लवकरच इलेक्ट्रॉनिक क्लस्टर (Electronic Cluster) उभारले जाणार आहे. त्याबाबतची घोषणा उद्योगमंत्री उदय सामंत (Uday Samant) यांनी नाशिकमध्ये केली आहे. 'निमा पॉवर 2023' या औद्योगिक प्रदर्शनाचे उद्घाटन उद्योगमंत्री उदय सामंत आणि पालकमंत्री दादा भुसे यांच्या हस्ते करण्यात आले. या कार्यक्रमात नाशिकच्या उद्योजकांची क्लस्टरची अनेक वर्षांची मागणी सामंत यांनी पूर्ण केली.
सातपूर (Satpur) येथील मैदानात आयोजित निमा पॉवर 2023 प्रदर्शनाच्या उद्घाटन प्रसंगी ते बोलत होते. उद्योगमंत्री उदय सामंत यावेळी म्हणाले, इलेक्ट्रॉनिक क्लस्टर मंजुरीसोबतच दिंडोरी (Dindori), घोटी याठिकाणी सुद्धा एमआयडीसीचे विस्तारीकरणासाठी विशेष प्रयत्न करण्यात येणार आहेत. यासाठी स्थानिक उद्योजकांचा सहभाग खूप महत्वाचा असून इलेक्ट्रॉनिक क्लस्टरमुळे जिल्ह्यात रोजगार निर्मितीला मोठी चालना मिळणार आहे. मुख्यमंत्री उद्योग रोजगार निर्मिती योजनेतून मागील सहा महिन्यात 12 हजार 360 उद्योजक तयार झाले असून या वर्षभरात 25 हजार उद्योजक निर्मितीचे उद्दिष्ट आहे. इलेक्ट्रॉनिक क्लस्टर निर्मितीमुळे बाहेरील उद्योगही निश्चित नाशिकमध्ये येतील यात शंका नाही, असा विश्वास उद्योगमंत्री उदय सामंत यांनी यावेळी व्यक्त केला.
केंद्र आणि राज्य शासनाच्या संयुक्त योजनेतून क्लस्टर केले जाण्याची शक्यता असून एक हजार एकर जागा त्यासाठी संपादित केली जाणार आहे. क्लस्टरमध्ये दोन मदर इंडस्ट्री, काही फॉरेन डायरेक्ट इन्व्हेस्टमेंट पण येऊन एकूण दोन ते तीन हजार उद्योजकांना याचा फायदा होणार आहे. या माध्यमातून मोठा रोजगारही उपलब्धही होणार आहे. औद्योगिक विकासासोबतच नाशिकला इलेक्ट्रॉनिक क्लस्टर येत्या काळात साकार होणार आहे. त्याअनुषंगाने पालकमंत्री दादाजी भुसे यांनी उद्योजकांसोबत बैठक घेऊन इलेक्ट्रॉनिक क्लस्टरसाठी जागा निश्चित करावी, असे प्रतिपादन उद्योगमंत्री उदय सामंत यांनी केले आहे.
उद्योगांसाठी नाशिक शिवाय पर्याय नाही....
मंत्री उदय सामंत पुढे म्हणाले, नाशिकसाठी अनेक सकारात्मक निर्णय शासनस्तरावर घेण्यात येत आहेत. निमाच्या आयोजित चार दिवसीय प्रदर्शनाला देशाबाहेरील कंपन्यांचे प्रतिनिधी भेट देणार आहेत. त्यामुळे जिल्ह्यासह राज्यातील उद्योजकतेचा विकास होण्यास मदत होणार आहे. शहरात येणाऱ्या उद्योगामुळे विकासासोबतच पर्यावरणाची हानी होणार नाही, याची दक्षता उद्योजकांनी घेतली पाहिजे. एमआयडीसी परिसरातील ग्रामस्थ आणि नागरिकांचे प्रश्न विश्वासात घेऊन जनजागृतीद्वारे सोडवण्यात निमाच्या पदाधिकाऱ्यांनी अग्रेसर राहावे. तसेच माथाडी कामगारांवर अन्याय होणार नाही, याची खबरदारी देखील उद्योजकांनी घेतली पाहिजे. मुंबई, पुणे, छत्रपती संभाजीनगर यानंतर औद्योगिक विकास करायचा असेल तर आता नाशिकशिवाय पर्याय नाही, असेही उद्योगमंत्री उदय सामंत यांनी यावेळी सांगितले.
रोजगार निर्मितीसाठी संधी उपलब्ध
पालकमंत्री दादा भुसे मनोगत व्यक्त करताना म्हणाले, "निमा पॉवर 2023 या चार दिवसीय प्रदर्शनात उभारलेल्या विविध स्टॉल्सच्या माध्यमातून इलेक्ट्रिकल आणि इलेक्ट्रॉनिक क्षेत्रातील उद्योजकांना मार्गदर्शन व ज्ञान मिळणार आहे. निमा संस्था ही गेल्या 53 वर्षापासून रोजगार निर्मिती, उद्योजक तयार करण्याचे काम अविरत करत असल्याचे ते म्हणाले. प्रदर्शनाच्या माध्यमातून नाशिकचे नाव आंतरराष्ट्रीय पातळीवर अधोरेखित होणार आहे. नाशिकच्या विकासात महिंद्रा ॲन्ड महिंद्रा समूहाचा मोठा वाटा आहे. दिंडोरी, सिन्नर परिसरात उद्योगांसाठी जागा उपलब्ध झाल्यास निश्चितच मोठ्या प्रमाणावर रोजगार निर्मितीसाठी संधी उपलब्ध होणार आहे. नाशिकच्या विकासात एक मानबिंदू म्हणून आरोग्य विद्यापीठाच्या अंतर्गत साधारणत: 400 खाटांचे रुग्णालय व 100 विद्यार्थी क्षमतेचे वैद्यकीय महाविद्यालयाचे भूमिपूजन लवकरच होणार आहे.
महत्त्वाच्या बातम्या
