50 वर्ष सिनेसृष्टीची सेवा करणाऱ्या 92 वर्षीय सुलोचनाजींना दादासाहेब फाळके पुरस्कार का नाही? : उज्ज्वल ठेंगडी

50 वर्ष चित्रपट सृष्टीची सेवा करणाऱ्या 92 वर्षांच्या सुलोचना लाटकर यांना अद्यापही दादासाहेब फाळके पुरस्कार दिलेला नाही. यावरुन दिग्दर्शक आणि लेखक उज्ज्वल ठेंगडी यांनी सरकारसह चित्रपटसृष्टीतील दिग्गजांना उद्विग्न सवाल विचारला आहे. दादासाहेब फाळके पुरस्कार देण्यासाठी एखाद्याची श्वास थांबण्याची वाट पाहत आहत का? असा प्रश्न त्यांनी विचारला.

नागपूर : दादासाहेब फाळके पुरस्कार देण्यासाठी एखाद्याची श्वास थांबण्याची वाट पाहत आहेत का असा उद्विग्न सवाल दिग्दर्शक आणि लेखक उज्ज्वल ठेंगडी यांनी उपस्थित केला आहे. शेकडो चित्रपटात उत्कृष्ट अभिनय करणाऱ्या, 50 वर्ष चित्रपट सृष्टीची सेवा करणाऱ्या 92 वर्षांच्या सुलोचना लाटकर यांना आजवर दादासाहेब फाळके पुरस्कार का दिला नाही असा प्रश्न सरकारसह चित्रपट सृष्टीतील दिग्गजांना विचारत उज्ज्वल ठेंगडी यांनी पंतप्रधान नरेंद्र मोदी यांनी महाराष्ट्राच्या या मागणीकडे लक्ष घालावे अशी मागणी केली आहे.

मूळात 92 व्या वर्षी एखाद्याला दादासाहेब फाळके पुरस्कार देणे गुन्हा आहे. सुलोचनाताई मराठी आणि हिंदी चित्रपटसृष्टीत प्रत्येकाला वंदनीय आहेत. मात्र आजवर त्यांच्या योगदानाची दखल का घेतली गेली नाही? दोन वर्षांपूर्वी सुलोचनाजी 90 वर्षांच्या झाल्या असताना सचिन तेंडुलकर, लता दीदी, आशुतोष गोवारीकर आणि खुद्द पंतप्रधान मोदी यांनी त्यांचे अभिनंदन केले होते. तेव्हा वाटले होते की सरकार सुलोचनाजींच्या अभिनय क्षेत्रातल्या कार्याची दखल घेत आहे. मात्र, नंतर काय झाले हे कोणालाच माहित नाही. खंत वाटते की महाराष्ट्रातील कलावंतांकडे मोठा पुरस्कार देताना दुर्लक्ष केलं जाते.

दादासाहेब फाळके कुठचे आहेत? बॉलिवूड कुठे आहे? मग महाराष्ट्रातील कलावंतांकडे दुर्लक्ष का होते असा सवाल उज्ज्वल ठेंगडी यांनी उपस्थित केला आहे. जे स्थान लतादीदींचं आहे तेच स्थान चित्रपटसृष्टीतील प्रत्येकाच्या मनात सुलोचनाजी यांच्याबद्दलही आहे. महाराष्ट्राच्या या माऊलीचा गौरव करा अशी मागणी त्यांनी पंतप्रधान नरेंद्र मोदी आणि माहिती आणि प्रसारण मंत्री प्रकाश जावडेकर यांच्याकडे केली आहे. आज जरी मी एकटा ही मागणी करत असलो तरी उद्या माझ्या मागे लाखो कलावंतांची आवाज असेल. त्यामुळे अमिताभ बच्चन, लता मंगेशकर, आशुतोष गोवारीकर, सचिन तेंडुलकर यां सर्वानी पंतप्रधानकडे ही मागणी उचलून धरली पाहिजे. जर यंदा अनेक वर्षांपासून प्रलंबित राहिली ही मागणी मान्य केली गेली नाही तर कदाचित आंदोलन करण्याची वेळ येईल. ती वेळ आणू नका असा गर्भित इशाराही उज्ज्वल ठेंगडी यांनी दिला आहे.

या वर्षी अनेक राज्यात निवडणुका आहेत, त्यामुळे पुढेच पुरस्कार देताना त्या राज्याचा विचार करुन महाराष्ट्राला विसरु नका. कधी न कधी महाराष्ट्रातही निवडणुका येतील हे विसरु नका, असं सूचक वक्तव्य ठेंगडी यांनी केलं. वाटल्यास दादासाहेब फाळके पुरस्कार स्त्री पुरुष असा विभागून द्या असंही त्यांनी सुचवलं आहे.