समुपदेशनासाठी येणाऱ्या अनेकींवर कित्येक वर्षापासून अत्याचार, नागपुरातील मानसोपचार तज्ज्ञाच्या कृत्याने महाराष्ट्र हादरला!
नागपुरात एक धक्कादायक प्रकार समोर आला आहे. येथे एक मानसोपचार तज्ज्ञ गेल्या अनेक वर्षांपासून अल्पवयीन मुलींचे लैंगिक शोषण करत असल्याचे समोर आले आहे.
नागपूर : एका 45 वर्षीय मानसोपचार तज्ज्ञाला त्याच्याकडे समुपदेशनासाठी येणाऱ्या तरुणी आणि अल्पवयीन मुलींच्या लैंगिक शोषण प्रकरणी अटक करण्यात आली आहे. धक्कादायक बाब म्हणजे आरोपी मानसोपचार तज्ज्ञ गेले अनेक वर्ष नागपुरात समुपदेशन केंद्र चालवत होता. तो नागपूरसह शेजारच्या जिल्ह्यांमध्ये त्या संदर्भातील शिबिरेही घेत होता. त्यामुळे त्याच्याकडे मोठ्या संख्येने विद्यार्थी आणि विद्यार्थिनी करियर संबंधी अडचणींबद्दल समुपदेशन घ्यायला येत होते. त्यापैकीच काही अल्पवयीन मुली आणि तरुणींचे त्याने विविध आमिष दाखवून लैंगिक शोषण केल्याचे समोर आले आहे. एवढेच नाही तर आरोपी या अल्पवयीन मुली आणि तरुणींचे आक्षेपार्ह फोटो व्हिडिओही स्वतःकडे संग्रहित ठेवायचा आणि त्याच्या आधारे पुढेही त्यांना ब्लॅकमेल करायचा.
दहा वर्षांपूर्वीचे फोटो दाखवून ब्लॅकमेल
गेल्यावर्षी नोव्हेंबर महिन्यात आरोपी मानसोपचार तज्ज्ञाने सुमारे दहा वर्षांपूर्वी त्याच्याकडे येणाऱ्या एका तरुणीला तिचे त्या काळचे काही फोटो पाठवून ब्लॅकमेल करणे सुरू केले. त्याच्या ब्लॅकमेलिंगला कंटाळलेल्या सबंधित तरुणीने हिम्मत करून पोलिसांकडे तक्रार केली. तेव्हा पहिल्यांदा या विकृत मानसोपचार तज्ज्ञाच्या अनेक वर्षांच्या दुष्कृत्याचा भंडाफोड झाला. पोलिसांनी नोव्हेंबर महिन्यात यासंदर्भात गुन्हा नोंदवत आरोप लागलेल्या मानसोपचार तज्ज्ञालापॉक्सो आणि लैंगिक छळाच्या आरोपात अटक केली होती. जेव्हा पोलिसांनी या प्रकरणी सखोल तपास केला, तेव्हा मिळालेले पुरावे आणखी धक्कादायक होते.
पोलिसांनी हार्ड डिस्क जप्त केली
पोलिसांनी आरोपी मानसोपचार तज्ज्ञाच्या कार्यालयातून एक हार्ड डिस्क जप्त केली असून त्यामध्ये अनेक आक्षेपार्ह फोटो व्हिडिओ आढळल्याची पोलीस सूत्रांची माहिती आहे. त्यामुळे आरोपी मानसोपचार तज्ज्ञाने आजवर अनेक तरुणी आणि अल्पवयीन मुलींसोबत गैरकृत्य केले असावे असा पोलिसांचा अंदाज आहे. पोलिसांनी गेल्या अनेक वर्षात या मानसोपचार तज्ज्ञाकडे येणाऱ्यांची यादी बनवत त्यांच्याशी संपर्क करणे सुरू केले आहे. त्याच प्रक्रियेत चार जानेवारीला आणखी दोघींनी पोलिसांनी हिम्मत दिल्यामुळे याप्रकरणी तक्रार दिली आहे. त्यामुळे आतापर्यंत आरोपी मानसोपचार तज्ज्ञाविरोधात लैंगिक छळाचे एकूण तीन गुन्हे नोंदवण्यात आले आहेत. प्रकरणाचे गांभीर्य ओळखून नागपूरचे पोलीस आयुक्त रवींद्र सिंगल यांनी याप्रकरणी महिला पोलिस अधिकारी, महिला बालकल्याण अधिकारी तसेच काही महिला काउंसलर चा समावेश असलेली विशेष समिती गठित केली आहे. ही विशेष समिती याप्रकरणी आणखी काही तरुणी आणि अल्पवयीन मुलींसोबत लैंगिक छळाच्या घटना घडल्या आहेत का याचा शोध घेत आहे.
अनेकींचा संसार उद्ध्वस्त होऊ नये म्हणून आरोपीचे नाव जाहीर नाही
या मानसोपचार तज्ज्ञाकडे अनेक वर्षांपासून करियर संबंधी समुपदेशनासाठी अल्पवयीन मुली व तरुणी येत होत्या. आता बहुतांशी त्यांच्या जीवनात लग्न करून सुखी आयुष्य जगत आहेत. त्यामुळे आरोपी मानसोपचार तज्ज्ञाचे नाव आणि त्याच्या समुपदेशन केंद्राची माहिती या क्षणाला जाहीर केल्यामुळे अनेकांचे आयुष्य उद्ध्वस्त होऊ शकते. म्हणून पोलिसांनी अद्यापही आरोपीच नाव जाहीर केलेलं नाही.
हेही वाचा :
High Court: मृतदेहासोबत शारिरीक संबध ठेवल्यास बलात्कार होतो का? जाणून घ्या हायकोर्ट काय म्हणालं?
महत्त्वाच्या बातम्या
ट्रेंडिंग न्यूज
