Nagpur Crime : नागपुरात पूर्ववैमनस्यातून भरदिवसा एकाला संपवलं, दोन मारेकऱ्यांना पोलिसांकडून अटक

Nagpur Crime : धारदार शस्त्राने वार करुन दोन तरुणांनी एका वृद्ध व्यक्तीचा खून केला. ही घटना भरदिवसा सक्करदरा पोलीस ठाण्याच्या हद्दीत भारत माता चौकात घडली.

symbolic image

Nagpur Crime News : धारदार शस्त्राने वार करुन दोन तरुणांनी एका वृद्ध व्यक्तीचा खून केला. ही घटना भरदिवसा सक्करदरा पोलीस (Nagpur Police) ठाण्याच्या हद्दीत भारत माता चौकात घडली. पूर्ववैमनस्यातून घडलेल्या या घटनेने परिसरात दहशत पसरली आहे. मोहम्मद शाकिब सारिक अंसारी (वय 19 वर्षे) रा. महेंद्रनगर आणि शेख फैज शेख फिरोज (वय 18 वर्षे) रा. यासीन प्लॉट, मोठ ताजबाग अशी आरोपींची नावे आहे. तर शेख फिरोज शेख मोइनुद्दीन (वय 50 वर्षे) रा. यासीन प्लॉट, मोठा ताजबाग असे मृताचं नाव आहे.

मिळालेल्या माहितीनुसार, फिरोज आणि त्याच्या भावांचे आशीर्वादनगर येथील भारत माता चौकाजवळ पानठेला आहेत. त्यांच्यावर पूर्वीचे काही गुन्हे नोंद असल्याची चर्चा आहे. मोठा ताजबाग परिसरातच राहणाऱ्या आसिफ घोडाशी या शेख बंधूंचे अनेक वर्षांपासून वैमनस्य आहे. जवळपास सहा महिन्यांपूर्वी फिरोजचा लहान भाऊ शेख फारुखने ताजबागच्या समोसा मैदानाजवळ आसिफवर हल्ला केला होता. या प्रकरणात त्याच्यावर खुनाच्या प्रयत्नाचा गुन्हा नोंदवण्यात आला होता.

नवीन वर्षाच्या सुरुवातीलाच पाचपावलीच्या वैशालीनगर सिमेंट रोडवर दिवसाढवळ्या एका युवकाचा खून करण्यात आल्यामुळे परिसरात खळबळ उडाली होती. गेल्या सात दिवसांत शहरात चार खुनाच्या घटना घडल्याने नागरिकांमध्येही दहशतीचे वातावरण आहे.

पंधरा दिवसांपूर्वीच व्यसनमुक्ती केंद्रातून परतला

फिरोजला अंमली पदार्थांचे सेवन करण्याचे व्यसन आहे. हे व्यसन सोडवण्यासाठी त्याला व्यसनमुक्ती केंद्रातही भरती करण्यात आले होते. पंधरा दिवसांपूर्वीच तो व्यसनमुक्ती केंद्रातून घरी आला होता. मंगळवारी (3 जानेवारी) दुपारी फिरोज त्याच्या दुकानाजवळील दुकानदाराकडे चप्पल दुरुस्त करण्यासाठी गेला होता. या दरम्यान शाकिब आणि फैज तेथे आले. दोघांनीही धारदार शस्त्रांनी फिरोजवर हल्ला केला. फिरोज रक्ताच्या थारोळ्यात कोसळला. या घटनेने परिसरात खळबळ उडाली. त्याचे भाऊ मदतीला पोहोचण्यापूर्वीच आरोपी दुचाकीवर बसून पसार झाले होते. घटनेची माहिती पोलिसांना देण्यात आली. 

दोघांना कामठीतून अटक

फिरोजला शासकीय वैद्यकीय महाविद्यालयात नेण्यात आले, मात्र डॉक्टरांनी मृत घोषित केले. पोलीस उपायुक्त विजयकांत सागर यांच्यासह सक्करदरा आणि गुन्हे शाखेचे पथक घटनास्थळावर पोहोचले. दोन्ही आरोपी सीसीटीव्ही (CCTV) फुटेजमध्ये कैद झाले होते. सक्करदरा ठाण्याच्या डीबी पथकाने दोघांनाही कामठी परिसरातून अटक केली. चौकशीत शाकिबने सांगितले की, सहा महिन्यांपूर्वी फारुखने त्याचा मामा आसिफ घोडावर जीवघेणा हल्ला केला होता. याचा बदला घेण्यासाठी त्याने फिरोजवर हल्ला केला.

ही बातमी देखील वाचा...