Virar Building Collapse : विरारच्या इमारत दुर्घटनेत आतापर्यंत 15 जणांचा दुर्दैवी अंत, बिल्डरला अटक, सदोष मनुष्यवधाचा गुन्हा दाखल
Virar Building Collapse : विरारच्या इमारत दुर्घटनेत एनडीआरएफच्या पथकाने आत्तापर्यंत 24 जणांना रेस्क्यू केले आहे. तर पंधरा जणांचा दुर्दैवी मृत्यू झाला आहे.
Virar Building Collapse : विरारच्या इमारत दुर्घटनेत एनडीआरएफच्या (NDRF) पथकाने आत्तापर्यंत 24 जणांना रेस्क्यू केले आहे. तर पंधरा जणांचा दुर्दैवी मृत्यू झाला आहे. नऊ जणांवर खाजगी रुग्णालयात उपचार सुरू आहेत. या घटनेला 32 तास उलटले असले असूनही एनडीआरएफच्या पथकाकडून घटनास्थळी शोधमोहीम राबवली जात आहे. तर वसई विरार महापालिकेने या इमारतीचे बांधकाम करणाऱ्या बिल्डरवर विरार पोलीस ठाण्यात (Virar Police Station) अखेर सदोष मनुष्यवधाचा आणि एमआरटीपी अंतर्गत गुन्हा दाखल केलेला आहे.
मंगळवारी रात्री विरार पूर्वेतील विजयनगर परिसरात असलेल्या रमाबाई अपार्टमेंट इमारतीचा काही भाग कोसळण्याची (Virar Building Collapse) दुर्दैवी घटना घडली. या दुर्घटनेत अनेक कुटुंबे इमारतीच्या ढिगाऱ्याखाली अडकली होती. त्यांचा शोध घेण्यासाठी राष्ट्रीय आपत्ती निवारण पथक (NDRF) आणि वसई-विरार महापालिकेच्या अग्निशमन दलाकडून मदत व बचावकार्य राबवले जात आहे. प्रारंभी, जेसीबीसारखी यंत्रे घटनास्थळी पोहोचू शकत नसल्याने ढिगारा हटवण्यात अडथळे निर्माण झाले. मात्र, दुपारनंतर इमारतीच्या शेजारील चाळी रिकाम्या करून काही भाग पाडण्यात आला आणि त्यामुळे बचावकार्यास वेग मिळाला.
15 जणांचा मृत्यू, 9 जणांवर उपचार सुरु
घटनेनंतर 32 तासांहून अधिक वेळ उलटून गेला असून, आतापर्यंत 24 जणांना ढिगाऱ्यातून बाहेर काढण्यात आले आहे. त्यापैकी 15 जणांचा मृत्यू झाल्याची माहिती महापालिकेने दिली आहे. तर नऊ जणांवर खाजगी रुग्णालयात उपचार सुरू आहेत. सध्या बचावकार्य अजूनही सुरू असून, उर्वरित अडकलेल्या नागरिकांना लवकरच बाहेर काढले जाईल, असे प्रशासनाने सांगितले आहे.
बिल्डरवर गुन्हा दाखल
तर वसई विरार महापालिकेने या इमारतीचे बांधकाम करणाऱ्या बिल्डरवर विरार पोलीस ठाण्यात अखेर सदोष मनुष्यवधाचा आणि एमआरटीपी अंतर्गत गुन्हा दाखल केलेला आहे. नितल गोपीनाथ साने या बांधकाम व्यवसायिकाला विरार पोलिसांनी अटकदेखील केली आहे. या सोबत जागा मालिकावरही देखील गुन्हा दाखल करण्यात आलेला आहे. या दोघांनी चार मजली अनाधिकृत इमारत सन 2008 ते 2009 मध्ये बांधली होती. या इमारतीमध्ये 54 फ्लॅट आणि चार गाळे होते. महाराष्ट्र प्रादेशिक नगररचना अधिनियम कलम 52, 53 आणि 54 नुसार गुन्हा दाखल केला असून BNS कलम 105 नुसार हा गुन्हा दाखल करण्यात आलेला आहे.
इतर महत्त्वाच्या बातम्या
महत्त्वाच्या बातम्या
