राष्ट्रवादीचं ऑफिस कुठे माहित नाही, उदयनराजेंची बैठकीनंतर एन्ट्री

राष्ट्रवादीच्या मुंबईतील कार्यालयाचा पत्ताच माहित नसल्यामुळे साताऱ्याचे खासदार उदयनराजे आढावा बैठकीला उशिराने पोहचले.

मुंबई : लोकसभा निवडणुकीसाठी राष्ट्रीवादीतर्फे मतदारसंघनिहाय आढावा बैठक होत आहे. या बैठकीला पोहचण्यास साताऱ्याचे खासदार उदयनराजे यांना विलंब झाला. राष्ट्रवादीच्या मुंबईतील कार्यालयाचा पत्ताच माहित नसल्यामुळे साताऱ्याची बैठक संपल्यानंतर उदयनराजे पोहचले. मात्र ट्राफिकमुळे आपल्याला उशीर झाल्याचं उदयनराजे म्हणाले. उदयनराजे यांचे समर्थक राष्ट्रवादीच्या कार्यालयाबाहेर आधीच पोहचले. मात्र उदयनराजेंना ऑफिस कुटे आहे, हेच माहित नसल्यामुळे त्यांना पत्ता शोधण्यात वेळ गेला. कार्यकर्ते उदयनराजेंना फोनवरुन मार्गदर्शक करत होते. कुठल्या सिग्नलला कुठे वळावं, याविषयी कार्यकर्त्यांकडून सूचना दिल्या जात होत्या. बैठकीत एका गटाने उदयनराजे यांना उमेदवारी देण्याची मागणी केली, तर दुसऱ्या गटाने उदयनराजेंना विरोध केला. रामराजे निंबाळकर किंवा दुसरा उमेदवार देण्याची मागणी बैठकीत करण्यात आली. 'बैठकीत काय झालं, याबाबत मी फोनवरुन माहिती घेतली. मला विरोध झाला तरी माझ्यावर प्रेम करणाऱ्या व्यक्तींची संख्या जास्त आहे. अनेकांचा मला पाठिंबा आहे, अशी कोपरखळी उदयनराजेंनी लगावली. साताऱ्यातून लोकसभा निवडणूक लढवण्यास मी इच्छुक आहे. मात्र पवारसाहेब अंतिम निर्णय घेतील, असंही उदयनराजे म्हणाले. पवार साहेबांनी मतदार संघाचा आढावा घेतला आहे. साहेब जो निर्णय घेतील तो मान्य असेल. जसे पवार साहेबांचे अन्य पक्षात मित्र आहेत, तसेच अन्य पक्षातही माझे मित्र आहेत, असं सूचक वक्तव्य उदयनराजेंनी केलं. गेले काही दिवस सातारा मतदारसंघ चर्चेत आहे. खासदार उदयनराजे यांच्याविरोधात पक्षात नाराजीचा सूर आहे. साताऱ्याला नवीन उमेदवाराबाबत चाचपणी सुरु असल्याची चर्चा काही दिवसांपूर्वी होती, मात्र शरद पवारांनी या बातम्यांचं खंडन केलं होतं. साताऱ्यातून माजी सनदी अधिकारी श्रीनिवास पाटील यांचं नाव चर्चेत आहे.