ठाण्यात एसटीचे आठ कंत्राटी कामगार निलंबित, मुंबईत धरपकड

राज्यभरातल्या एसटी कर्मचाऱ्यांनी आज कुठलीही पूर्वसूचना न देता संप पुकारला असून त्यामुळे ग्रामीण भागाची लाईफलाईन समजल्या जाणाऱ्या एसटीची सेवा पुरती कोलमडली आहे.

ठाणे : राज्यभरात सुरु असलेलं एसटी कर्मचाऱ्यांचं आंदोलन मोडीत काढण्याचा प्रयत्न सुरु आहे. कारण ठाण्यात एसटीच्या आठ कंत्राटी कामगारांचं निलंबन करण्यात आलं आहे. तर मुंबई आणि उस्मानाबादमध्ये एसटी कर्मचाऱ्यांना ताब्यात घेण्यात आलं आहे. एसटी कर्मचाऱ्यांनी पगारवाढीसाठी पुकारलेल्या संपात सहभागी झाल्यामुळे ठाण्यातील एसटीच्या आठ कंत्राटी कामगारांचं निलंबन करण्यात आलं आहे. कंत्राटी कामगारांना संपत सहभागी होण्याचा अधिकार नसल्याचं कारण देत ही कारवाई करण्यात आली आहे. राज्यभरातल्या एसटी कर्मचाऱ्यांनी आज कुठलीही पूर्वसूचना न देता संप पुकारला असून त्यामुळे ग्रामीण भागाची लाईफलाईन समजल्या जाणाऱ्या एसटीची सेवा पुरती कोलमडली आहे. ठाण्याच्या खोपट एसटी आगारातही एकूण 383 कायमस्वरुपी कर्मचाऱ्यांपैकी 50 टक्के कर्मचारी संपात सहभागी झाले. त्यामुळे अनेक एसटीच्या अनेक फेऱ्या रद्द करण्याची वेळ आली आहे. कामगारांच्या प्रश्नांची उत्तरं देणं टाळलं, कार्यक्रमातून रावतेंचा काढता पाय 9 पैकी 8 कंत्राटी कामगार निलंबित त्यातच एकूण 9 कंत्राटी कामगारांपैकी 8 कंत्राटी कामगारही या संपात सहभागी झाले आहेत. मात्र आधीच अवैध ठरवण्यात आलेला हा संप आणि त्यात रोजंदारीवर काम करणाऱ्या कंत्राटी कामगारांना अशा संपात सहभागी होण्याचा अधिकारच नसल्याचा ठपका ठेवत, एसटी महामंडळाने या सर्वच्या सर्व 8 कामगारांना निलंबित केलं आहे. त्यांना पुन्हा सेवेत घ्यायचं की नाही? हे आता वरिष्ठांच्या आदेशानुसार ठरवण्यात येणार असल्याची माहिती खोपट एसटी डेपो प्रमुखांनी दिली आहे. त्यामुळे हे कामगार आता काय भूमिका घेतात? हे पाहणं महत्त्वाचं आहे. मुंबई आणि उस्मानाबादेत घरपकड दुसरीकडे मुंबईतील परळमध्ये काही कर्मचाऱ्यांना ताब्यात घेतलं तर उस्मानाबादेत तिघांना अटक केली आहे. परळ डेपोतून पोलिस बंदोबस्तात एसटी बाहेर काढताना ज्या कर्मचाऱ्यांनी ती अडवली, त्या कर्मचाऱ्यांना पोलिसांनी ताब्यात घेतलं. तर उस्मानाबादमध्ये एसटीच्या संपामध्ये सहभागी झालेल्या तीन एसटी कर्मचाऱ्यांना अटक करण्यात आल्याची माहिती मिळत आहे. शिवाय उस्मानाबादमधील एसटी स्थानकात पोलिसांचा बंदोबस्तही वाढवण्यात आला आहे. LIVE एसटी कर्मचाऱ्यांचं अचानक कामबंद आंदोलन नांदेडमध्ये एसटीची तोडफोड याशिवाय नांदेड जिल्ह्यातील भोकर तालुक्यात संपादरम्यान एसटीची तोडफोड करण्यात आली आहे. भोकर इथून नांदेडकडे निघालेल्या एसटीवर अज्ञाताने दगड मारुन काचा फोडल्याची घटना घडली. शिवाय हदगावकडे निघालेल्या बसवरही दगडफेकीची घटना घडली आहे. वाहतूक नियंत्रकाचं निलंबन एसटी कर्मचाऱ्यांच्या संपात सहभागी होण्यासाठी गेलेल्या अंबाजोगाई डेपोचे वाहतूक नियंत्रक व्हीपी चाटे यांचं निलंबन करण्यात आलं आहे. चाटे यांच्याकडे कंडक्टरना लागणाऱ्या तिकीट मशिन देण्याची जबाबदारी आहे. त्या मशिनचं वाटप न करता चाटे संपात सहभागी झाले, म्हणून त्यांचं निलंबन करण्यात आल्याचं एसटी प्रशासनाने म्हटलं आहे.