कल्याण-डोंबिवली महापालिकेत शिवसेना-मनसे एकत्र येण्याची चिन्ह

कल्याण: शिवसेना पक्षप्रमुख उद्धव ठाकरेंनी भाजपशी युती तोडल्यानंतर कल्याण-डोंबिवली महापालिकेमध्ये नवीन राजकीय समीकरणं उदयास येतं आहे. भाजपला सत्तेपासून दूर ठेवण्यासाठी शिवसेना आणि मनसे एकत्र येण्याची चिन्ह आहेत. भाजपला दूर ठेवण्यासाठी कल्याण-डोंबिवलीमधील शिवसेना आणि मनसे पदाधिकाऱ्यांच्या बैठकाही सुरू झाल्या आहेत. त्यामुळे आता दोन्ही पक्षांचे नेते काय निर्णय घेतात हे पाहणं महत्वाचं ठरणार आहे. दरम्यान, कल्याण-डोंबिवली महापालिकेतील महिला आणि बालकल्याण समिती, परिवहन समिती आणि उपमहापौर पदासाठी काल निवडणुका होणार होत्या. मात्र, एकही उमेदवारी अर्ज न आल्यामुळं निवडणुका पुढे ढकलण्यात आल्या आहेत. जर महापालिकेत शिवसेना आणि मनसे एकत्र आली तर मॅजिक फिगर गाठत भाजपला सत्तेपासून दूर ठेवणं सहज शक्य आहे. त्यामुळे आता कल्याण-डोंबिवलीत नेमकं काय घडणार याकडे कार्यकर्त्यांचं लक्ष लागून राहिलं आहे. कल्याण-डोंबिवलीत शिवसेनेने सर्वाधिक ५२ जागांवर विजय मिळवला आहे. मात्र सत्तास्थापनेसाठी आवश्यक असलेले एकहाती बहुमत त्यांना मिळवता आलेले नाही. १२२ जागा असलेल्या कल्याण-डोंबिवली महानगरपालिकेत ६२ ही मॅजिक फिगर आहे. त्यामुळे शिवसेनेनं मनसेला सोबत घेतल्यास भाजपला विरोधी पक्षात बसावं लागू शकतं. कल्याण-डोंबिवली महानगरपालिकेतील सध्याचे  पक्षीय बलाबल: - शिवसेना 52 - भाजप 42 - मनसे 9 - काँग्रेस 4 - राष्ट्रवादी 2 एकूण जागा: 122