Sachin Vaze Case : सचिन वाझे यांच्या NIA कोठडीत 3 एप्रिलपर्यंत वाढ
मुकेश अंबानी यांच्या अँटिलिया बंगल्याबाहेर स्कॉर्पिओ गाडीत स्फोटकं ठेवल्याप्रकरणी आरोपी सचिन वाझे यांच्या एनआयए कोठडीत वाढ करण्यात आली आहे. सचिन वाझे यांच्या एनआयए कोठडीत 3 एप्रिलपर्यंत वाढ करण्यात आली आहे.
मुंबई : सचिन वाझे यांच्या एनआयए कोठडीत वाढ करण्यात आली आहे. 3 एप्रिलपर्यंत सचिन वाझे यांच्या एनआयए कोठडीत वाढ करण्यात आली आहे. तसेच युक्तीवादा दरम्यान, मला बळीचा बकरा बनवलं जातंय, मी दीड दिवस या प्रकरणाचा तपास अधिकारी होतो, जी चौकशी करायची होती, ती करुन झालीये, आता आणखी एनआयए कोठडी देऊ नका, मला कोर्टाला आणखी काही गोष्टी सांगायच्या आहेत, अशी माहिती सचिन वाझे यांनी कोर्टात दिली आहे. यावर तुम्हाला जे काही सांगायचे आहे, ते लेखी लिहून द्या, असे निर्देश एनआयए कोर्टानं सचिन वाझे यांना दिले आहेत.
अँटिलिया स्फोटक प्रकरणी सचिन वाझे यांच्याविरोधात आता गैरकायद कृत्य प्रतिबंधित अधिनियम (UAPA) अंतर्गत गुन्हा दाखल करण्यात आला आहे. दहशतवादी कृत्य किंवा राष्ट्रविरोधी कारवायांविरोधात ही कलमं लावली जातात. एनआयएने बुधवारी विशेष एनआयए कोर्टाला या प्रकरणात यूएपीए कलम लावण्याविषयी माहिती देताना अर्ज दाखल केला होता. वाझे यांच्यावर यूएपीएच्या कलम 16 आणि 18 अंतर्गत गुन्हा दाखल करण्यात आला आहे. याच संदर्भात आज एनआयए कोर्टात सुनावणी करण्यात आली.
मला बळीचा बकरा बनवलं जातंय : सचिन वाझे
एनआयए कोर्टात सुनावणी वेळी युक्तीवादा दरम्यान 'मला बळीचा बकरा बनवंल जातंय', असा दावा सचिन वाझे यांच्याकडून एनआयए न्यायालयात करण्यात आला. मी केवळ या प्रकरणाचा तपास करत होतो. मी दीड दिवस या प्रकरणाचा तपास अधिकारी होतो. अचानक मला सांगितलं की, तुझ्या विरोधात पुरावे आहेत. आम्ही तुला अटक करतोय. जी चौकशी करायची होती ती करून झालीय, आता आणखीन एनआयए कोठडी देऊ नका, अशी विनंती सचिन वाझे यांच्या वतीने न्यायालयात करण्यात आली होती. मला कोर्टाला आणखीन काही गोष्टी सांगायच्या आहेत, अशी माहितीही सचिन वाझे यांनी एनआयए कोर्टात दिली.
बचावपक्षाचा हा युक्तिवाद हास्यास्पद : एनआयए
बचावपक्षाचा हा युक्तिवाद हास्यास्पद, धमकावण्याचा हेतू नव्हता तर मग गाडी काय समारंभासाठी अंबानींच्या घराबाहेर लावली होती का? जिलेटिनच्या कांड्या आणि डेटोनेटरवर एनआयएचं उत्तर. एएसजी अनिल सिंह यांनी स्कॉर्पिओमध्ये सापडलेलं धमकीचं पत्र कोर्टात वाचून दाखवलं. 'अगलीबार यह सब सामान कनेक्ट होके आएगा, समझ जा। तुझे और तेरी पुरी फॅमिली को उडाने का बंदोबस्त कर दिया है'. स्कर्पिओमध्ये धमकीची दोन पत्र असल्याचं एनआयएने सांगितलं. मात्र, दुसऱ्या पत्रात अश्लिल भाषेचा वापर असल्यानं सरकारी वकिलांनी ते वाचून न दाखवता, थेट न्यायमूर्तींना सोपवलं. विशेष एनआयए न्यायाधीश प्रशांत सित्रे यांच्यापुढे सुनावणी सुरू आहे. सचिन वाझे यांच्यासाठी एनआयएनं आणखी 15 दिवसांची कोठडी मागितली आहे.
वाझेंचा गुन्हा हा देशपातळीवरील मोठा गुन्हा आहे. एखाद्या पोलिसाचा अश्या गुन्ह्यात सहभाग असणं ही शरमेची बाब असल्याचं एनआयएच्या वतीनं एएसजी अनिल सिंह यांचा युक्तिवाद. वाझेंजवळ 62 बेहिशोबी जिवंत काडतुसं आढळली. त्यांना सरकारनं दिलेली सगळी काडतुसं मात्र गायब असल्याचंही सांगितलं आहे.
महत्त्वाच्या इतर बातम्या :
महत्त्वाच्या बातम्या
