देशातील एकूण कोरोना बळींपैकी 94 टक्के मृत्यू फक्त 8 राज्यात!

देशात कोरोना विषाणू संक्रमणामुळे झालेल्या एकूण बळींपैकी 94 टक्के मृत्यू हे केवळ आठ राज्यात झाल्याचे समोर आले आहे. यात महाराष्ट्रात सर्वाधिक रुग्णांचा जीव कोरोनाने गेला आहे.

सांकेतिक छायाचित्र

मुंबई : देशात कोरोना विषाणूचा संसर्ग वेगाने होताना दिसत आहे. मात्र, कोरोना विषाणूचा प्रसार हा काही राज्यांमध्येच मोठ्या प्रमाणात झाल्याचे आकडेवारीवरुन स्पष्ट झाले आहे. देशातील कोरोनाबाधितांचा आकडा हा 1 लाख 90 हजार 535 इतका आहे. यापैकी 1 लाख 29 हजार 21 कोरोनाबाधित रुग्ण हे फक्त सात राज्यात आहेत. तर, देशातील एकूण बळींपैकी 94 टक्के बळी हे फक्त 8 राज्यात झाल्याची नोंद झाली आहे.

देशात कोरोना बाधित रुग्णांची संख्या झपाट्याने वाढत आहे. मात्र, या विषाणूचा प्रसार हा काही राज्यांमध्ये जास्त प्रमाणात असल्याचे दिसून आले आहे. तर, काही राज्यांनी हा संसर्ग रोखण्यात यश मिळवल्याचे आकडेवारीवरुन पाहायला मिळत आहे.

राज्यांनुसार रुग्णांची संख्या

• महाराष्ट्रात - 67 हजार 655
• तामिळनाडू - 22 हजार 333
• दिल्ली - 19 हजार 844
• गुजरात – 16 हजार 779
• राजस्थान – 8 हजार 831
• मध्यप्रदेश – 8 हजार 89
• उत्तरप्रदेश – 7 हजार 823

याचाच अर्थ देशातील एकूण कोरोनाबाधितांपैकी तब्बल 67.71 टक्के बाधित हे महाराष्ट्र, तामिळनाडू, दिल्ली, गुजरात, राजस्थान, मध्यप्रदेश, उत्तरप्रदेश या सात राज्यात आहेत. देशाच्या रुग्णसंख्येत एकट्या महाराष्ट्राचा वाटा 35.50 टक्के आहे. तर मुंबईचा वाटा 20.82 टक्के आहे.

हीच बाब कोविड मृतांच्याबाबतीतही आहे. 5 हजार 394 मृतांपैकी महाराष्ट्रात सर्वाधिक 2 हजार 286 आणि गुजरातमध्ये 1 हजार 38 असे 3 हजार 324 म्हणजे 61.62 टक्के बळी हे फक्त महाराष्ट्र आणि गुजरात या दोन राज्यात गेले आहेत.

• महाराष्ट्रात - 2 हजार 286
• गुजरात – 1 हजार 38
• दिल्ली - 473
• मध्यप्रदेश – 350
• पश्चिम बंगाल – 317
• उत्तरप्रदेश – 213
• राजस्थान – 194
• तामिळनाडू - 173

तर एकूण बळींमधील 5 हजार 44 म्हणजे तब्बल 93.51 टक्के बळी महाराष्ट्र, गुजरात, दिल्ली, मध्यप्रदेश, पश्चिम बंगाल, उत्तर प्रदेश, राजस्थान आणि तामिळनाडू या 8 राज्यात आहेत. त्यातही एकट्या महाराष्ट्राचा वाटा 42.38 टक्के आहे. तर देशातील कोविड बळींपैकी 23.71 टक्के बळी एकट्या मुंबईत गेले आहेत.

लॉकडाऊन वाढला देशातला लॉकडाऊन 30 जूनपर्यंत वाढल्याची घोषणा केंद्र सरकारने केली आहे. 1 जूनपासून 30 जूनपर्यंत महिनाभर हा लॉकडाऊन असणार आहे. लॉकडाऊन 5.0 हा फक्त कंटेनमेंट झोनपुरताच मर्यादित आहे. कंटेनमेंट झोनबाहेरील निर्बंध टप्प्याटप्याने कमी होणार आहे. महत्त्वाचं म्हणजे कटेंनमेंट झोन वगळता इतर भागात 8 जूननंतर अटींसह काही गोष्टींना परवानगी देण्यात आली आहे.

Rain & Corona | पावसाळ्यात कोरोनाला दूर ठेवण्यासाठी काय केलं पाहिजे? कशी घ्यावी काळजी?स्पेशल रिपोर्ट