Aarey Metro Carshed : आरे कारशेडमधील मर्यादेपेक्षा जास्त वृक्षतोडीला हायकोर्टात आव्हान

Aarey Metro Carshed : सर्वोच्च न्यायालयानं 84 झाड कापण्याची परवानगी देऊनही एमएमआरसीएलला तोडायचीत 177 झाडं

Metro Carshed

Source : PTI File Photo

New PIL at HC regarding tree cutting issue at Aarey Metro Carshed : मुंबईतील आरे कारशेडमधील मर्यादेपेक्षा जास्त वृक्षतोडीला हायकोर्टात आव्हान देण्यात आले आहे. सर्वोच्च न्यायालयानं 84 झाडे कापण्याची परवानगी देऊनही एमएमआरसीएलला 177 झाडं तोडायची आहेत. त्यामुळे हायकोर्टात धाव घेण्यात आली आहे. मुंबई महानगर पालिकेच्या वृक्ष प्राधिकरणाची याबाबतची नोटीस रद्द करण्याची मागणी करत पर्यावरणप्रेमींनी हायकोर्टात धाव घेतली आहे. या याचिकेवर पुढील आठवड्यात सुनावणी होणार आहे.

मुंबईतील आरे कॉलनीत वसलेल्या मेट्रो कारशेडसाठी 84 झाडं कापण्याची परवानगी दिलेली असताना एमएमआरडीएलकडून 177 झाडं कापण्याची मुंबई महानगरपालिकेच्या वृक्षप्राधिकरणाकडे परवानगी कशी मागितली?, असा सवाल करत पर्यावरणस्नेही झोरू बाथेना यांनी मुंबई उच्च न्यायालयात नवी जनहित याचिका दाखल केली आहे. या याचिकेवर पुढील आठवड्यात सुनावणी होणार आहे.

एकनाथ शिंदे - देवेंद्र फडणवीस सरकारनं कुलाबा–वांद्रे–सीप्झ या मेट्रो-3 प्रकल्पासाठीची कारशेड पुन्हा आरे वसाहतीत हलवण्याचं निश्चित केल्यानंतर तिथली काही झाडे कापण्यासाठी परवानगी मिळावी म्हणून मुंबई मेट्रो रेल कॉर्पोरेशन(एमएमआरडीएल)ने सर्वोच्च न्यायालयात धाव घेतली होती. त्यावर नोव्हेंबर 2022 मध्ये सर्वोच्च न्यायालयानं त्यांना 84 झाडे कापण्यासाठी परवानगी दिली आहे. मात्र, प्रत्यक्षात 177 झाडांची कत्तल करण्यासाठी एमएमआरडीएलनं पालिकेच्या वृक्ष प्राधिकरणाकडे अर्ज केला आहे. यावर प्राधिकरणाकडूनही नोटीस बजावून लोकांकडनं सुचना-हरकती मागण्यात आल्या आहेत. त्या नोटीसीला पर्यावरणप्रेमी झोरू बाथेना यांनी मुंबई उच्च न्यायालयान आव्हान दिलेलं आहे. ही नोटीस म्हणजे सर्वोच्च न्यायालयाच्या आदेशांचं सरळसरळ उल्लंघन असल्याचा दावाही बाथेना यांनी याचिकेतून केला आहे.

गोरेगाव येथील आरे कॉलनीतील मेट्रो कारशेड प्रकल्प साल 2014 पासून वादाच्या भोवऱ्यात अडकडला आहे. आरे हे वनक्षेत्र असल्याचा दावा करत पर्यावरणवाद्यांनी येथील वृक्षतोडीविरोधात अनेकदा निदर्शनं आणि आदोलनं केली आहेत. उद्धव ठाकरे यांच्या नेतृत्वाखालील महाविकास आघाडी सरकारनं साल 2019 मध्ये आरे कॉलनीतील कारशेड कांजूरमार्ग येथे कारशेड हलवण्याचा निर्णय घेतला होता. मात्र, जून 2022 मध्ये, एकनाथ शिंदे यांच्या नेतृत्वाखालील सरकारनं सत्तेत येताच रातोरात हा निर्णय बदलून कारशेड पुन्हा आरे कॉलनीत बांधण्याचा निर्णय घेतला आहे. 

आणखी वाचा;
Sumeet Raghavan : आरे आंदोलकांनाही असाच धडा...; सुमीत राघवनच्या ट्वीटवर नेटकरी संतप्त
Aarey Metro Car Shed Row :  मुंबईच्या आरे कॉलनीत मेट्रो कारशेडच्या बांधकामातील अडथळा दूर, 84 झाडे तोडण्याचा निर्णय सुप्रीम कोर्टाने वृक्ष प्राधिकरणावर सोपवला