क्रीडा, सांस्कृतिक, एनएसएस, एनसीसी स्पर्धेत भाग घेणाऱ्या विद्यार्थ्यांची अतिरिक्त परीक्षा

नॅशनल इंटिग्रेशन कॅम्प, इंटरनेशनल युथ एक्सेंज प्रोग्राम अशा स्पर्धांमध्ये सहभागी होत असल्याने, तसेच प्रकृतीच्या कारणास्तव गैरहजर अशा विद्यार्थ्यांना परीक्षांपासून मुकावे लागत असे.

मुंबई : मुंबई विद्यापीठ तसेच सलंग्नित महाविद्यालयातील अनेक विद्यार्थी हे महाविद्यालयीन, विद्यापीठ, राष्ट्रीय आणि आंतरराष्ट्रीय स्तरावरील विविध खेळाच्या स्पर्धामध्ये, तसेच सांस्कृतिक स्पर्धा, प्रजासत्ताक दिनाच्या निमित्त परेडमध्ये सहभागी होणाऱ्या विद्यार्थ्यांना मुंबई विद्यापीठाने मोठा दिलासा दिला आहे. आजच्या विद्या परिषदेत या निर्णयाच्या अनुषंगाने विद्यापीठाने सर्वसमावेशक अशी योजना तयार केली आहे.

नॅशनल इंटिग्रेशन कॅम्प, इंटरनेशनल युथ एक्सेंज प्रोग्राम अशा स्पर्धांमध्ये सहभागी होत असल्याने, तसेच प्रकृतीच्या कारणास्तव गैरहजर अशा विद्यार्थ्यांना परीक्षांपासून मुकावे लागत असे. त्यामुळे अशा सर्व विद्यार्थ्यांना दिलासा देण्यासाठी म्हणून मुंबई विद्यापीठाने या विद्यार्थ्यांसाठी अतिरिक्त परीक्षा घेण्याचा महत्वपूर्ण निर्णय घेतला आहे.

विशेष बाब म्हणजे विद्यापीठ अथवा महाविद्यालयाचे प्रतिनिधित्व करतांना परीक्षांना मुकाव्या लागणाऱ्या विद्यार्थ्यांकडून या अतिरिक्त परीक्षेला बसताना परीक्षा शुल्क आकारले जाणार नसल्याचेही आजच्या विद्या परिषदेत ठरविण्यात आले आहे. नियोजित परीक्षा संपल्यानंतर तीस दिवसाच्या आत या परीक्षांचे आयोजन करण्यात येणार असल्याचेही विद्या परिषदेत ठरविण्यात आले आहे.

या निर्णयाच्या अनुषंगाने महाविद्यालयीन स्तरावरील सत्र एक ते चार तसेच पाचव्या आणि सहाव्या सत्रातील अप्लाईड कंपोनेंटमधील विषयांच्या परीक्षा या महाविद्यालयात आयोजित केल्या जाणार आहेत. तर, कोअर कंपोनेंटमधील विषयांच्या परीक्षा या विद्यापीठातर्फे आयोजित केल्या जाणार आहेत.