मुंबईकरांना गुडन्यूज! गर्दीच्या वेळेत मेट्रोची वारंवारिता वाढणार; प्रवाशांसाठी 10 ऑगस्टपासून ‘मिक्स्ड-लूप’ सेवा सुरू
अंधेरी ते घाटकोपर दरम्यान गर्दीच्या वेळेतील ट्रेनचे अंतर 3 मिनिटांवर येणार
मुंबई : लोकलच्या वाऱ्या करणाऱ्या मुंबईकरांसाठी मुंबई मेट्रोकडून (Metro) दिलासा देणारी बातमी आहे. रिलायन्स इन्फ्रास्ट्रक्चरच्या प्रवर्तित मुंबई मेट्रो वनकडून वर्सोवा–अंधेरी–घाटकोपर (Mumbai) मार्गिकेवरील सेवा सातत्याने अधिक कार्यक्षम करण्यासाठी आणि प्रवाशांची सुविधा वाढविण्यासाठी सेवा व्यवस्थेत सातत्याने सुधारणा करण्यात येत आहेत. त्यानुसार, 10 ऑगस्ट 2026 पासून, सायंकाळच्या गर्दीच्या वेळेत मुंबई मेट्रो वनकडून ‘मिक्स्ड-लूप’ ऑपरेशन्स सुरू करण्यात येणार आहेत. यामध्ये एक ट्रेन घाटकोपर आणि अंधेरीदरम्यानच्या छोट्या फेरीवर (शॉर्ट लूप) धावेल, तर त्यानंतरची ट्रेन घाटकोपर ते वर्सोवा या नेहमीच्या पूर्ण फेरीवर (फुल लूप) धावेल.
मेट्रोच्या सुधारित सेवा व्यवस्थेनुसार अंधेरी आणि घाटकोपरदरम्यान गर्दीच्या वेळेतील ट्रेनचे अंतर 3 मिनिटे 20 सेकंदांवरून 3 मिनिटे इतके कमी होईल. त्यामुळे प्रवासी वाहून नेण्याची क्षमता 20% पेक्षा अधिक वाढेल, म्हणजेच सुमारे 28,000 अतिरिक्त प्रवाशांना वाहतूक सुविधा उपलब्ध होईल.वर्सोवा आणि आझाद नगरदरम्यान गर्दीच्या वेळेतील ट्रेनचे अंतर 362 सेकंद असेल. आठवड्याच्या कामकाजाच्या दिवशी धावणाऱ्या एकूण ट्रेन फेऱ्यांची संख्या 476 वरून 484 इतकी वाढेल. पहिली शॉर्ट-लूप ट्रेन अंधेरी डाउन प्लॅटफॉर्मवरून सायंकाळी 18:23:06 वाजता सुटेल, तर शेवटची शॉर्ट-लूप ट्रेन 20:23:46 वाजता सुटेल.
या सुधारित सेवा व्यवस्थेमुळे अंधेरी आणि घाटकोपरदरम्यान प्रवास करणाऱ्या 85% पेक्षा अधिक मेट्रो वन प्रवाशांना लाभ होण्याची अपेक्षा आहे. त्यामध्ये पुढील बाबींचा समावेश असेल
a) ट्रेनची वारंवारिता वाढणे
b) प्रतीक्षा वेळ कमी होणे
c) मार्गिकेवरील सर्वाधिक गर्दीच्या भागात अतिरिक्त प्रवासी वाहतूक क्षमता उपलब्ध होणे
मुंबई मेट्रो वनचे मुख्य कार्यकारी अधिकारी (CEO) श्यामंतक चौधरी म्हणाले, “मिक्स्ड-लूप ऑपरेशन्स हा आमच्या विद्यमान पायाभूत सुविधांच्या क्षमतेचा अधिकाधिक वापर करण्यासाठी आणि ट्रेनच्या संचालनाचे अधिक कार्यक्षम नियोजन करण्यासाठी मुंबई मेट्रो वनकडून सुरू असलेल्या प्रयत्नांचा एक भाग आहे. गर्दीच्या वेळेत ही कार्यपद्धती सुरू करून प्रवाशांचा प्रतीक्षा वेळ कमी करणे, प्रवासी वाहून नेण्याची क्षमता वाढवणे आणि अधिक जलद, सोयीस्कर व विश्वासार्ह सेवा देणे हे आमचे उद्दिष्ट आहे.”
मुंबई मेट्रो वनकडून प्रवाशांच्या प्रवासाच्या पद्धतींचे सातत्याने विश्लेषण केले जाते आणि सेवा अधिक प्रभावीपणे देण्यासाठी विविध कार्यप्रणालीतील नवकल्पनांचा वापर केला जातो. यासोबतच सुरक्षितता, विश्वासार्हता आणि कार्यक्षमतेचे सर्वोच्च मानदंड कायम राखले जातात. मुंबईतील प्रवाशांची पसंती असलेली मेट्रो मार्गिका म्हणून मुंबई मेट्रो वन प्रवाशांच्या सुविधेत वाढ करणारे ग्राहक-केंद्रित उपक्रम आणि कार्यप्रणालीतील नवकल्पना सातत्याने राबविण्यास कटिबद्ध आहे. शहराच्या वाढत्या वाहतूक गरजा पूर्ण करण्यास मदत करणे आणि लाखो मुंबईकरांना जागतिक दर्जाचा प्रवासाचा अनुभव देणे, यासाठी मुंबई मेट्रो वन कार्यरत राहील.
हेही वाचा
दादरमधील कबुतरखान्याची ताडपत्री हटवून काय उभारणार?; BMC चा प्लॅन ठरला, लवकरच होणार कामाला सुरुवात!
महत्त्वाच्या बातम्या
