चंद्रशेखर आझादांच्या पुण्यातील सभेला उच्च न्यायालयाचा नकार

पुणे विद्यापीठात चंद्रशेखर आज विद्यापीठातील विद्यापीठातील विद्यार्थ्यांशी चर्चा करणार होते. चंद्रशेखर भीमा-कोरेगाव येथे अभिवादन करण्यास जाऊ शकतात असंही उच्च न्यायचालयानं स्पष्ट केलं आहे.

मुंबई : भीम आर्मीचे प्रमुखे चंद्रशेखर आझाद यांच्या पुण्यातील कार्यक्रमाला मुंबई उच्च न्यायालयाने परवानगी नाकारली आहे. पुणे विद्यापीठाने परवानगी न दिल्याने उच्च न्यायालयानेही सभेला परवानगी देण्यास नकार दिला. कालच पुणे पोलीस प्रशासनानेही चंद्रशेखर यांना पुण्यात सभा घेण्यास परवानगी नाकारली होती.

चंद्रशेखर यांना अटक किंवा ताब्यात घेतलेलं नाही, अशी माहिती पुणे पोलिसांनी दिली आहे. चंद्रशेखर आज पुणे विद्यापीठातील विद्यार्थ्यांशी संवाद साधणार होते. चंद्रशेखर भीमा-कोरेगाव येथे अभिवादन करण्यास जाऊ शकतात असंही उच्च न्यायचालयानं स्पष्ट केलं आहे.

पुणे पोलिसांनी परवानगी नाकारल्यानंतर भीम आर्मीकडून उच्च न्यायालयात याचिका दाखल करण्यात आली होती.

दरम्यान, भीम आर्मीला महाराष्ट्रात 2 जानेवारीपर्यंत सभा घेण्यास पोलिसांनी मज्जाव केला आहे. याशिवाय कार्यकर्त्यांनाही जवळच्या पोलीस ठाण्यात हजेरी लावणं बंधनकारक करण्यात आलं आहे. याशिवाय कोरेगाव भीमा येथे 2 तारखेपर्यंत जाण्यासही भीम आर्मीच्या कार्यकर्त्यांना मज्जाव करण्यात आला आहे. सध्या ज्या कार्यकर्त्यांना पोलिसांनी ताब्यात घेतलं होतं त्यांना बॉन्डवर सोडून देण्यात आलं आहे.

चंद्रशेखर आझाद यांची 29 डिसेंबरला वरळीच्या जांबोरी मैदानात सभा होणार होती. वरळी पोलिसांनी त्यांना परवानगी नाकारली होती. तसेच पोलिसांनी आपल्याला रुममध्ये बंद करून ठेवले आहे, अशा आशयाचा चंद्रशेखर आझाद यांचा व्हिडीओ व्हायरल झाला होता. येणाऱ्या निवडणुकीत मोदी सरकारला हे महागात पडेल. मोदी सरकारने हे युद्ध सुरु केले असून याचा अंत भीम आर्मी करणार, असा इशाराही आझाद यांनी या व्हिडीओत दिला होता.

आझाद पहिल्यांदाच महाराष्ट्राच्या दौऱ्यावर आले होते. त्यांच्या राज्यात विविध ठिकाणी पाच सभा नियोजित होत्या. त्यातील पहिली सभा 29 डिसेंबर रोजी वरळीच्या जांबोरी मैदानात संध्याकाळी 4 वाजता होणार होती. त्यानंतर 30 डिसेंबरला पुण्यात सभा, 31 डिसेंबरला सावित्रीबाई फुले पुणे विद्यापीठात व्याख्यान, 1 जानेवारीला भीमा कोरेगाव येथील विजयस्तंभावर हेलिकॉप्टरमधून पुष्पवृष्टी, 2 जानेवारीला लातूर येथे सभा त्यानंतर 4 जानेवारीला अमरावती येथे जाहीर सभा असा नियोजित कार्यक्रम होता.