आमदार रमेश कदम यांना हायकोर्टाकडून तात्पुरता जामीन मंजूर, अपक्ष निवडणूक लढवण्याच्या तयारीत

अण्णाभाऊ साठे महामंडळाच्या अध्यक्षपदी असताना बोगस लाभार्थी दाखवून रमेश कदमांनी शेकडो कोटींचा घोटाळा केल्याचा त्यांच्यावर आरोप आहे. या प्रकरणी रमेश कदमांसह एकूण 12 जणांना अटक झाली. याच घोटाळ्यावरून राष्ट्रवादी काँग्रेसने त्यांना पक्षातून निलंबित केलं.

मुंबई : आमदार रमेश कदम यांना अखेर मुंबई उच्च न्यायालयाने तात्पुरता जामीन मंजूर केला आहे. विधानसभा निवडणुकीतील उमेदवारी अर्ज भरण्यासाठी 3 ते 6 ऑक्टोबरपर्यंत त्यांना हा जामीन मंजूर करण्यात आला आहे. आगामी विधानसभा निवडणुकीत मोहोळ मतदारसंघातून अपक्ष लढण्याची तयार करणाऱ्या रमेश कदमांना त्यामुळे मोठा दिलासा मिळाला आहे. 2015 मध्ये आर्थिक घोटाळ्याच्या प्रकरणात अटक झाल्यापासून रमेश कदम जेलमध्ये आहेत. मात्र दरम्यानच्या काळात कदम हे सतत निरनिराळ्या वादांमुळे चर्चेत राहिले. राष्ट्रवादी काँग्रेसचे बडतर्फ आमदार रमेश कदम यांना ईडी कोर्टाकडून याआधीच जामीन मंजूर करण्यात आला आहे. मात्र त्यांच्याविरोधात राज्य सीआयडीने दाखल केलेलं प्रकरण प्रलंबित असल्याने कदम जेलमध्येच होते. त्यासाठी यांनी उच्च न्यायालयात जामीनासाठी याचिका दाखल केली होती. लोकशाहीर अण्णाभाऊ साठे महामंडळ घोटाळ्यात रमेश कदम हे मुख्य आरोपी आहेत. अण्णाभाऊ साठे महामंडळाच्या अध्यक्षपदी असताना बोगस लाभार्थी दाखवून रमेश कदमांनी शेकडो कोटींचा घोटाळा केल्याचा त्यांच्यावर आरोप आहे. या प्रकरणी रमेश कदमांसह एकूण 12 जणांना अटक झाली. याच घोटाळ्यावरून राष्ट्रवादी काँग्रेसने त्यांना पक्षातून निलंबित केलं. डिसेंबर 2018 मध्ये कारागृहातील असभ्य वर्तन आणि संबंधित खटल्यातील साक्षीदारांचं संरक्षण या मुद्यांवर मुंबई उच्च न्यायालयाने रमेश कदम यांचा जामीन अर्ज फेटाळून लावला होता. मात्र या प्रकरणी पोलीस तपासात जाणूनबुजून दिरंगाई करत असल्याचा आरोप कदमांच्यावतीने करण्यात आला. VIDEO | काय आहे अण्णाभाऊ साठे महामंडळाचा महाघोटाळा? दरम्याच्या काळात अनेक कारणाने रमेश कदम सतत चर्चेत राहिले. एका व्हिडीओ क्लीपमध्ये कदम आर्थर रोड जेलमध्ये कर्तव्य बजावणाऱ्या पोलिसांना शिवीगाळ करत असल्याचं दिसलं होतं, त्यासंदर्भात रमेश कदम यांच्याविरोधात नागपाडा पोलीस स्टेशनमध्ये गुन्ह्यांची नोंद करण्यात आली आहे. मात्र पोलिसांनीच मला जातीवाचक शिवीगाळ केली आणि 25 हजारांची लाच मागितली असा त्यांचा दावा होता. तसेच भायखळा जेलमध्ये असताना मंजुळा शेट्ये प्रकरणातही रमेश कदम यांनी पोलिसांवर आरोप केले होते. याशिवाय पोलीस बंदोबस्तात विधानभवनात आलेल्या कदमांनी जाहीरपणे भाजपला पाठिंबा देत असल्याचं सांगितलं होतं. संबंधित बातम्या

• आमदार रमेश कदमांची मुजोरी कायम, पुन्हा पोलिसाला शिवीगाळ
• ठाणे जेलमध्ये कैद्याला मारहाण करुन विष्ठा खायला लावली : रमेश कदम
• बेशिस्त रमेश कदमवर जेलमध्ये कारवाई का नाही? : हायकोर्ट
• अण्णाभाऊ साठे आर्थिक महामंडळ घोटाळा : आतापर्यंत 250 कोटींची मालमत्ता जप्त
• बीडमध्ये आरोपी रमेश कदमांची खास बडदास्त