मुख्यमंत्री ठाकरेंसह दिग्गज नेत्यांचे बंगले BMCकडून डिफॉल्टर घोषित!, लाखोंची पाणीपट्टी थकली
मुख्यमंत्री उद्धव ठाकरेंच्या वर्षा बंगला मुंबई महानगरपालिकेकडून डिफॉल्टर घोषित करण्यात आला आहे.मुख्यमंत्र्यांसोबत अन्य मंत्र्यांच्या बंगल्यांवर पाण्याची 24 लाख 56 हजार 469 रुपयांची थकबाकी असल्याची माहिती आहे.
मुंबई : सामान्य मुंबईकरांनी जर दोन ते तीन महिन्यापेक्षा जास्त पाण्याची थकबाकी ठेवली तर बृहन्मुंबई महानगरपालिका नळ कनेक्शन काढून टाकते. परंतु महानगरपालिका मुख्यमंत्री व इतर मंत्र्यांच्या शासकीय बंगल्यांवर मात्र महेरबान आहे. मुख्यमंत्री आणि अन्य मंत्र्यांच्या शासकीय बंगल्यांवर पाण्याची एकूण 24 लाख 56 हजार 469 रुपयांची थकबाकी आहे. तसेच सदर बंगल्यांना पालिकेने डिफॉल्टर यादीत टाकले आहे.
आरटीआय कार्यकर्ते शकील अहमद शेख यांनी मुंबई महानगरपालिकेचे संकेतस्थळवर पाण्याच्या थकबाकीदारांची माहिती गोळा केली आहे. यामाहितीत मुख्यमंत्री व इतर मंत्र्यांच्या शासकीय बंगल्यांवर पाण्याच्या एकूण 24 लाख 56 हजार 469 थकबाकी आहे. त्यामध्ये राज्याचे मुख्यमंत्री उद्धव ठाकरे (वर्षा बंगला), वित्तमंत्री अजित पवार (देवगिरी), जयंत पाटील (सेवासदन), नितीन राऊत, उर्जा मंत्री (पर्णकुटी), बाळासाहेब थोरात, महसूलमंत्री (रॉयलस्टोन), विरोधी पक्ष नेते देवेंद्र फडणवीस (सागर), अशोक चव्हाण (मेघदूत), सुभाष देसाई, उद्योगमंत्री (पुरातन), दिलीप वळसे पाटील (शिवगिरी), सार्वजनिक बांधकाम(सार्वजनिक उपक्रम) मंत्री एकनाथ शिंदे (नंदनवन), राजेश टोपे (जेतवन), नाना पटोले, विधानसभा अध्यक्ष (चित्रकुट), राजेंद्र शिंगणे (सातपुडा), नवाब मलिक (मुक्तागीरी), छगन भुजबळ (रामटेक), रामराजे नाईक निंबाळकर विधानभवन सभापती (अजिंठा) आणि सह्याद्री अतिथीगृह याचा समावेश आहे.
कोणत्या मंत्र्यांच्या बंगल्यावर किती थकबाकी? उद्धव ठाकरे, मुख्यमंत्री, वर्षा - एकूण थकबाकी 13275/- अजित पवार, वित्तमंत्री, देवगिरी- एकूण थकबाकी 84224/- जयंत पाटील, सेवासदन- एकूण थकबाकी 115288/- नितीन राउत, उर्जा मंत्री, पर्णकुटी- एकूण थकबाकी 115288/- बाळासाहेब थोरात, महसूलमंत्री, रॉयलस्टोन- एकूण थकबाकी 12809/- अशोक चव्हाण, मेघदूत - एकूण थकबाकी 111005/- सुभाष देसाई, उद्योगमंत्री, पुरातन - एकूण थकबाकी 50120/- दिलीप वळसे पाटील , शिवगिरी - एकूण थकबाकी 5756/- एकनाथ शिंदे, सार्वजनिक बांधकाम, नंदनवन- एकूण थकबाकी 119524/- राजेश टोपे, जेतवन- एकूण थकबाकी 6703/- नाना पाटोले, विधानसभा अध्यक्ष, चित्रकुट - एकूण थकबाकी 83514/- राजेंद्र शिंगणे, सातपुडा - एकूण थकबाकी 23746/- नवाब मलिक, मुक्तागिरी- एकूण थकबाकी 30102/- छगनर भुजबळ, रामटेक- एकूण थकबाकी 39939/- रामराजे निंबाळकर विधानपरिषद सभापती, अजंथा- एकूण थकबाकी 128797/- देवेंद्र फडणवीस, विरोधीपक्षनेते, सागर, एकूण थकबाकी 111550/- सह्याद्री अतिथीगृह, एकूण थकबाकी 640523/-
आरटीआय कार्यकर्ते शकील अहमद शेख यांच्या मते जर शासकीय विभाग पाण्याची थकबाकी वेळेवर भरत नसेल तर सामन्य जनतेने का भरावे ? तसेच महानगरपालिका आयुक्त इकबाल सिंह चहल मंत्र्यांच्या शासकीय आवासाचे पाणी खंडित करण्याची हिम्मत करणार का? असा प्रश्न शकील अहमद शेख यांनी विचारला आहे.
महत्त्वाच्या बातम्या
