Indu Mill मधील बाबासाहेबांंच्या स्मारकाचं काम कधी पूर्ण होणार? सामाजिक न्यायमंत्री धनंजय मुंडे म्हणाले....
राज्याचे सामाजिक न्यायमंत्री धनंजय मुंडे यांनी आज इंदू मिलमधील डॉ. बाबासाहेब आंबेडकर स्मारकाच्या कामाची पाहणी केली आणि हे काम कधीपर्यंत पूर्ण होईल याची माहिती दिली.
मुंबई : राज्याचे सामाजिक न्यायमंत्री धनंजय मुंडे यांच्यासह इतर मंत्र्यांनी आज मुंबईतील दादर परिसरामधील इंदू मिल इथल्या डॉ बाबासाहेब आंबेडकर स्मारकाच्या कामाची पाहणी केली. 2023 अखेरपर्यंत किंवा 2024 सुरुवातीपर्यंत डॉ. बाबासाहेब आंबेडकर स्मारकाचं काम पूर्ण करण्याचे प्रयत्न करु, असं धनंजय मुंडे यांनी सांगितलं.
स्मारकाची पाहणी केल्यानंतर धनंजय मुंडे म्हणाले की, 2016 साली जेव्हा हा प्रकल्प हाती घेण्याचं ठरवलं तेव्हा याची किंमत सहाशे कोटी रुपये होती. मागील दोन वर्षात महाविकास आघाडीच्या सरकारने पुढे येऊन हे काम केलेलं आहे. आतापर्यंत 245 कोटी रुपये या प्रकल्पावर खर्च झाले आहेत. जवळपास अडीचशे कोटी रुपयांचा निधी या वर्षी आपण या प्रकल्पासाठी ठेवला आहे. या प्रकल्पासाठी यंदा 300 कोटी रुपये खर्च झाला त्या निधीची तरतूद सामाजिक न्याय विभागाकडून करण्यात आली आहे
इंदू मिलमधील डॉ. बाबासाहेब आंबेडकर यांच्या आंतरराष्ट्रीय स्मारकची वाट संपूर्ण देश पाहत आहे. 2023 अखेरीस किंवा 2024 च्या सुरुवातीला स्मारकाचं काम पूर्ण होऊन त्याचं लोकार्पण होईल अशा पद्धतीने आम्ही जलद गतीने काम सुरु ठेवलं आहे. ज्या पिलरवर स्मारक होणार आहे त्याचं 75 फुटापर्यंत काम पूर्ण झालं आहे. आणखी पंचवीस फुटाचं काम बाकी आहे. स्मारकापर्यंत जाण्यासाठी किती प्रदक्षिणा घालायची आहे त्याच्या स्ट्रक्चरचं काम बाकी आहे, असं धनंजय मुंडे म्हणाले.
एक हजार लोकांची क्षमता असलेल्या वातानुकूलित ऑडिटोरियमचं काम सुद्धा सुरु आहे. स्मारकाच्या खाली पार्किंगचं काम देखील सुरु आहे. किती टक्के काम पूर्ण झालं हे आताच सांगता येणार नाही. पैशांची कुठलीही अडचण या कामासाठी होणार नाहीत, असंही धनंजय मुंडे यांनी स्पष्ट केलं.
प्रकल्पात अंतर्भूत असलेल्या बांधकामाची वैशिष्ट्ये
- प्रवेशद्वार इमारतीमध्ये माहिती सेंटर, तिकीट घर, लॉकअप रुम, प्रसाधनगृह, सुरक्षा गृह, स्मरणिका कक्ष, उपग्रह व नियंत्रण कक्ष त्यासोबतच इतर बाबींचा समावेश
- स्मारकाची उंची 450 फूट (पदपीठ उंची 100 फूट, वरील पुतळ्याची उंची 350 फूट)
- प्रेक्षागृह आसनक्षमता 1000
- संशोधन केंद्र, व्याख्यान वर्ग व ग्रंथालय
- ध्यान केंद्र
- तळघर वाहनतळ (पार्किंग क्षमता 460 वाहने)
महत्त्वाच्या बातम्या
