Mucormycosis : प्रशासनाने आता म्युकरमायकोसिसवर लक्ष केंद्रीत करावं : हायकोर्ट
राज्यात आता रेमडेसिवर, ऑक्सिजन तुटवडा हे समस्येचे मुद्दे उरलेले नाहीत, त्यामुळे प्रशासनाने आता काळ्या बुरशीवर लक्ष केंद्रीत करावं, असं मत हायकोर्टाने व्यक्त केलं. म्युकरमायकोसिस राज्यात भयानकरित्या पसरत असल्याचा दावा याचिकाकर्त्यांनी केला आहे. 8 जूनच्या सुनावणीत राज्य आणि केंद्र सरकारला सविस्तर उत्तर देण्याचे निर्देश मुंबई उच्च न्यायालयाने दिले आहेत.
मुंबई : राज्यात सध्या रेमडेसिविर, ऑक्सिजन पुरवठा, रुग्णालयातील खांटांची उपलब्धता हे आता समस्येचे मुद्दे उरलेले नाहीत. त्यामुळे आता आपण म्युकरमायकोसिस आणि त्याच्याशी संबंधित मुद्यांवर लक्ष द्यायला हवं, असं मत बुधवारी (2 जून) मुंबई उच्च न्यायालयाने व्यक्त केलं आहे. 8 जूनच्या पुढील सुनावणीत राज्य आणि केंद्र सरकारला म्युकरमायकोसिसच्या मुद्यावर सविस्तर माहिती देण्याचे निर्देश मुंबई उच्च न्यायालयाने दिले आहेत. मुंबईसह राज्यातील रुग्णालयांत खाटांची कमतरता, रेमडेसिवीरचा तुटवडा, ऑक्सिजनचा अपुरा साठा या समस्यांवर बोट ठेवत स्नेहा मरजादी यांनी अॅड. अर्शिल शहा यांच्यामार्फत हायकोर्टात जनहित याचिका दाखल केली आहे. बुधवारी मुख्य न्यायमूर्ती दीपांकर दत्ता आणि न्यायमूर्ती गिरीश कुलकर्णी यांच्या खंडपीठासमोर व्हिसीमार्फत यावर सुनावणी पार पडली.
काळ्या बुरशीचा रोग भयानकरित्या राज्यात पसरतोय, अशी माहिती याचिकाकर्त्यांनी हायकोर्टात दिली. एकट्या अहमदनगर जिल्ह्यामध्ये गेल्या तीन दिवसांत 9928 नव्या म्युकरमायकोसिस रुग्णांची नोंद झाल्याच्या बातम्या आहेत. तसेच मे महिन्यात राज्यभरात लहान मुलांनाही मोठ्या म्युकरमायकोसिसची लागण झाल्याच्या बातम्या प्रसिद्ध झाल्याचं त्यांनी हायकोर्टाच्या निर्दशनास आणून दिलं. त्यामुळे टास्कफोर्स बनवण्याव्यतिरिक्त राज्य सरकार काय करतंय?, असा सवाल याचिकाकर्त्यांनी हायकोर्टात उपस्थित केला. म्युकरमायकोसिसवर दिवसाला औषधांचे सहा डोस देणं गरजेचं असताना पुण्यात रुग्णांना केवळ एकच डोस मिळत आहे, असा आरोपही यावेळी याचिकाकर्त्यांनी केला.
यावर उत्तर देताना राज्य सरकारतर्फे महाधिवक्ता आशुतोष कुंभकोणी यांनी हायकोर्टाला सांगितलं की, "आम्ही यासंदर्भात प्रतिज्ञापत्र सादर केलं आहे. देशपातळीवर सध्या यावरील औषधाचा मोठा तुटवडा आहे. केंद्र सरकार आणि राज्य सरकार दोघांनीही यावरीलऔषध 'अँपोटोरेसिन -बी' चं उत्पादन वाढवण्यासाठी प्रयत्न सुरु केले आहेत. मात्र सध्या आम्ही कोर्टाने कोरोनासंदर्भात दिलेल्या निर्देशांची पूर्तता करत आहोत. त्यामुळे पुढील सुनावणीत आम्ही यावर उत्तर देऊ शकतो." या सुनावणी दरम्यान परदेशात म्युकरमायकोसिसची काय अवस्था आहे?, तिथे भारतापेक्षाही अधिक कोरोना केसेस आहेत का?, असा सवाल हायकोर्टाने उपस्थित केला. यावर हा रोग साथीच्या रोगाप्रमाणे पसरणारा नाही, काही विशिष्ट वैद्यकीय समस्या असलेल्यांनाच तो होतो असं केंद्र सरकारच्यावतीने एएसजी अनिल सिंह यांनी स्पष्ट केलं.
महत्त्वाच्या बातम्या
