दिवा रुळ प्रकरण: दोन हजाराच्या पैजेसाठी आरोपींनी रुळ ट्रॅकवर टाकला

ठाणे: दिवा रेल्वे स्थानकाजवळ संशयास्पद अवस्थेत आढळलेल्या रुळ फक्त दोन हजारांच्या पैजेसाठी ठेवल्याची कबुली अटकेत असलेल्या पाच आरोपींनी पोलिसांना दिली. आज ठाण्यात झालेल्या पत्रकार परिषदेत पोलीस आयुक्त परमबीर सिंह यांनी ही माहिती दिली. काल (गुरुवारी) पाचही आरोपींना अटक करण्यात आली होती. त्यानंतर पोलिसांनी त्यांची कसून चौकशीही केली. चौकशीदरम्यान घडलेल्या प्रकरणात सहभाग असल्याचं पाचही आरोपींनी कबूल केलं. यामध्ये मुब्र्यातील मौला मकानदार हा मुख्य आरोपी असल्याचीही माहिती मिळते आहे. हे पाचही आरोपी गर्दुल्ले असल्याचीही माहिती मिळते आहे. दानिश अकबर शेख, सूरज दिनेश भोसले, मोहब्बत नसीम शेख, नजीर सय्यद आणि जयेश पारे अशी अटक करण्यात आलेल्या 5 आरोपींची नावं आहेत. या आरोपींकडून इतरही गाड्या पंक्चर करण्याचं सामान ताब्यात घेण्यात आलं आहे. दिवा रेल्वे स्थानकाजवळ कोकण रेल्वे मार्गावर 25 जानेवारीला 15 फुटी रुळाचा तुकडा ठेवण्यात आला होता. मडगाव-दादर जनशताब्दी एक्स्प्रेसच्या लोको पायलटच्या प्रसंगावधानामुळे त्यावेळी मोठा अपघात टळला होता. काय आहे प्रकरण ? 25 जानेवारी रोजी दिव्यात मडगाव-दादर जनशताब्दी एक्स्प्रेसचा मोठा अपघात टळला होता. गाडीच्या लोको पायलटने ट्रॅकवर 15 फुटी जुना रुळ ठेवल्याचं पाहिलं आणि तात्काळ गाडी थांबवली. स्थानिकांच्या मदतीने रुळ बाजूला करण्यात आला आणि गाडी पुढे काढली. मागच्या तीन महिन्यात देशात रेल्वेचे 3 मोठे अपघात घडले, ज्यामध्ये अनेकांना आपला जीव गमावावा लागला आहे. काही महिन्यांपूर्वी ओडिशाच्या सीमेजवळ असलेल्या आंध्र प्रदेशमधील कुनेरु स्टेशनजवळ जगदलपूर-भुवनेश्वर एक्सप्रेसचे 8 डबे रुळावरुन घसरले होते. या रेल्वे अपघातात 39 पेक्षा अधिक प्रवाशांचा मृत्यू झाला होता. त्यानंतर रेल्वे अधिकाऱ्यांनी घातपाताचा संशय व्यक्त केला होता. कानपूरमध्येही नोव्हेंबरमध्ये झालेल्या रेल्वे दुर्घटनेमागे पाकिस्तानी गुप्तचर यंत्रणा आयएसआयचा हात असल्याची शक्यता वर्तवली जात आहे. बिहार पोलिसांनी तीन जणांना अटकही केली होती. कानपूरसारखीच दुर्घटना रक्सौल-दरभंगा रेल्वे मार्गावर घडवल्याचा संशय या तिघांवर आहे. कानपूर अपघातातही त्यांचा हात असल्याची शक्यता वर्तवण्यात आली होती. इंदूर-पटना एक्स्प्रेसचा 20 नोव्हेंबर 2016 रोजी कानपूरच्या पुखराया स्टेशनजवळ भीषण अपघात झाला होता. ज्यामध्ये 150 प्रवाशांचा मृत्यू झाला होता. संबंधित बातम्या: दिवा रुळ घातपात प्रकरणी पाच जण ताब्यात, मुंब्रा पोलिसांची कामगिरी

उभ्या रेल्वे ट्रॅकवर आडवा ट्रॅक, मुंबईत जनशताब्दी पाडण्याचा प्रयत्न?

हिराखंड एक्स्प्रेसचे 8 डबे घसरुन 39 प्रवाशांचा मृत्यू पाटणा-इंदूर एक्स्प्रेसचे 14 डबे घसरले, 63 प्रवाशांचा मृत्यू ‘डबे घसरले नि डोळ्यादेखत त्या चिमुरडीच्या शरीराचे दोन तुकडे’ जखमेवर मीठ, कानपूर ट्रेन दुर्घटनेतील जखमींना जुन्या नोटा वाटप