यवतमाळची नरभक्षक शोधपथकाच्या कॅमेऱ्यामध्ये कैद

महाराजबाग प्राणी संग्रहालयातील वाघिणीचे मूत्र संकलीत करुन यवतमाळच्या जंगलामध्ये स्प्रेद्वारे फवारण्यात आले होते. मूत्राच्या उग्र गंधाचा पाठलाग करत ही वाघीण आज पहिल्यांदा झुडपाबाहेर आली.

यवतामाळ : यवतमाळमधील नरभक्षक टी वन वाघीण अखेर दृष्टीक्षेपात आली आहे. त्यामुळे दुसऱ्या वाघिणीच्या मूत्राचा वापर करुन टी वन वाघिणीला आकर्षित करण्याचा प्रयोग यशस्वी झाल्याचं दिसत आहे. कारण आज ही वाघीण पहिल्यांदाच शोधपथकाच्या कॅमेऱ्यामध्ये कैद झाली आहे.

अनेक प्रयत्नानंतरही वाघीण काही सापडली नव्हती. त्यामुळे महाराजबाग प्राणी संग्रहालयातील वाघिणीचे मूत्र संकलीत करुन यवतमाळच्या जंगलामध्ये स्प्रेद्वारे फवारण्यात आलं होतं. त्या मूत्राच्या उग्र गंधाचा पाठलाग करत ही वाघीण आज पहिल्यांदा झुडपाबाहेर आली.

झुडपाबाहेर आलेल्या वाघिणीला शोधपथकाच्या कॅमेऱ्याने तिला टिपलं. त्यामुळे लवकरच या वाघिणीला बेशुद्ध करण्याची प्रक्रिया सुरु होण्याची आशा निर्माण झाली आहे.

गेल्या अनेक दिवसांपासून नरभक्षक वाघिणीच्या शोधासाठी वन विभागाचे प्रयत्न सुरु आहेत. वाघिणीला तिच्या बछड्यांसह जेरबंद करण्यासाठी मध्य प्रदेशच्या कान्हा जंगलातील चार हत्ती आणि चंद्रपूरच्या ताडोबामधून एक हत्ती यवतमाळमध्ये आणण्यात आले होते. मात्र हत्तींच्या चमूची वाघिणीला जेरबंद न करताच घरवापसी करावी लागली होती. कारण, साखळी तोडून पळालेल्या एका हत्तीने एका महिलेचा जीव घेतला होता, तर एका पुरुषाला जखमी केलं होतं.

याशिवाय वाघीण रात्री कुठल्या भागात फिरते, याचा शोध घेण्यासाठी थर्मल ड्रोन वन विभागाने बोलावले असून त्याद्वारे वाघिणीचा शोध घेतला जात आहे.

यवतमाळ जिल्ह्यात टी वन वाघिणीची मोठी दहशत आहे. मागील 2 वर्षात या वाघिणीने 13 शेतकरी, शेतमजूर आणि गुरख्याची शिकार करणाऱ्या वाघिणीने 100 पेक्षा जास्त जनावरांचा फडशा पाडला आहे. त्यामुळे या भागातील ग्रामस्थ, शेतकरी वाघिणीच्या भीतीत जगत आहे.

या नरभक्षक टी वन वाघिणीने शेवटचा बळी ऑगस्ट अखेर घेतला होता. त्यानंतर सप्टेंबर महिन्यात सुप्रीम कोर्टाचा आदेश आला. जेरबंद करण्याचे पूर्ण करुनही शक्य नाहीच झालं, तरच ठार मारण्याच्या पद्धतीचा वन खात्याचा निर्णय सुप्रीम कोर्टानेही उचलून धरला.