Uddhav Thackeray : 26 नोव्हेंबरला उद्धव ठाकरे घेणार शेतकरी मेळावा, बुलढाण्यातील चिखलीत होणार एल्गार, शिंदे सरकारला घेरणार

येत्या 26 नोव्हेंबरला उद्धव ठाकरे बुलढाण्यातील चिखलीत शेतकरी मेळावा घेणार आहेत. शेतकऱ्यांच्या प्रश्नावरुन ठाकरे शिंदे सरकारला घेरण्याची शक्यता वर्तवली जात आहे.

Uddhav Thackeray

Uddhav Thackeray : शिवसेनेतल्या (Shivsena) फुटीनंतर माजी मुख्यमंत्री उद्धव ठाकरे (Uddhav Thackeray) आता पक्षबांधणीसह आगामी निवडणुकीच्या (Election) दृष्टीनं कामाला लागले आहेत. निवडणुकांच्या पार्श्वभूमीवर कालपासून (31 ऑक्टोबर) मातोश्रीवर मॅरेथॉन बैठकांना ठाकरेंनी सुरुवात केली आहे. यात आजी माजी खासदारांसह स्थानिक जिल्हाप्रमुख पदाधिकाऱ्यांचा समावेश होता. दरम्यान, या बैठकीत महत्त्वाचा निर्णय घेण्यात आला आहे. येत्या 26 नोव्हेंबरला उद्धव ठाकरे बुलढाण्यातील चिखलीत शेतकरी मेळावा घेणार आहेत. शेतकऱ्यांच्या प्रश्नावरुन ठाकरे शिंदे सरकारला घेरण्याची शक्यता वर्तवली जात आहे.
 
शेतकऱ्यांच्या विविध प्रश्नावरुन उद्धव ठाकरे शिंदे सरकारला घेरण्याची शक्यता आहे. विधानसभा अधिवेशनाच्या आधी उद्धव ठाकरेंचा होणारा हा मेळावा महत्त्वाचा मानला जात आहे. दरम्यान, आगामी निवडणुकांच्या पार्श्वभूमीवर 31 ऑक्टोबरपासून 14 नोव्हेंबरपर्यंत मातोश्री निवासस्थानी बैठकांचं सत्र पार पडणार आहे. आगामी स्थानिक स्वराज्य संस्थांच्या निवडणुकांसाठीचा स्थानिक पातळीवरील परिस्थितीचा बैठकीत आढावा घेतला जाणार आहे. आगामी काळातील मित्र पक्षांसोबतच्या युतीबाबत या बैठकांनंतर निर्णय घेण्यात येणार असल्याची माहिती सूत्रांनी दिली आहे.

ओला दुष्काळ जाहीर करण्याची शेतकऱ्यांची मागणी

सध्या राज्यातील शेतकरी संकटात सापडला आहे. कारण सुरुवातीला जून महिन्यात  पावसानं दडी मारली होती. मात्र, त्यानंतर जुलै आणि ऑगस्ट महिन्यात राज्यात मोठ्या प्रमाणावर पावसानं हजेरी लावली होती. या पावसात शेतकऱ्यांच्या पिकांचं मोठं नुकसान झालं होतं. यातूनही काही शेतकऱ्यांनी त्यांची पिकं वाचवली होती. मात्र, त्यानंतर ऑक्टोबर महिन्यात झालेल्या परतीच्या पावसानं शेतकऱ्यांच्या हाती आलेलं पीक हिरावून घेतलं आहे. त्यामुळ शेतकरी मोठ्या संकटात सापडले आहेत. त्यामुळं ओला दुष्काळ जाहीर करावा अशी मागणी शेतकऱ्यांनी केली आहे.

नुकसानग्रस्त शेतकऱ्यांना हेक्टरी पन्नास हजार रुपयांची मदत करण्याची मागणी

दरम्यान, नुकताच 23 ऑक्टोबरला उद्धव ठाकरे यांनी औरंगाबाद जिल्ह्याचा दौरा केला होता. या दौऱ्यात त्यांनी नुकसानग्रस्त भागाची पाहणी केली होती. यावेळी त्यांनी गंगापूरच्या दहेगावातील शेतकऱ्यांची भेट घेतली. तसेच झालेल्या नुकसानीची माहिती यावेळी जाणून घेतली होती. तर याचवेळी त्यांनी नुकसानग्रस्त शेतकऱ्यांना हेक्टरी पन्नास हजार रुपयांची मदत करण्याची मागणी केली होती. तर गरज पडल्यास शेतकऱ्यांसाठी मी स्वतःरस्त्यावर उतरेल असेही उद्धव ठाकरे यांनी सांगितले होते.

औरंगाबाद जिल्ह्याच्या दौऱ्यात उद्धव ठाकरेंनी राज्य सरकारवर जोरदार टीका केली होती. सरकार  घोषणाची अतिवृतिष्टी करत आहे. या सरकारमध्ये भावनांचा दुष्काळ आहे. हे ऊत्सव मग्न सरकार आहे. उत्सव साजरे करा पण आपली प्रजाही सुखी, समाधानी आहे का? हे देखील पहिले पाहिजे. हे सरकार बेदकरपने सांगत की, ओला दुष्काळ जाहीर करण्याची स्थिती नाही. त्यामुळं आता मंत्र्यांना चिखलात बुडवलं पाहिजे का? असा प्रश्न देखील उद्धव ठाकरेंनी उपस्थित केला होता.

महत्त्वाच्या बातम्या: