आजही ठाकरे सरकारचं खातेवाटप नाही? मुख्यमंत्री उद्धव ठाकरे कार्यालयातून बाहेर पडले

Background

आज दिवसभरात या लाईव्ह ब्लॉगमध्ये देश-विदेशातील घडामोडींचा संक्षिप्त आढावा घेतला जातो. दिवसभर घडणाऱ्या घडामोडी, ब्रेक्रिंग न्यूज एकाच ठिकाणी, एकाच क्लिकवर वाचता येतात. राजकारणापासून मनोरंजनापर्यंत आणि टेक्नॉलॉजीपासून लाईफस्टाईलपर्यंत सर्व बातम्यांचे सुपरफास्ट अपडेट्स वाचकांना इथे मिळतील. त्यामुळे सुपरफास्ट अपडेट्स आणि दिवसभरातील ब्रेकिंग न्यूजसाठी लॉगऑन करा www.abpmajha.in

राज्यातील आणि देशभरातील महत्त्वाच्या बातम्यांचा आढावा

1. ठाकरे सरकारचं खातेवाटपाचा गुंता सुटला, आज खातेवाटप जाहीर होण्याची शक्यता, परिवहन आणि कृषी खातं शिवसेनेकडेच राहणार

2. जळगाव जिल्हा परिषदेवर पुन्हा भाजपचा झेंडा, खडसे-महाजनांचा जल्लोष, औरंगाबादेत कायदेशीर पेच, तर बीड जिल्हा परिषदेसाठी धनंजय मुंडेंकडून मोर्चेबांधणी सुरु

3. काँग्रेसच्या सेवादलाच्या पुस्तकात स्वातंत्र्यवीर सावरकरांबद्दल आक्षेपार्ह लिखाण, सावरकरांचे नातू आक्रमक, फडणवीस आणि पाटलांचा काँग्रेस, शिवसेनेवर हल्लाबोल

4. आमदारांच्या पगार आणि पेन्शनसाठी 5 वर्षात 500 कोटी रुपये खर्ची, एसटीच्या कर्मचाऱ्यांवर मात्र उपासमारीची वेळ, कोट्यधीश आमदारांना पेन्शन कशाला, सामान्यांना सवाल

5. कल्याण डोंबिवली महापालिकेत भाजपचा सेनेला धक्का, काँग्रेस-मनसेच्या मदतीनं स्थायी समितीचं सभापतीपद काबीज, शिवसेनेच्या एका नगरसेवकाची ऐनवेळी दांडी

6. प्रतिष्ठेच्या महाराष्ट्र केसरी कुस्ती बिगुल वाजलं, आमदार महेश लांडगेंच्या हस्ते स्पर्धेचं उद्धघाटन, पुण्यातल्या शिवछत्रपती क्रीडा संकुलात पैलवानांचा शड्डू

20:21 PM (IST)  •  04 Jan 2020

CAT-2019 परीक्षेचा निकाल IIM- कोझिकोडी इन्स्टिट्यूटकडून आज जाहीर, देशात 10 विद्यार्थी 100 पर्सेंटाइल मिळवून CAT परीक्षेचे टॉपर्स. राज्यात 4 विद्यार्थ्यांना100 पर्सेंटाइल मार्क्स. मुंबई आयआयटीत शिकत असलेला मूळ नागपूरचा असलेला सोमांश चोरडियाला 100 पर्सेंटाइल मार्क्स

20:39 PM (IST)  •  04 Jan 2020

उल्हासनगरमध्ये बांधकाम व्यावसायिक बाळा श्रीखंडे यांची काही बांधकामं सुरू आहेत. मात्र खटवानी हा वारंवार त्यांच्या बांधकामाची तक्रार करत होता. त्यामुळे श्रीखंडे यांनी त्याच्याशी संपर्क साधत कारण विचारलं असता त्याने आपल्याला महिना १ लाख रुपये खंडणी देण्याची मागणी केली. तडजोडीनंतर ही रक्कम ४० हजार रुपये ठरली. दरम्यानच्या काळात श्रीखंडे यांनी ठाणे खंडणीविरोधी पथकाकडे तक्रार केल्यानंतर त्यांनी श्रीखंडे यांच्या कार्यालयात सापळा रचला आणि खटवानी याला ४० हजार रुपये घेताना रंगेहाथ अटक केली. हा सगळा प्रकार सीसीटीव्ही कॅमेरातही कैद झाला. या प्रकारामुळे उल्हासनगरमध्ये चालणारा ब्लॅकमेलिंगचा धंदा पुन्हा एकदा समोर आलाय.

18:46 PM (IST)  •  04 Jan 2020

माझी भूमिका मी शिवसेना पक्षप्रमुख उद्धव ठाकरे यांच्यासमोर मांडेन, आत्ता काहीही बोलणार नाही, माझा संपूर्ण कंट्रोल केवळ मातोश्रीवर आहे : अब्दुल सत्तार

17:52 PM (IST)  •  04 Jan 2020

सोन्याच्या दरात विक्रमी वाढ, सोन्याचा दर तब्बल साडे चाळीस हजारांवर : - अमेरिका आणि इराणमधील संघर्षाचा परिणाम भारतावर होऊ लागला आहे. दोन देशांमधील संघर्षामुळे डॉलरच्या तुलनेत रुपया घसरला आहे. त्यामुळे सोन्याच्या दरांतही मोठी वाढ होऊ लागली आहे. आज जळगावच्या सुवर्ण नगरीत सोन्याचे दर 40 हजार 500 रुपये इतक्या विक्रमी पातळीवर पोहोचला आहे. सोन्याचे दर येत्या काही दिवसात आणखी वाढण्याची शक्यता आहे

15:18 PM (IST)  •  04 Jan 2020

औरंगाबाद जिल्हा परिषद अध्यक्षपदी महाविकास आघाडीचा झेंडा, काँग्रेसच्या मीना शेळके यांची अध्यक्षपदी निवड...