सांगलीत दोन ट्रकच्या भीषण अपघातात तिघांचा मृत्यू

धडकेनंतर दोन्ही ट्रकनी अचानक पेट घेतल्याने तिघेजण होरपळून जागीच ठार झाले. तर एकजण गंभीर जखमी झाला आहे. खानापूर तालुक्याच्या चिखलहोळ गावच्या हद्दीत हा अपघात आज ( शनिवारी ) दुपारी एक वाजण्याच्या सुमारास घडला.

सांगली : बारामती - सांगली राज्यमार्गावर दोन मालवाहतूक ट्रकची समोरासमोर धडक होऊन भीषण अपघात घडला आहे. धडकेनंतर दोन्ही ट्रकनी अचानक पेट घेतल्याने तिघेजण होरपळून जागीच ठार झाले. तर एकजण गंभीर जखमी झाला आहे. खानापूर तालुक्याच्या चिखलहोळ गावच्या हद्दीत हा अपघात आज ( शनिवारी ) दुपारी एक वाजण्याच्या सुमारास घडला. अपघातानंतर सुमारे तीन तास बचाव कार्य सुरू होते. आग विझवण्यासाठी विटा आणि तासगावच्या अग्निशामक गाड्यांना पाचारण करण्यात आले. परंतु या अपघाताची भीषणता खूप होती. यातील एका ट्रकमध्ये खाऊच्या बिस्कीटांचा माल तर दुसर्‍या ट्रकमध्ये सिमेंट काँक्रीटचे मिश्रण होते. त्यामुळे आगीने रौद्ररुप धारण केल्याने बचावकार्यात अडथळे निर्माण होत होते. दोन्ही ट्रकची समोरासमोर धडक झाल्याने दोन्ही वाहने एकमेंकामध्ये अडकली होती. त्यामुळे जेसीबीच्या सहाय्याने दोन्ही ट्रक बाजूला करण्यात आले. तिन्ही मृतदेह पुर्णपणे जळालेले असल्याने ओळख पटू शकलेली नाही.