Mahaparinirvan Din: डॉ. बाबासाहेब आंबेडकर यांच्या महापरिनिर्वाण दिनानिमित्त दादरला येणाऱ्या अनुयायांसाठी विशेष सुविधा 

मागच्या वर्षीसारखंच यावर्षी देखील कोरोनाचं सावट आहे. त्यामुळे गर्दी न करता अनुयायांनी चैत्यभूमीवर महामानवाला अभिवादन करण्याचं आवाहन राज्य सरकार आणि मुंबई महापालिकेच्यावतीनं करण्यात आल आहे.

mahaparinirman day

मुंबई : उद्या म्हणजेच 6 डिसेंबर रोजी भारतरत्न डॉ. बाबासाहेब आंबेडकर (Dr. Babasaheb Ambedkar)यांचा महापरिनिर्वाण (Mahaparinirvan Din) दिन आहे. त्यामुळे दादरच्या चौत्यभूमी परिसरात मोठ्या प्रमाणात अनुयायी डॉ. बाबासाहेब आंबेडकरांना अभिवादन करण्यासाठी येत असतात. मात्र मागच्या वर्षीसारखंच यावर्षी देखील कोरोनाचं सावट आहे. त्यामुळे गर्दी न करता अनुयायांनी चैत्यभूमीवर महामानवाला अभिवादन करण्याचं आवाहन राज्य सरकार आणि मुंबई महापालिकेच्यावतीनं करण्यात आल आहे.

महापरिनिर्वाण दिनाच्या पार्श्वभूमीवर मुंबई महापालिकेकडून चौत्यभूमी परिसरात भव्य असा मंडप उभारण्यात येत आहे. यामध्ये आरोग्य सेवा पुरवण्यात येणार आहेत. सध्या ओमायक्रॉनचं संकट पुढे आले आहे. त्यामुळे विशेष खबरदारी घेतली जात आहे. त्यामुळेच लक्षणे दिसणाऱ्यांसाठी कोव्हिड चाचणीची सुविधा उपलब्ध करण्यात आली आहे. सोबतच नागरिकांना लसीकरण देखील करता येणार आहे. मास्क आणि इतर मेडिकल सेवा देखील महापालिकेकडून पुरवण्यात आल्या आहेत. सॅनिटायझेशनची सुविधा देखील पुरवली जाणार असून सोशल डिस्टन्सिंगची खबरदारी देखील घेण्यात येणार आहे.   

मुंबईत येणाऱ्या अनुयांसाठी रेल्वेकडून विशेष सुविधा
महापरिनिर्वाण दिनानिमित्त दादरमध्ये येणाऱ्या अनुयायांसाठी मध्य रेल्वेने (Central Railway) विशेष सुविधांचे नियोजन केले आहे. 5 आणि 6 डिसेंबरच्या मध्यरात्री छत्रपटी शिवाजी महाराज टर्मिनस-कल्याण आणि छत्रपती शिवाजी महाराज टर्मिनस-पनवेल स्थानकांदरम्यान मध्य रेल्वे प्रवासाठी आठ उपनगरीय विशेष गाड्या सर्व स्थानकांवर थांबणार आहेत. यामध्ये मुख्य लाइनवर अप विशेष कल्याण-छत्रपती शिवाजी महाराज टर्मिनस- विशेष कल्याण येथून रात्री एक वाजता सुटेल आणि छत्रपती शिवाजी महाराज टर्मिनस येथे रात्री अडीच वाजता पोहोचेल. त्यानंतर कल्याण-छत्रपती शिवाजी महाराज टर्मिनस विशेष कल्याण येथून रात्री 2.15 वाजता सुटेल आणि छत्रपती शिवाजी महाराज टर्मिनस येथे पहाटे 3.45 वाजता पोहोचेल. याबरोबरच मेन लाइनवर डाऊन विशेष छत्रपती शिवाजी महाराज टर्मिनस-कल्याण विशेष छत्रपती शिवाजी महाराज टर्मिनस येथून रात्री दीड वाजता सुटेल आणि कल्याण येथे रात्री तीन वाजता पोहोचेल. तर छत्रपती शिवाजी महाराज टर्मिनस-कल्याण विशेष ही गाडी सीएसटी वरून रात्री अडीच वाजता सुटेल आणि कल्याणला पहाटे चार वाजता पोहोचेल.  हार्बर लाइनवर अप विशेष पनवेल-छत्रपती शिवाजी महाराज टर्मिनस विशेष पनवेल येथून रात्री 1.15 वाजता सुटेल आणि छत्रपती शिवाजी महाराज टर्मिनस येथे रात्री 2.35 वाजता पोहोचेल. पनवेल- छत्रपती शिवाजी महाराज टर्मिनस विशेष पनवेल येथून रात्री 2.30 वाजता सुटेल आणि छत्रपती शिवाजी महाराज टर्मिनस येथे पहाटे 3.50 वाजता पोहोचेल.

हार्बर लाइनवर डाउन विशेष छत्रपती शिवाजी महाराज टर्मिनस- पनवेल विशेष छत्रपती शिवाजी महाराज टर्मिनस येथून रात्री 1.40 वाजता सुटेल आणि पनवेल येथे रात्री 3.00 वाजता पोहोचेल. छत्रपती शिवाजी महाराज टर्मिनस-पनवेल विशेष गाडी छत्रपती शिवाजी महाराज टर्मिनस येथून रात्री 2.40 वाजता सुटेल आणि पनवेल येथे पहाटे चार वाजता पोहोचणार आहे. 

डॉ. बाबासाहेब आंबेडकर यांच्या मुंबईतील अनुयायांना मुंबईच्या महापौर किशोरी पेडणेकर यांनी आवाहन केले आहे की, मुंबईतील अनुयायांनी डॉ. बाबासाहेब आंबेडकर यांना ऑनलाइन अभिवादन करावे. बाहेरून येणारे आनुयायी पाहता कोरोना नियमांचे पालन करावे. फार गर्दी होणार नाही याची दक्षता घ्यावी. कोरोनाचा नवा विषाणू ओमायक्रोनचेही संकट समोर आहे. ऑनलाइन अभिवादन दिवसभर सुरू राहणार आहे. महानगरपालिका सज्ज आहे, असे महापौर म्हणाल्या.

इतर महत्वाच्या बातम्या