Akshar Sammelan 2022 : अक्षरांच्या उत्सवात मराठी कलाकारांची अनोखी मेजवानी; पंढरीत राज्यस्तरीय अक्षर संमेलन
Pandharpur Solapur Akshar Sammelan 2022 : अक्षरांच्या उत्सवात मराठी कलाकारांची अनोखी मेजवानी. पंढरपुरात भरलंय राज्यस्तरीय अक्षर संमेलन.
Pandharpur Solapur Akshar Sammelan 2022 : मराठी माती ही तशी विविध प्रकारच्या कलाकारांची खाणंच आहे आणि यांच्या अनोख्या कलेतून मराठी मातीचा सुगंध नेहमीच दरवळत असतो. असंच एक अनोखं संमेलन पंढरीत (Pandharpur) झालं आणि यातून असं अनेक छुप्या कलाकारांच्या अनोख्या कलेचं सादरीकरण जगासमोर आलं. निमित्त होतं राज्यस्तरीय अक्षर संमेलनाचं, यासाठी महाराष्ट्रातील जवळपास 350 पेक्षा जास्त अक्षरप्रेमी, रांगोळीकार आणि चित्रकारांचा मेळा भरला होता. माझी शाळा, माझा फळा या सोशल मीडियातील ग्रुपपासून सुरु झालेल्या या चळवळीत सध्या राज्यभरातील हजारोंच्या संख्येनं अक्षर यात्री सामील झाले आहेत. अक्षरातून माणसाच्या स्वभावाची ओळख होते, असं माननं आहे आणि या कॅलिग्राफीमुळे कलाकाराच्या भावना हटके पद्धतीनं कागदावर उतरतात. त्यामुळेच सध्या कॅलिग्राफी ही कला समाजात लोकप्रिय होताना दिसत आहे.
या संमेलनासाठी महाराष्ट्रासह कर्नाटक आणि मध्यप्रदेशमधील कलाकार देखील सामील झाले होते. मंत्रालयातील महसूल आणि वन सहसचिवापासून रायगडाच्या चिमुरड्यांपर्यंत अनेक कलाकारांनी आपल्या सुप्त कलांचं दर्शन घडवलं. मंत्रालयातील महसूल आणि वन विभागाचे सहसचिव संजय इंगळे यांनी आपल्या व्यस्त दिनचर्येतून कॅलिग्राफीची आवड जोपासल्याचं सांगितलं. तर रायगडाच्या भावेश तोडणकर या चिमुरड्यानं एकाच वेळी दोन हात आणि तोंडात पेन धरून अफलातून कला सादर केली. पुणे येथील नागराज माळशेट्टी यानं तर शरद पवार यांच्यावरील आपलं प्रेम व्यक्त करताना सध्या पोस्टकार्ड वर तब्बल 1 लाख 22 हजार 386 वेळा पवार यांचं नाव लिहिलं आहे. जे वाचण्यासाठी दुर्बिणीचा वापर करावा लागला. अहमदनगर येथील ज्ञानेश्वर कवडे यांनी अक्षर गणेशच्या माध्यमातून 'ABP माझा'ची कलाकृती काही सेकंदात तयार केली. मुंबई येथील अनिल गोवळकर यानं आपली नोकरी सांभाळत कॅलिग्राफीचे विकसित केलेल्या विविध प्रकारांची प्रात्यक्षिकं सादर केली. सध्या आपल्याला यात अजून काम करताना नवनवीन कॅलिग्राफर बनविण्याचं असल्याची इच्छा गोवळकर यांची आहे.
चूल आणि मुलं सांभाळत कन्नड तालुक्यातील मेघा बोरसे हिनं पोस्टल कलरचा वापर करत केलेलं साधूचं पोट्रेट तिच्या जिवंत कलाकृतीची साक्ष देत होतं. उच्य शिक्षण घेतलेली ही मेघा नावाची गृहिणी चित्रकलेचं कोणतंही शिक्षण न घेता केवळ आवडीच्या ओढीनं आपली कला जोपासत आहे. आज मेघा पेन्सिल, पेन, चारकोलसह इतर पद्धतीच्या कलाकुसरीत तरबेज झाली आहे. बुलढाण्याचे गोपाळ वाकोडे यांच्या स्वाक्षरी पद्धत पाहण्यासाठी तर प्रेक्षकांची झुंबड उडत होती. रांगोळीतील अक्षरलेखन ही सध्या लोकप्रिय होत असलेल्या कलेचं गणेश माने यांच्यासह अनेक कलाकारांनी अप्रतिम सादरीकरण केलं. या संमेलनाचे मुख्य आयोजक अमित भोरकडे यांनी या अक्षर संमेलनात सामील झालेले सर्व अक्षर यात्रींना अक्षराच्या गोडीनं एकत्रित आणल्याचं सांगितले. मराठी मातीची ओढ या सर्व मायमराठीच्या सेवेकऱ्यांनी आपल्या कलेतून दाखवून तर दिलीच याशिवाय अनेकांना यातून कॅलिग्राफीची प्रेरणाही दिली, हेच या अक्षर संमेलनाचं यश आहे.
महत्त्वाच्या बातम्या
