Rupali Chakankar Statement Controversy: सडकून टीकेच्या धनी ठरलेल्या रुपाली चाकणकरांना झटका बसणार? फलटणमध्ये नेमकं म्हणाल्या तरी काय ज्यामुळे थेट दादाच म्हणाले, मी सहमत नाही!
अजित पवार यांनी रूपाली चाकणकर यांच्या वक्तव्याशी असहमती दर्शवली आहे. फलटण युवती डॉक्टर प्रकरणात सुषमा अंधारे यांचा संतप्त हल्लाबोल केला आहे. त्यामुळे कारवाईची चर्चा रंगली आहे.
Rupali Chakankar statement controversy: राज्य महिला आयोगाच्या अध्यक्षा (Maharashtra State Women Commission controversy) रूपाली चाकणकर यांच्या फलटण भेटीत केलेल्या बेजबाबदार वक्तव्यामुळे राज्यात संतापाचा स्फोट झाला आहे. डॉक्टर युवतीच्या आत्महत्येनंतर पीडितेच्या चारित्र्यावर प्रश्नचिन्ह उपस्थित करणाऱ्या चाकणकर यांच्या वक्तव्यावर आता विरोधकांसह सत्ताधारी गटातूनही नाराजी व्यक्त होत आहे. उपमुख्यमंत्री अजित पवार यांनी (Ajit Pawar on Rupali Chakankar) थेट स्पष्ट केलं आहे की, “मी महिला आयोगाच्या रुपाली चाकणकर यांच्या वक्तव्याशी सहमत नाही.” फलटणमधील मृत डॉक्टर युवतीच्या कुटुंबीयांशी अजित पवार यांनी रूपाली ठोंबरे यांच्या फोनवरून संवाद साधला. “मी नेहमी सत्याच्या बाजूने असतो. या प्रकरणात न्याय मिळवण्यासाठी तुमच्यासोबत आहे,” असं सांगत त्यांनी हे प्रकरण मुख्यमंत्र्यांच्या कानावर घालणार असल्याचंही जाहीर केलं. त्यामुळे आता रूपाली चाकणकर यांना तगडा झटका बसणार का? याबाबतची चर्चा रंगली आहे.
“चारित्र्यावर शिंतोंडे का उडवताय?” सुषमा अंधारे यांचा संतप्त प्रश्न
शिवसेना (ठाकरे गट) उपनेत्या सुषमा अंधारे यांनी चाकणकर यांच्या वक्तव्यावर तीव्र आक्षेप घेतला आहे. “पीडितेला न्याय देण्याऐवजी चाकणकर मृत डॉक्टरची बदनामी करत आहेत. ती गेल्यानंतर तिच्या चारित्र्यावर शिंतोंडे का उडवताय?” असा सवाल अंधारे यांनी पत्रकार परिषदेत केला. सुषमा अंधारे पुढे म्हणाल्या, “ती युवती कितीजणांशी बोलत होती याची माहिती माध्यमांसमोर देणं म्हणजे सरळ चारित्र्यहनन आहे. जरी ती कोणाशीही बोलत असेल, तरी तिला मरायच्या स्थितीत कोणी ढकललं, हे महत्त्वाचं आहे, तिच्या वागण्यावर न्यायदान करणं नाही.” तसेच, राष्ट्रवादी काँग्रेसचे प्रदेशाध्यक्ष सुनील तटकरे यांनी या प्रकरणात लक्ष घालून “आयोगावर जबाबदार व्यक्तीची नियुक्ती करावी, पुनर्वसनासाठी पदांचा वापर होऊ देऊ नका, पक्षाची आणि आयोगाची इभ्रत राखा,” असा सल्लाही दिला आहे.
वादाच्या केंद्रस्थानी असलेल्या रुपाली चाकणकर काय म्हणाल्या?
दरम्यान, महिला आयोगाच्या रूपाली चाकणकर यांनी 27 ऑक्टोबर रोजी फलटण उपजिल्हा रुग्णालयाला भेट दिली. आत्महत्या केलेली डॉक्टर युवती याच रुग्णालयात काम करत होती. या रुग्णालयामध्ये डॉक्टर युवतीला पोलिस विभागाकडून त्रास होत होता. याबाबतची चौकशी करण्यासाठी चाकणकर पोहोचल्या. त्यांनी रुग्णालयातील अधिकारी आणि कर्मचाऱ्यांशी चर्चा केली. यानंतर माध्यमांशी बोलताना ही घटना दुर्दैवी असल्याचे सांगत म्हणाल्या की, "मी सर्व डॉक्टर, अधिकारी यांच्याशी चर्चा केली. डॉक्टर युवतीने आयसी कमिटीकडे तक्रार केली नव्हती. मात्र, पोलिस आणि डॉक्टर यांच्या एकमेकांबद्दल तक्रारी होत्या. आरोपींच्या बाबतीत फिट आणि अनफिट रिपोर्ट देण्यावरून तक्रारी होत्या. आत्महत्या केलेल्या डॉक्टर महिलेने तीनवेळा बदलीच्या बाबतीत विचारणा होऊनही फलटणमध्येच थांबण्याचं ठरवलं होतं. त्यासाठी विशेष ऑर्डर करून बदली थांबवण्यात आली," असं रुपाली चाकणकर म्हणाल्या होत्या.
इतर महत्वाच्या बातम्या
Before You Go
Majha Sanman Award 2026 : नितीन गडकरी, आशा पारेख अन् जॅकी श्रॉफ; माझा सन्मानमध्ये उलगडले रंजक किस्से
महत्त्वाच्या बातम्या
