Remdesivir Injection | धुळ्यात रेमडेसिवीर इंजेक्शनचा काळाबाजार; तिघे पोलिसांच्या ताब्यात

धुळे जिल्ह्यात रेमडेसिवीर या इंजेक्शनचा काळाबाजार करणाऱ्या तिघांना पोलिसांच्या ताब्यात देण्यात आले आहे.

संग्रहित छायाचित्र

धुळे : जिल्ह्यात रेमडेसिवीरचा काळाबाजार करणाऱ्या तिघांना धुळे एलसीबीने कारवाई करत ताब्यात घेतले आहे. त्यांच्याकडून रेमडेसिवीरसह सुमारे 40 हजार रुपये किंमतीचा मुद्देमाल जप्त करण्यात आला आहे. दरम्यान रेमडेसिवीर हे इंजेक्शन देवपुरात 16 हजार रुपयात विकले जाणार होते. व्यवहार होण्यापूर्वी एलसीबीच्या पथकाने सापळा रचून त्यांना ताब्यात घेतले.

कोरोनाने सर्वत्र कहर केला आहे. अशावेळी कोरोना बाधित रुग्णांना दिलासा देवून मदतीचा हात पुढे करण्याऐवजी काहीजण रेमडेसिवीर या इंजेक्शनचा काळ्या बाजारात जास्त दराने विक्री करत असल्याच्या तक्रारी प्रशासनाला मिळाल्या होत्या. त्यानुसार जिल्हाधिकारी संजय यादव, पोलिस अधिक्षक चिन्मय पंडीत, अप्पर पोलिस अधिक्षक प्रशांत बच्छाव यांनी अशा अमानविय कृत्य करणार्‍यांचा शोध घेवून त्यांच्यावर कडक कारवाई करण्याचे आदेश दिले होते.

याच पार्श्वभूमीवर धुळे एलसीबीचे पोलीस निरीक्षक शिवाजी बुधवंत यांनी पथके तयार केले होते. बनावट ग्राहक तयार करून देवपुरातील दत्तमंदिर चौकात सापळा रचून रेमडेसिवीरचे इंजेक्शन 16 हजारात विकणार्‍या धुळे शहरातील रहिवासी असलेल्या कृष्णा भिकन पाटील याला एलसीबीच्या पथकाने पकडले. त्याच्याकडून एक रेमडेसिवीर इंजेक्शन, रोख रक्कम आणि मोबाईल असा एकूण 38 हजार 899 रुपयांचा मुद्देमाल जप्त केला आहे. चौकशीत त्याने त्याच्या दोन साथीदारांची नावे सांगितले. त्यावरुन सागर विलास भदाणे आणि चिलेश कैलास भामरे या दोघांनाही ताब्यात घेतले. याप्रकरणी तिघांविरुध्द देवपुर पोलिसात गुन्हा दाखल करण्यात आला असून पुढील तपास पोलीस करीत असल्याची माहिती पोलिस अधीक्षक चिन्मय पंडित यांनी दिली आहे.

देशात कोरोना रुग्णसंख्येत पुन्हा विक्रमी वाढ
देशात काही दिवसांपूर्वी नियंत्रणात आलेला कोरोना संसर्ग आता नियंत्रणाबाहेर जात असल्याचं चित्र पाहायला मिळत आहे. नव्यानं कोरोना रुग्ण आढळण्याच्या प्रमाणात दिवसागणिक अधिकाधिक भर पडत असल्यामुळं आता प्रशासन आणि आरोग्ययंत्रणांपुढे मोठी आव्हानं उभी राहत आहेत. केंद्रीय आरोग्य विभागानं नुकत्याच दिलेल्या माहितीनुसार मागील 24 तासांत देशात पुन्हा एकदा कोरोना रुग्णसंख्येत विक्रमी वाढ झाली आहे. जवळपास दीड लाखांहून अधिक रुग्णसंख्येची नोंद झाल्यामुळं आता कोरोनाची धास्ती आणखी वाढली आहे.