शिक्षण विभागाकडून रविवारी कार्यालय सुरु ठेवत डिसले गुरुजींना अध्ययन रजा मंजूर, परदेशात स्कॉलरशिपसाठी जाण्याचा मार्ग मोकळा

जगभरात महाराष्ट्राचं नाव झळकावणारे ग्लोबल टीचर अवॉर्ड विजेते रणजितसिंह डिसले यांना परदेशात स्कॉलरशिपसाठी जाण्यासाठी अखेर रजा मंजूर झाली आहे. 1 ऑगस्ट  ते 31 डिसेंबर 2022 पर्यंत त्यांना रजा मिळाली आहे.

disale sir

Ranjitsinh Disale News : ग्लोबल टीचर अवॉर्ड विजेते रणजितसिंह डिसले यांना परदेशात स्कॉलरशिप संपादन करण्यासाठी आता जाता येणार आहे. शिक्षण विभागाने नुकतीच त्यांची अध्ययन रजा मंजूर केली आहे. 1 ऑगस्ट  ते 31 डिसेंबर 2022 पर्यंत म्हणजेच एकूण 153 दिवसांसाठी त्यांना रजा देण्यात आली आहे.

ग्लोबल टीचर हा पुरस्कार मिळाल्यानंतरही परदेशात स्कॉलरशीपसाठी जाण्याकरता डिसले यांना बऱ्याच अडचणी येत होत्या. 4 डिसेंबर 2021 रोजी अमेरिकन सरकारकडून जगभरातील 40 शिक्षकांना प्रतिष्ठेची फुलब्राईट शिष्यवृत्ती जाहीर करण्यात आली. यामध्ये भारतातून रणजीत डिसले यांची निवड करण्यात आली.  'पीस इन एज्युकेशन' या विषयावर अमेरिकेतील विद्यापीठाकडून डिसले यांना ही शिष्यवृत्ती देण्यात आली आहे.  डिसले गुरुजी यांना यासाठी 6 महिने अमेरिकेत जायचे आहे. दरम्यान त्यांनी दीड महिन्यांपूर्वी सोलापूर जिल्हा परिषदेकडे अध्यापन रजेचा आणि परदेश प्रवासाच्या अनुमतीचा अर्ज केला होता. याच संदर्भात डिसले गुरुजींनी सोलापूर जिल्हापरिषदेचे प्रशासन प्रमुख मुख्य कार्यकारी अधिकारी आणि जिल्हा प्राथमिक शिक्षणाधिकारी यांची भेट घेतली. धक्कादायक बाब म्हणजे सोलापूर जिल्हा परिषदेचे शिक्षणाधिकारी डॉ. किरण लोहार यांनी रणजित डिसले यांच्यावर गंभीर आरोप केले आहेत. डिसले यांनी सादर केलेल्या अर्जात त्रुटी होत्या. पण या प्रकरणाची संपूर्ण चौकशी झाल्यानंतर राज्याच्या शिक्षणमंत्री वर्षा गायकवाड यांनी सोलापूर जिल्हा परिषदेच्या मुख्य कार्यकारी अधिकाऱ्यांना डिसले यांना स्कॉलरशीपसाठी परदेशात पाठवण्यात यावे असे निर्देश दिले आहेत. विशेष म्हणजे यासाठी शिक्षण विभागाने आज म्हणजेच रविवारी सुट्टीच्या दिवशी काम करुन डिसले गुरुजींची रजा मंजूर केली आहे.

सोलापूर शिक्ण विभागाने नुकतीच ही माहिती दिली असून या माहितीत डिसले यांना अमेरिकन सरकारच्या Fullright Foreign Scholarship Board या स्कॉलरशीपसाठी अध्ययन रजा मंजूर करण्यात आल्याचे कळवले आहे. यामध्ये त्यांना 1 ऑगस्ट ते 31 डिसेंबर 2022 पर्यंत म्हणजेच एकूण 153 दिवसांसाठी रजा देण्यात आल्याचेही नमूद करण्यात आले आहे. तसंच डिसले यांना रजा देताना काही अटीदेखील ठेवल्या आहेत. त्यातील काही महत्त्वाच्या अटी खालीलप्रमाणे...

1. या अध्ययन रजेसाठी भारत सरकारच्या वित्त मंत्रालयाने विदेशी चलन उपलब्ध करुन देण्याचे मान्य केल्याचे पत्र सादर करावे.
2. रजा संपल्यानंतर कामावर परत रुजु झाल्यापासून तीन वर्षाच्या आत स्वेच्छा सेवा निवृत्तीसाठी अर्ज करता येणार नाही.
3. अध्ययन रजेवर असताना केलेल्या कामाबाबतचा संपूर्ण अहवाल रजेवरुन 
4. अध्ययन रजा सुरु होण्यापूर्वी परिशिष्ट पाच मधील यथास्थिती नमुना सात मध्ये बंधपत्र करुन द्यावे.
5. स्कॉलरशीपनंतर सर्व प्रमाणपत्रे देखील शिक्षण विभागासमोर सादर करावी.
6. मंजूर केलेल्या रजेपेक्षा अभ्यासक्रमाचा कालावधी कमी असल्यास अभ्यासक्रम संपताच कामावर रुजू व्हावे.

संबंधित बातम्या