पुण्यात धक्कादायक प्रकार, काँग्रेस शहराध्यक्ष मतदान केद्रावर गेले; पण अगोदरच झालं बोगस मतदान
पुण्यात लोकसभेच्या निवडणुकीसाठी आज चौथ्या टप्प्यात मतदान सुरु झालं आहे. मात्र, पुण्यातील भाजप आणि कॉंग्रेस कार्यकर्त्यांचे आरोप प्रत्यारोप काही थांबायचं नाव घेत नाही आहे.
पुणे : राज्याचं लक्ष लागलेल्या पुणे लोकसभा (Pune) मतदारसंघात महाविकास आघाडी विरुद्ध महायुती असा थेट सामना होत आहे. वंचित बहुजन आघाडीकडून वसंत मोरे हेही मैदानात उतरले आहेत. मात्र, मुख्य लढत ही काँग्रेसचे रवींद्र धंगेकर (Ravindra Dhangekar) विरुद्ध भाजपचे मुरलीधर मोहोळ यांच्यातच होत आहे. पण, रविवार रात्रीपासूनच पुणे मतदारसंघात राडा पाहायला मिळत आहे. पैसेवाटपाचा आरोप करत उमेदवार धंगेकर यांनी चक्क पोलीस स्टेशन गाठले होते. तर, आज सकाळी मतदान केंद्रांवरही काही ठिकाणी अनुचित प्रकार घडत असल्याच्या तक्रारी आहेत. त्यातच, आता चक्क काँग्रेस शहराध्यक्षाच्या (Congress) नावावरच बोगस मतदान (Voting) झाल्याचा गंभीर प्रकार उघडकीस आला आहे.
पुण्यात लोकसभेच्या निवडणुकीसाठी आज चौथ्या टप्प्यात मतदान सुरु झालं आहे. मात्र, पुण्यातील भाजप आणि कॉंग्रेस कार्यकर्त्यांचे आरोप प्रत्यारोप काही थांबायचं नाव घेत नाही आहे. भाजप पैसे वाटप करत आहेत, असं म्हणत काल रवींद्र धंगेकरांनी पोलीस ठाण्यात ठिय्या आंदोलन केलं. त्यानंतर आता मतदानाच्या दिवशी भाजपकडून आंदोलन करण्यात येत आहे. पुण्यातील कसबा पेठेतील फडके हौद चौकात भाजपचे कार्यकर्ते हेमंत रासनेंच्या नेतृत्वात ठिय्या आंदोलन करत आहेत. त्यातच, पुणे शहरासह मावळ आणि शिरुर मतदा संघातही काही ठिकाणी ईव्हीएम मशिनचा बिघाड झाल्याची घटना समोर आली आहे. तर, शिरुरमधील एका मतदान केंद्रावर मनमानी कारभार सुरू असल्याचा व्हिडिओच खासदार कोल्हे यांनी शेअर केला होता. त्यानंतर आता पुणे काँग्रेस शहराध्यांच्याचा नावाने बोगस मतदान झाल्याची घटना उघडकीस आली आहे.
पुण्यातील सेंट मीरा स्कुलमध्ये बोगस मतदान करण्यात आल्याचा धक्कादायक प्रकार उघडकीस आला आहे. पुणे काँग्रेस शहराध्यक्ष अरविंद शिंदे यांच्या नावावरील हे मतदान ते मतदान केंद्रावर पोहोचण्यापूर्वीच झाल्याचं उघडकीस आलं आहे. या घटनेनंतर अरविंद शिंदे यांनी संताप व्यक्त केला असून ऑनलाईन तक्रारही केली आहे.
काय म्हणाले अरविंद शिंदे
''मी मतदान केंद्रावर मतदान करण्यासाठी पोहोचलो, पण माझ्या नावावर रेड लाईन मारली होती, मला सांगितलं की तुमचं मतदान झालंय. माझ्या नावापुढे दुसऱ्याचाच शिक्का आणि सहीही वेगळीच असल्याचं दिसून आले. विशेष म्हणजे येथील आधारकार्डचा नंबरही माझा नव्हता. यावेळी पोलिंग एजंटने मध्ये बोलायचा प्रयत्न केला, तर तिथेही दमबाजी करण्यात आली, असे शिंदे यांनी म्हटलं आहे. तसेच, मी या मतदारसंघातून 4 वेळा नगरसेवक राहिलो आहे, येथील लोकं मला चांगलं ओळखतात. अरविंद तुकाराम शिंदे असं नाव घेतलं असतं तरीही मला ओळखलं असतं. मात्र, माझ्याच नावाने बोगस मतदान झाल्याचं उघडकीस आलंय. या घटनेनंतर बॅलेट पेपरवर चॅलेंज करुन मी टेंडर व्होट करुन आलोय. मी ऑनलाईन तक्रारही केली आहे, असे अरविंद शिंदे एबीपी माझाशी बोलताना स्पष्ट केले.
ईव्हीएम गोडाऊनचे सीसीटीव्ही बंद?
दरम्यान, बारामती लोकसभा मतदारसंघाचे मतदान पार पडल्यानंतर त्या इव्हिएम ज्या गोडावूनमध्ये ठेवल्या आहेत, तेथील सीसीटिव्ही आज सकाळी 45 मिनिटे बंद पडल्याचा आरोप करण्यात आला होता. त्यावर, निवडणूक अधिकाऱ्यांनी बाजू मांडली आहे. बारामती लोकसभा मतदारसंघातील मतदान यंत्रे पुण्यातील कोरेगाव पार्क भागातील शासकीय गोदामात ठेवण्यात आली आहेत. या ठिकाणी लावलेला सीसीटीव्ही कॅमेरा काही वेळासाठी बंद होता, असा आरोप राष्ट्रवादी काँग्रेस शरदचंद्र पवार पक्षाकडून करण्यात आलाय.मात्र, निवडणूक निर्णय अधिकाऱ्यांनी हे सीसीटीव्ही बंद नव्हते, असा दावा केलाय. केवळ सीसीटीव्ही कॅमेऱ्यांची दृष्ये ज्या स्क्रिनवर दिसतात ती स्क्रिन काही वेळासाठी बंद होती, असे स्पष्टीकरण निवडणूक अधिकाऱ्यांनी दिले आहे.
महत्त्वाच्या बातम्या
