Parbhani Accident: परभणीत भीषण अपघात, क्रुझर पलटी झाल्याने 2 जागीच ठार, 12 जण जखमी
परभणीच्या चार ठाण्याजवळ क्रुझर चालकाचा ताबा सुटल्याने घडला अपघात
Parbhani Accident: परभणीच्या जिंतूर-छत्रपती संभाजीनगर महामार्गावर भीषण अपघात घडला. या अपघातात 2 जण जागीच ठार झाले असून 12 जण गंभीर जखमी झाले आहेत. चारठाणा परिसरातील वळण रस्त्यावर क्रुझर चालकाचा गाडीवरील ताबा सुटल्याने वाहन पलट्या खात रस्त्याच्या बाजूला खड्ड्यात गेले. यावेळी जीपमधील दोघे जागीच ठार झाले असून 12 जण गंभीर जखमी झाले. यातील तीन जणांची प्रकृती चिंताजनक आहे.
साईबाबाच्या दर्शनाला गेलेले हिंगोली जिल्ह्यातील कनका गावातील हे भाविक होते. दर्शन घेऊन गावी परतत असताना वळण रस्त्यावर एम.एच. 22 यू 4352 या क्रमांकाच्या क्रुझर जीपचा अपघात झाला. क्रुझर चालकाचा गाडीवरील ताबा सुटल्याने वाहन रस्त्याच्या बाजूला असणाऱ्या खड्ड्यात जाऊन आदळले. यावेळी जीपमधील रुक्मिणी चंदू चाभाडे (वय 35 वर्ष) व दीपक सखाराम जाधव (वय 36 वर्ष) यांचा जागीच मृत्यू झाला. इतर 12 भाविक जखमी झाले.
अपघातानंतर सहाय्यक पोलीस निरीक्षक प्रभाकर कापुरे यांच्यासह टीमने घटनास्थळी धाव घेऊन जखमींना जिंतूर येथील ग्रामीण रुग्णालयात उपचारासाठी हलविले. जिंतूर येथे प्राथमिक उपचार करून पुढील उपचारासाठी परभणी येथील जिल्हा सामान्य रुग्णालयात त्यांना हलविण्यात आले असून तीन जणांची प्रकृती चिंताजनक असल्याची माहिती समोर आली आहे.
गोरोगावमध्ये भरधाव वेगात जाणाऱ्या दुचाकीचा अपघात
मुंबईच्या पश्चिम उपनगरातील गोरेगाव पूर्व आणि पश्चिमला जोडणाऱ्या उड्डाणपुलावरून भरधाव वेगात जाणाऱ्या दुचाकीवरील चालकाचे नियंत्रण सुटल्याने अपघात झाल्याची घटना घडली आहे. उड्डाण पुलावरील संरक्षक कठड्याला धडकून दुचाकी थेट वीस फूट खोल खाली पडल्याने अपघात होऊन यात दोन तरुणांचा जागेवरच दुर्दैवी मृत्यू झाला आहे.
सोमवारी पहाटे 5 वाजेच्या सुमारास हा अपघात झाला. वैभव रामदास गमरे (28 वर्षे) आणि आनंद इंगळे (21 वर्षे) अशी मृत झालेल्या दोघांची नावे आहेत. अपघाताची माहिती मुंबई पोलिसांना समजताच गोरेगाव पोलिसांनी घटनास्थळी धाव घेतली. जखमी झालेल्या वैभव आणि आनंद या दोघांनाही पोलिसांनी तातडीने जोगेश्‍वरीतील ट्रॉमा केअर हॉस्पिटलमध्ये दाखल केले, मात्र तिथे या दोघांनाही डॉक्टरांनी मृत घोषित केले.
याप्रकरणी गोरेगाव पोलिसांनी ADR दाखल करून घेतलं असून ही मुले दारूचे नशेत गाडी चालवत होते का किंवा कशामुळे हा अपघात झाला या संदर्भात अधिक तपास करत आहे.
हेही वाचा:
Mumbai Accident : भरधाव वेगात जाणाऱ्या दुचाकीचा अपघात, दोन तरुणांचा जागेवरच मृत्यू, गोरेगावमधील घटना
महत्त्वाच्या बातम्या
ट्रेंडिंग न्यूज
