... अखेर महिनाभराच्या विश्रांतीनंतर विठुराया गाडीतून मंदिरात परतले; कुठं गेलेले देव?

Pandharpur Vitthal Mandir Update : परंपरेनुसार देव सुट्टीसाठी एकांतात असणाऱ्या निसर्गरम्य अशा विष्णुपदावर मुक्कामाला असतात. विठुराया काल मंदिर समितीच्या स्कॉर्पिओमधून विठ्ठल मंदिरात परतले.

Pandharpur Vitthal Mandir Update

Pandharpur : गेले एक महिनाभर विष्णुपदी मुक्कामाला गेलेले विठुराया काल मंदिर समितीच्या स्कॉर्पिओमधून विठ्ठल मंदिरात परतले. मार्गशीर्ष महिन्यात परंपरेनुसार देव सुट्टीसाठी एकांतात असणाऱ्या निसर्गरम्य अशा विष्णुपदावर मुक्कामाला असतात. चंद्रभागेच्या तीरावर असणाऱ्या या ठिकाणी घनदाट झाडी आणि निसर्गरम्य परिसर आहे. येथे एका मोठ्या शिळेवर विष्णूची पावले, देवाची काठी, काल्याची वाटी आणि गोप गोपिका आणि गाईंच्या पायांच्या खुणा आहेत. 

देवाच्या विष्णुपदी येण्याबाबत अनेक आख्यायिका सांगितल्या जातात. आषाढी यात्रा त्यानंतर सुरु झालेला चातुर्मास आणि नंतर आलेली कार्तिकी यात्रा यामुळे शिणलेल्या विठुराया मार्गशीर्ष महिना सुरु होताच विश्रांतीसाठी विष्णुपदी असतात. त्यामुळे रोज हजारो भाविक येथे देवाच्या दर्शनासाठी होड्यातून आणि रस्त्याच्या मार्गाने विष्णुपदावर येत असतात.  मार्गशीर्ष अमावस्या अर्थात वेळ अमावास्येला रात्री विष्णुपदावर देवाच्या पादुकांचे पूजन होऊन त्यांना वाजत गाजत पंढरपूरमध्ये विठ्ठल मंदिरात येत असतात. सध्या कोरोनाचे संकट असल्याने शासकीय निर्बंधामुळे आज वेळ अमावास्येला सायंकाळी मंदिर समितीच्या सजवलेल्या स्कॉर्पिओ गाडीतून विठुराया पुन्हा विठ्ठल मंदिरात परतले. 

पंढरपुरात विठूरायाच्या दर्शनासाठी नवीन नियमावली 
  
ओमायक्रॉन संसर्गाचे सावट आणि कोरोनाबाधितांची संख्या वाढू लागल्याने राज्यात जमाव बंदी व इतर निर्बंध लागू करण्यात आले आहेत. पंढरपूरच्या विठ्ठल मंदीर प्रशासनानेही दर्शनाच्या वेळेवर बंधने आणली आहेत. (Coronavirus Maharashtra pandharpur temple restriction for vitthal darshan in temple) रात्री 9 वाजता विठूरायाचे मंदीर भाविकांसाठी बंद होणार आहेत. मंदीर प्रशासनाच्या बैठकीत हा निर्णय घेण्यात आला. राज्य सरकारने घेतलेल्या जमाव बंदीच्या निर्णयाच्या अनुषंगाने हा निर्णय घेण्यात आला आहे. सध्या पंढरपूरमध्ये नाताळाच्या सुट्टीमुळे भाविकांची मोठी गर्दी उसळली आहे. नवीन वर्षाच्या पहिल्या दिवशीही गर्दी होण्याची दाट शक्यता आहे. त्यामुळे विठूरायाच्या दर्शनासाठी भाविकांचा ओघ लक्षात घेता मंदीर प्रशासनाने जमाव बंदीच्या अनुषंगाने काही निर्णय घेतले आहेत. त्यानुसार आता भाविकांसाठी रात्री 9 वाजता मंदीर बंद ठेवण्यात येणार आहे. त्यामुळे भाविकांना विठूरायाच्या दर्शनासाठी रात्री 9 वाजण्याच्या आधीच मंदिरात प्रवेश करावा लागणार आहे. सोलापूरचे जिल्हाधिकारी मिलिंद शंभरकर यांनी जिल्ह्यात रात्री 9 नंतर जमावबंदी आदेश दिल्याने आजपासून विठ्ठल मंदिर रात्री नऊ वाजता भाविकांसाठी बंद राहणार आहे. 

इतर महत्वाच्या बातम्या

मराठी लाईव्ह न्यूज सुपरफास्ट पाहा ABP Majha वर, मुंबई, पुणे, नागपूर, औरंगाबाद, मनोरंजन, क्रिकेट, देश-विदेशातील प्रत्येक बातमी सर्वात आधी एबीपी माझावर Live