Supriya Sule Video : खासदार सुप्रिया सुळेंचा मुकबधीराशी संवाद; पक्षाची निशाणी विचारताच हातवारे करून दाखवली
सुप्रिया सुळे यांनी दौऱ्यात तासगावमधील गणपती मंदिरात सेवा देणाऱ्या विलास जामदार यांची भेट दिली. यावेळी सुप्रिया सुळे यांनी पक्षाची निशाणी विचारताच त्यांनी हाताने तुतारी करून दाखवली.
Supriya Sule Video : सांगली जिल्ह्यातील तासगाव तालुक्यातील सावळजमधील चंद्रकांत पाटील यांच्या अर्धाकृती पुतळ्याचे अनावरण सुप्रिया सुळे यांच्या हस्ते करण्यात आले. यावेळी सुप्रिया सुळे चंद्रकांत पाटील यांच्यासारख्या कार्यकर्त्यांमुळेच आर. आर. पाटील यांच्यासारख्या नेत्यांचे हात बळकट झाल्याचे सांगितले. राज्यात नवीन चेहरा म्हणून रोहितकडे आपण पाहत आहोत. राज्यातील सर्वांत मोठी पोलिस भरती आर. आर. पाटील यांच्या काळात झाली. नेतृत्व हे संघर्षातूनच निर्माण होते. एक वर्षापूर्वी पक्ष नेला आणि चिन्हही नेले. पण पांडुरंगाने तुतारी चिन्ह आम्हाला दिले. तुतारी आज वाडी-वस्तीवर पोहोचली असल्याचे सांगितले.
खासदार सुप्रिया सुळेंचा मुकबधीराशी संवाद
सुप्रिया सुळे यांनी दौऱ्यात तासगावमधील गणपती मंदिरात सेवा देणाऱ्या विलास जामदार यांची भेट घेतली. यावेळी दोघांमध्ये देहबोलीतून संवाद झाला. सुप्रिया सुळे यांनी पक्षाची निशाणी विचारताच त्यांनी हाताने तुतारी करून दाखवली. सुप्रिया सुळे यांनी हा व्हिडिओ सोशल मीडियात शेअर केला आहे. व्हिडिओ शेअर केल्यानंतर त्यांचे आभार मानणाऱ्या प्रतिक्रिया सुद्धा आली आहे.
View this post on Instagram
एका प्रतिक्रियेत म्हटलं आहे की, आदरणीय सुप्रिया ताई.. विलासला मा. आर आर पाटील खूप आवडायचे. त्याच्यामुळेच मा. शरद पवार साहेबही. काल त्याला खूप आनंद झाला तुम्ही त्यांची मुलगी आहात हे माहित होत. त्याने घरी येऊन लगेच आम्हांला सांगितलं की तुम्ही त्याला भेटलात. धन्यवाद ताई त्याला हा आनंद दिल्याबद्दल... त्याचा मा. आर आर पाटील साहेबांसोबतही फोटो आहे. त्याने ते जपून ठेवलेत. मनापासून धन्यवाद. अन्य एका प्रतिक्रियेत म्हटलं आहे की, आमचे बंधू विलास जामदार हे जन्मतः मुकबधीर असून गणपती मंदिर तासगांव सेवा देतात. ताई तुम्ही त्याला भेट दिली त्याबद्दल धन्यवाद.
दरम्यान, अर्धाकृती पुतळा अनावरणासाठी राष्ट्रवादी शरदचंद्र पवार पक्षाचे प्रदेशाध्यक्ष जयंत पाटील, आमदार सुमनताई पाटील, रोहित पाटील, जिल्हा बँकेचे संचालक सुरेश पाटील, महांकाली कारखान्याच्या अध्यक्षा अनिता सगरे आदींची उपस्थिती होती.
पण काहींना नाती कळली नाहीत
सुप्रिया सुळे म्हणाल्या की, पैसा, सत्ता येते जाते, पण फक्त नाती टिकतात, पण काहींना नाती कळली नाहीत. बहिणी लोकसभा निकालानंतर लाडक्या झाल्या. पैशाने नाती निर्माण होत नाहीत. या नात्यावरूनदेखील महायुतीत श्रेयवाद होत आहे. आपले सरकार नक्की येणार, असा आशावादही यावेळी व्यक्त केला. रोहित पाटील यांनी यावेळी राष्ट्रवादी शरद पवार गटाचा पहिला आमदार हा या तासगाव-कवठेमहांकाळ मतदारसंघातून असेल, असा विश्वास व्यक्त केला.
महत्त्वाच्या बातम्या
