वाल्मिक कराडचं नाव येताच तपासाचा वेग थंडावतो, मंत्री महोदयांचा वरदहस्त; आमदार संदीप क्षीरसागरांचा गंभीर आरोप

वाल्मिक कराडला अटक होण्यासाठी उशीर झाला आहे. तपासात वाल्मिक कराडचे नाव आल्यावर वेग कुठेतरी थांबतो. त्यामुळं यामध्ये मंत्री महोदयांचा वरदहस्त असल्याचे शरद पवार गटाचे आमदार संदीप क्षीरसागर म्हणाले.

Sandeep Kshirsagar

Source : Sandeep Kshirsagar

Sandeep Kshirsagar : वाल्मिक कराड यांना सुरुवातीपासूनच संरक्षण आहे. आता त्यांच्या संपत्तीचा खुलासा होत आहे. जर बाहेरच्या देशातून सिम कार्ड येत असतील तर त्यांचे कॉन्टॅक्ट कुठपर्यंत असतील? असा सवाल राष्ट्रवादी काँग्रेस शरद पवार गटाचे आमदार संदीप क्षीरसागर यांनी केला. वाल्मिक कराडला अटक होण्यासाठी उशीर झाला आहे. तपासात वाल्मिक कराडचे नाव आल्यावर वेग कुठेतरी थांबतो. त्यामुळं यामध्ये मंत्री महोदयांचा वरदहस्त असल्याचे क्षीरसागर म्हणाले. 

वाल्मिक कराडला अटक झाल्यानंतर देखील जे काही कटकारस्थान झाले त्यात अजूनही नावे घेण्यात आली नाहीत. मी सुरुवातीपासून सांगत आहे की मास्टर माईंड ते आहेत. त्यांना मंत्री धनंजय मुंडे यांचे संरक्षण भेटत असल्याचे स्पष्ट दिसत असल्याचे क्षीरसागर म्हणाले. 

मोबाईलचे सीडीआर तपासले तर सर्व काही समोर येईल 

वाल्मीक कराडचे हात एवढ्या वरपर्यंत असतील असं तुम्हाला वाटते का?  त्या काळातील मोबाईलचे सीडीआर तपासले तर सर्व काही समोर येईल असे क्षीरसागर म्हणाले. त्यावेळी प्रशासनाला फोन कोणी केले होते. आता जर काही व्यवहार तपासले तर यामागे वरदहस्त कोणाचा आहे? ते लक्षात येईल असे क्षीरसागर म्हणाले. ज्या पद्धतीने ही संपत्ती समोर येत आहे त्या पद्धतीने तपास झाला पाहिजे. 

वाल्मिक कराडच्या जामीन अर्जावर आज सुनावणी होणार

बीडमधील मस्साजोग गावचे सरपंच संतोष देशमुख हत्या प्रकरण गेल्या काही दिवसांपासून राज्यभरात चांगलेच चर्चेत आले आहे. पोलिसांकडून (Beed Police) या प्रकरणातील आरोपींना अटक करण्यात आली असून अद्याप कृष्णा आंधळे हा आरोपी फरार आहे. तसेच संतोष देशमुख हत्या प्रकरणात खंडणी प्रकरणातील आरोपी वाल्मिक कराडचा (Walmik Karad) सहभाग असल्याचा आरोप विरोधकांकडून सातत्याने केला जात आहे. काही दिवसांपूर्वी वाल्मिक कराडवर मकोकाअंतर्गत कारवाई करण्यात आलेली आहे. मकोकाअंतर्गत कारवाई करण्यात आल्यानंतर वाल्मिक कराडला 7 दिवसांची पोलीस कोठडी सुनावण्यात आली आहे. आज वाल्मिक कराडच्या जामीन अर्जावर केज जिल्हा व सत्र न्यायालयात (Kej Court) सुनावणी पार पडणार आहे. 

वाल्मिक कराडला खंडणीच्या गुन्ह्यामध्ये केज जिल्हा सत्र न्यायालयाने न्यायालयाने कोठडी सुनावल्यानंतर कराडच्या वकिलाने कोर्टामध्ये लगेच जामीन मिळण्यासाठी अर्ज केला होता. या अर्जाला सीआयडीकडून कोर्टामध्ये आव्हान देण्यात आले आहे. संतोष देशमुख यांच्या हत्येप्रकरणी मकोका लागलेल्या करडची सीआयडीला चौकशी करायची आहे. म्हणून वाल्मिक कराडला जामीन देऊ नये, अशी विनंती सीआयडीने कोर्टाकडे केली होती.  याच जामीन अर्जावर आज केजच्या जिल्हा व सत्र न्यायालयासमोर सुनावणी होणार आहे. या सुनावणीत न्यायालय काय निर्णय देणार? हे पाहणे महत्त्वाचे ठरणार आहे.  

महत्वाच्या बातम्या: