Minority Status Certificates: 75 शाळांच्या अल्पसंख्यांक दर्जाला मुख्यमंत्र्यांकडून स्थगिती, अधिकाऱ्यांची चौकशी होणार, 'एबीपी माझा'चा दणका

Minority Status Certificates: अजित पवार यांच्या अपघाती निधनानंतर अवघ्या काही तासांत मंत्रालयातून 75 शिक्षण संस्थांना अल्पसंख्यांक दर्जा देण्यात आल्याची माहिती समोर आल्याने खळबळ उडाली आहे.

Minority Status Certificates

Source : ABP Majha

Minority Status Certificates: राज्यातील शिक्षण संस्थांना अल्पसंख्यांक दर्जा देण्याची प्रक्रिया मागील वर्षी ऑगस्ट महिन्यापासून स्थगित करण्यात आली होती. मात्र, संबंधित खात्याची जबाबदारी सांभाळणारे उपमुख्यमंत्री अजित पवार यांच्या अपघाती निधनानंतर (Ajit Pawar Death Plane Crash) अवघ्या काही तासांत मंत्रालयातून 75 शिक्षण संस्थांना अल्पसंख्यांक दर्जा देण्यात आल्याची माहिती समोर आली आणि एकच खळबळ उडाली आहे.

विशेष म्हणजे 28 जानेवारी रोजी दुपारी तीन वाजून नऊ मिनिटांनी पहिलं प्रमाणपत्र जारी करण्यात आलं. त्या वेळी बारामती येथील मेडिकल कॉलेजमध्ये अजित पवार यांचा मृतदेह ठेवण्यात आलेला होता. राज्यात शोकसागर पसरलेला असताना आणि शासनाकडून शासकीय दुखवटा जाहीर असताना मंत्रालयातून गुपचूपपणे 75 संस्थांना प्रमाणपत्रे देण्यात आल्याचा आरोप होत आहे.

Minority Status Certificates: माझाच्या वृत्तानंतर सरकारकडून उच्चस्तरीय चौकशीचे आदेश 

एबीपी माझाने ही बाब उघडकीस आणल्यानंतर मुख्यमंत्री देवेंद्र फडणवीस यांनी या प्रकरणात उच्चस्तरीय चौकशीचे आदेश दिले. मात्र, ही चौकशी कोणाची होणार आणि नक्की ही चौकशी कोण करणार? याबाबत स्पष्टता नाही. यामुळेच “चौकशीच्या नावाने चालढकल तर होत नाही ना?” असा सवाल आता उपस्थित होऊ लागला आहे.

Minority Status Certificates: मिलिंद शेणॉय यांची चौकशी होणार का? 

रद्द करण्यात आलेल्या 75 प्रमाणपत्रांवर अल्पसंख्यांक विभागाचे उपसचिव मिलिंद शेणॉय यांची सही असल्याचे समोर आले आहे. त्यामुळे या प्रकरणात मिलिंद शेणॉय यांची चौकशी होणार का? अस सवाल उपस्थित होत आहे. त्याचबरोबर अल्पसंख्यांक विभागातील कोण-कोण अधिकारी यात सहभागी आहेत? हे देखील समोर येण्याची गरज आहे. मुख्यमंत्री देवेंद्र फडणवीस यांनी उच्चस्तरीय चौकशीचे आदेश दिले असले तरी राज्य सरकार या प्रकरणातील संपूर्ण सत्य जनतेसमोर आणणार का? संबंधित अधिकाऱ्यांवर कारवाई होणार का? की चौकशीच्या नावाखाली वेळ काढली जाणार? याकडे सर्वांचे लक्ष लागले आहे. 

Minority Department: चार दिवसांत 75 प्रमाणपत्रांचे वाटप

- श्री माता कन्यका सेवा संस्था – 28 जानेवारी रोजी दुपारी 3.09 वाजता प्रमाणपत्र

- सेवादास महाराज शिक्षण प्रसारक मंडळ, यवतमाळ – 28 जानेवारीलाच प्रमाणपत्र

- 28 जानेवारी रोजी एकूण 7 संस्थांना प्रमाणपत्रे

- 29 व 30 जानेवारीला मोठ्या शिक्षण संस्थांना प्रमाणपत्र वाटप

- 1 फेब्रुवारी (रविवार) – कोणतेही प्रमाणपत्र नाही

- 2 फेब्रुवारीला पुन्हा अनेक शाळांना अल्पसंख्यांक दर्जा

- ऑगस्टपासून एकही प्रमाणपत्र नाही, मात्र फक्त चार दिवसांत तब्बल 75 प्रमाणपत्रे

- अनेक शाळांना शासकीय कामकाजाची वेळ संपल्यानंतर सायंकाळी 6.45, 6.58 वाजता प्रमाणपत्रे

- 75 पैकी 25 शाळा पोदार इंटरनॅशनल स्कूलच्या, त्यांनाही 29 जानेवारी या एकाच दिवशी दर्जा

- सेंट झेवियर्सच्या 5 शाळांना अल्पसंख्यांक दर्जा

- स्वामी शांती प्रकाश व देवप्रकाश संस्थांच्या 4 शाळांना प्रमाणपत्रे

सूत्रांनी दिलेल्या माहितीनुसार, माणिकराव कोकाटे, दत्तात्रय भरणे आणि अजित पवार यांनी यापूर्वी ही प्रमाणपत्रे रोखून धरली होती. मात्र, त्यांच्या निधनानंतर अचानक ही प्रक्रिया सुरू करण्यात आल्याचा आरोप होत आहे.

आणखी वाचा