INS Vikrant Case Kirit Somaiya : किरीट सोमय्या आज आर्थिक गुन्हे विभागात चौकशीसाठी हजर राहणार, सलग 4 दिवस होणार चौकशी

INS Vikrant आर्थिक अपहार प्रकरणात समन्स बजावूनही चौकशीला हजर न झालेले किरीट सोमय्या आणि मुलगा नील सोमय्या हे देशाबाहेर पळून जाण्याच्या तयारीत असल्याचा गंभीर आरोप संजय राऊत यांनी केला होता

kirit_somaiya

INS Vikrant Case Kirit Somaiya : आयएनएस विक्रांत प्रकरणी अडचणीत सापडलेले भाजपचे नेते भाजप नेते किरीट सोमय्या (Kirit Somaiya) आज आर्थिक गुन्हे विभागात चौकशीसाठी हजर राहणार आहेत. विक्रांत घोटाळ्याबाबत सलग चार दिवस त्यांची चौकशी होणार आहे. याबरोबरच किरीट सोमय्या  मुंबई मनपा कोरोना केस संदर्भात आझाद मैदान पोलीस ठाण्यात देखील जाणार असल्याचे समजत आहे. 

ट्रॉम्बे पोलिस ठाण्यात सोमय्यांविरोधात पहिला गुन्हा दाखल

किरीट सोमय्या आज चौकशीला हजर राहणार आहेत. चौकशीला हजर राहण्यासाठी सोमय्यांना आर्थिक गुन्हे शाखेकडून समन्स बजावण्यात आले होते. ट्रॉम्बे पोलीस ठाण्यात किरीट सोमय्यांविरोधात पहिला गुन्हा दाखल करण्यात आला होता. त्यानंतर तो खटला आर्थिक गुन्हे शाखेकडे वर्ग करण्यात आला. काही दिवसांपूर्वी आर्थिक गुन्हे शाखेने किरीट सोमय्या आणि निल सोमय्या या दोघांनाही चौकशासाठी नोटीस पाठवली आहे. मात्र, सोमय्या पिता-पुत्र चौकशीसाठी न येता त्यांच्या वकिलांना पाठवत असल्याचे समोर आले होते. मागच्या वेळेस किरीट सोमय्या चौकशीसाठी हजर नव्हते, तेव्हा त्यांना फरार घोषित करण्याची प्रक्रिया सुरू झाली होती. त्यामुळे आज किरीट सोमय्या यांना चौकशीसाठी हजर राहावं लागणार आहे. 

संजय राऊतांचे गंभीर आरोप

आयएनएस विक्रांत आर्थिक अपहार प्रकरणात समन्स बजावूनही चौकशीला हजर न झालेले भाजप नेते किरीट सोमय्या आणि त्यांचा मुलगा नील सोमय्या हे देशाबाहेर पळून जाण्याच्या तयारीत असल्याचा गंभीर आरोप शिवसेना नेते संजय राऊत (Sanjay Raut) यांनी केला. आयएनस विक्रांत युद्धनौका वाचवण्याच्या नावाखाली पैसे गोळा करण्यात आले. हे प्रकरण लहान नाही. या प्रकरणाची व्याप्ती खूप मोठी आहे. त्यामुळे आता या प्रकरणात किरीट सोमय्या यांना वाचवण्यासाठी बनावट पुरावे तयार केले जाऊ शकतात, अशी भीतीही संजय राऊत यांनी एका पत्रकार परिषदेत व्यक्त केली.

अटकपूर्व जामीन अर्ज कोर्टाने फेटाळला

आयएनएस विक्रांत बचाव घोटाळ्याप्रकरणी किरीट सोमय्या यांचा अटकपूर्व जामीन अर्ज मंगळवारी कोर्टाने फेटाळला. त्यामुळे त्यांच्यांवर अटकेची टांगती तलवार आहे. त्यानंतर आर्थिक गुन्हे शाखेने किरीट सोमय्या आणि निल सोमय्या यांना एक नोटीस पाठवली आहे. त्यात सोमय्या पितापुत्रांना चौकशीसाठी बुधवारी बोलवण्यात आले होते. किरीट सोमय्या जर आज चौकशीसाठी हजर राहिले नाही, तर त्यांना फरार घोषित करण्यात येईल, असा इशाराही गुन्हे शाखेने दिला आहे.