MahaRERA Results : रिअल इस्टेट एजंट्सच्या पहिल्या परीक्षेचा निकाल जाहीर, 96 टक्के एजंट्स उत्तीर्ण
रिअल इस्टेट एजंट्ससाठी 20 मे रोजी घेण्यात आलेल्या परीक्षेमध्ये 423 पैकी 405 उमेदवार यशस्वी झाले. ग्राहकहितासाठी एजंटसना अशी परीक्षा बंधनकारक करणारे महारेरा देशातील पहिलेच नियामक प्राधिकरण ठरले आहे.
मुंबई: स्थावर संपदा क्षेत्रातील एजंट्ससाठी म्हणजेच रिअल इस्टेट एजंट्साठी (MahaRERA Real Estate Agents Results) घेण्यात आलेल्या पहिल्या परीक्षेचा निकाल जाहीर झाला आहे. या परीक्षेमध्ये 423 पैकी 405 उमेदवार यशस्वी झाले असून 96 टक्के निकाल लागला आहे. 20 मे रोजी स्थावर संपदा क्षेत्रातील एजंट्ससाठी परीक्षा घेण्यात आली होती.
एजंट्स हे ग्राहक आणि विकासक यांच्यातील महत्वाचा दुवा आहेत. एजंट्सना ग्राहकांना विनियामक तरतुदींसह व्यवस्थित मार्गदर्शन करता यावे यासाठी विशिष्ठ प्रशिक्षणाच्या आधारे परीक्षा देऊन प्रमाणपत्र प्राप्त करणे बंधनकारक करणारे महाराष्ट्र स्थावर संपदा नियामक प्राधिकरण (MahaRERA) हे देशातील पहिलेच प्राधिकरण आहे.
राज्यात 20 मे रोजी मुंबई, ठाणे, नवी मुंबई, औरंगाबाद, धुळे, कोल्हापूर, नागपूर, नाशिक, पुणे आणि सोलापूर अशा 10 ठिकाणी झालेल्या परीक्षेत अपेक्षित 457 पैकी 423 उमेदवार प्रत्यक्षात परीक्षेला बसले होते. या निकालाचे महत्वाचे वैशिष्ठ असे की यात तब्बल पाच उमेदवारांनी 90 टक्के गुण मिळवून संयुक्तपणे गुणानुक्रमे पहिले स्थान मिळवले आहे. याशिवाय या यशस्वी उमेदवारांत 405 पैकी 36 उमेदवार हे 60 वर्षांवरील आहेत. यातही 6 उमेदवार 70 वर्षांवरील असून या सर्वांनी 70 टक्क्यांवर गुण मिळवले आहेत. यांच्यात मुंबईतील एस.एम. मालदे हे सर्वात ज्येष्ठ उमेदवार असून ते 74 वर्षांचे आहेत.
या यशस्वी 405 उमेदवारांत 37 महिला उमेदवारही आहेत. गुणानुक्रमे संयुक्तपणे पहिल्या आलेल्यात पुण्यातील गीता छाब्रिया या पहिल्या स्थानावर आहेत.
महारेराने 10 जानेवारी 23 च्या आदेशान्वये एजंटसच्या नवीन नोंदणी आणि नूतनीकरणासाठी प्रशिक्षण घेऊन विहीत प्रमाणपत्र प्राप्त केलेले असणे बंधनकारक केलेले आहे. तसेच सध्याच्या सुमारे 39 हजार एजंटसनाही 1 सप्टेंबरपूर्वी हे प्रशिक्षण पूर्ण करून प्रमाणपत्र प्राप्त करावे लागणार आहे.
स्थावर संपदा क्षेत्रातील 'एजंट' हा घर खरेदीदार आणि विकासक यांच्यातील अत्यंत महत्त्वाचा दुवा आहे . बहुतेकवेळा ग्राहक पहिल्यांदा एजंटसच्याच संपर्कात येतात. ग्राहकांना प्रकल्पाच्या अनुषंगाने प्राथमिक माहिती त्यांच्याकडूनच मिळते. एजंटसचे हे महत्त्व लक्षात घेऊन या क्षेत्रात कार्यरत सर्व एजंटसना रेरा कायद्यातील महत्वाच्या तरतुदी माहीत असायला हव्यात. त्यांच्याकडून ग्राहकाला आदर्श विक्री करार (Agreement for Sale), घर नोंदणी केल्यानंतर दिले जाणारे नोंदणी पत्र (Allotment letter) चटई क्षेत्र, दोष दायित्व कालावधी अशासारख्या विनियामक तरतुदींची प्राथमिक माहिती देताना त्यात समानता, सातत्य आणि स्पष्टता असायला हवी. या माहितीच्या आधारेच ग्राहक घरखरेदीचा निर्णय घेतात. म्हणून ग्राहकहित डोळ्यासमोर ठेवूनच महारेराने हे प्रशिक्षण आणि प्रमाणपत्र बंधनकारक केलेले आहे.
ही संबंधित बातमी वाचा:
महत्त्वाच्या बातम्या
