ST Bank : एसटी बँक कर्मचाऱ्यांच्या कष्टाच्या पैशांनी उभी, सरकार आणि सदावर्तेंमुळे ती अडचणीत आली; श्रीरंग बरगे यांचा आरोप
Gunaratna Sadavarte : एसटी बँकेचे व्यवहार गेल्या पाच महिन्यांपासून ठप्प असून त्याला गुणरत्न सदावर्ते जबाबदार असल्याचा आरोप महाराष्ट्र एसटी कर्मचारी काँग्रेसने केला आहे.
मुंबई: एसटी बँक (State Transport Co Operative Bank) ही राज्यभरातील 62 हजार कर्मचाऱ्यांच्या कष्टाच्या पैशातून उभी आहे, पण सदावर्तेंच्या (Gunaratna Sadavarte) हुकूमशाहीमुळे आणि राज्य सरकारच्या वेळकाढूपणामुळे ती अडचणीत आल्याचा आरोप महाराष्ट्र एसटी कर्मचारी काँग्रेसचे सरचिटणीस श्रीरंग बरगे यांनी केला. सदावर्तेंच्या पॅनेलची सत्ता असलेल्या एसटी बँकेचे नवीन संचालक व्यवस्थापकीय संचालकांच्या कार्यपद्धतीवर नाराज असल्याची चर्चा आहे.
महाराष्ट्र एसटी कर्मचारी काँग्रेसचा आरोप काय?
बॅंकेचा सीडी रेशो वाढून तो 95 टक्क्यांच्या वरती पोहोचला आहे. एसटी बँक मोठी आहे, तिचे राज्यभरात 62 हजार सदस्य आहेत. एसटी कर्मचाऱ्यांच्या कष्टाच्या पैशाने ही बॅंक उभी राहिली आहे. गुणरत्न सदावर्तेंची हुकुमशाही याला जबाबदार आहे. राजकीय लाभ व्हावा याचा प्रयत्न त्यांनी केला. सदावर्तेंना व्यवस्थपकीय संचालकाचा कोणताही अनुभव देखील नाही. अनुभव नाही ही गोष्ट नियमाला देखील धरुन नाही
बॅंकेचे व्यवहार गेल्या पाच महिन्यांपासून ठप्प आहेत. डिपॉझिटच्या प्रमाणात कर्ज द्यायचं असतं, मात्र तो डोलारा सांभाळला गेला नाही. संचालक मंडळातील सदस्य पुढे आले असेल तर चांगली गोष्ट आहे. त्यांनी घेतलेला हा निर्णय बॅंकेच्या हिताचा आहे. त्यांना हे करण्यासाठी प्रोत्साहन दिलं यांचे देखील अभिनंदन करतो. आनंदराव अडसूळ यांच्या संघटनेकडून आरबीआय आणि सहकार खात्याला अनेक तक्रारी केल्या गेल्या. पण सरकारनं वेळकाढूपणा केला. त्यामुळे बॅंकेच्या अडचणीत वाढ झाली. हे आधीच सहकार खाते आणि आरबीआयसमोर आले असते तर बॅंकेच्या अडचणीत वाढ झाली नसती.
नवे संचालक मंडळ सदावर्तेंच्या कार्यप्रणालीवर नाराज
सदावर्तेंच्या पॅनलची सत्ता असलेल्या एसटी बँकेच्या म्हणजेच द स्टेट ट्रान्सपोर्ट को-ऑप बँकेच्या अडचणीत वाढ होण्याची शक्यता आहे. कारण बँकेचं जे नवं संचालक मंडळ आहे, ते बँकेत सुरु असलेल्या कारभारावरुन व्यवस्थापकीय संचालकांवर नाराज असल्याची माहिती सूत्रांनी दिली. दरम्यान बँकेचे व्यवस्थापकीय संचालक हे गुणरत्न सदावर्ते (Gunaratna Sadavarte) यांचे जवळचे नातेवाईक असल्याची माहिती आहे.
एसटी बँक अचडणीत येण्याची शक्यता
अभ्युदय बँकेपाठोपाठ आता सदावर्तेंच्या पॅनेलची सत्ता असलेली द स्टेट ट्रान्सपोर्ट को ऑपरेटिव्ह बँकही अडचणीत येण्याची शक्यता आहे. नवं संचालक मंडळ आल्यापासून 466 कोटींच्या ठेवी काढल्या. बँकेचा सीडी रेशो 95 टक्क्यांच्या वर गेलाय. त्यामुळे अडचणीत वाढ होणार आहे. सर्वसाधारण को-आॅपरेटिव्ह बॅंकेचा सीडी रेशो 60 ते 70 टक्क्यांमध्ये पाहायला मिळतो. सीडी रेशोत अजून वाढ झाल्यास बचत खात्यातील पैसे काढण्यावर देखील मर्यादा येऊ शकतात. राजीनामा दिलेल्या आणि एसटीमधून निवृत्त झालेल्या अंदाजे 3 हजार सभासदांची देणी पैसे नसल्याने मिळालेली नाहीत असा काही सभासदांनी आरोप केला आहे.
ही बातमी वाचा:
महत्त्वाच्या बातम्या
ट्रेंडिंग न्यूज
