Nashik News : राज्यात अहमदनगर जिल्हा जात प्रमाणपत्र पडताळणी समिती अव्वल ! नाशिक जिल्हा समिती पाचव्या स्थानी

Nashik News : अहमदनगर (Ahmednagar) जिल्हा जात प्रमाणपत्र समितीने राज्यात सर्वाधिक प्रकरणे निकाली काढली आहेत.

Nashik Cast Validity

Nashik News : राज्यात 17 सप्टेंबर 2022 पासून जात वैधता प्रमाणपत्राच्या (cast certificate) जलद वितरणासाठी विशेष मोहीम राबविण्यात येत आहे. या मोहिमेंतर्गंत अहमदनगर जिल्हा जात प्रमाणपत्र समितीने सर्वाधिक 6344 प्रकरणे निकाली काढत राज्यात अव्वल स्थानावर झेप घेतली आहे. मुख्यमंत्री एकनाथ शिंदे (CM Eknath Shinde) यांनी जिल्हा जात पडताळणी (cast Validity) समितीच्या या उल्लेखनीय कामकाजाचे कौतुक केले आहे. 

राज्यातील जिल्हा जात प्रमाणपत्र पडताळणी समितींच्या कामकाजावर बार्टी (BARTI) या स्वायत्त संस्थेचे नियंत्रण आहे. बार्टीने 17 सप्टेंबर, 2022 सेवा पंधरवडा कालावधी सुरू झाल्यापासून ते 8 नोव्हेंबर 2022 पर्यंत राज्यात निर्गमित करण्यात आलेल्या प्रकरणांची जिल्हा समिती निहाय आकडेवारी जाहीर केली आहे. यानुसार अहमदनगर जिल्हा समिती अव्वलस्थानी आहे.  त्याखालोखाल नागपूर समितीने 4956 प्रकरणे निकाली काढली आहेत. नाशिक विभागातील नाशिक समितीने 4280 प्रकरणे निकाली काढत पाचवे स्थान पटकाविले आहे. जळगाव समितीने 3490  प्रकरणे निकाली काढत आठवे स्थान गाठले आहे. 

अहमदनगर जिल्हा जात प्रमाणपत्र पडताळणी समितीने सेवा पंधरवड्यानिमित्ताने राबविलेल्या विविध उपक्रमांच्या माध्यमातून 1734 जातवैधता पडताळणी प्रमाणपत्रांचे विद्यार्थ्यांना महाविद्यालयात जाऊन वाटप केले. जिल्ह्यातील 11 महाविद्यालयांमधील प्राचार्य व कर्मचाऱ्यांना जातवैधता प्रमाणपत्र पडताळणीच्या ऑनलाईन प्रक्रियेविषयी मार्गदर्शन केले. जातप्रमाणपत्र वाटप करतांना त्रुटी राहू नयेत म्हणून जिल्ह्यातील सर्व उपविभागीय अधिकारी व तहसीलदार यांची ऑनलाईन वेबनार द्वारे कार्यशाळा घेण्यात आल्या. जातवैधता प्रमाणपत्रासाठी अर्ज कसे भरावेत? त्यासोबत कोणती कागदपत्रे जोडणे आवश्यक आहे?  शाळा, महाविद्यालय यांनी कोणती उपाययोजना करणे आवश्यक आहे? विद्यार्थ्यांनी परिपूर्ण प्रस्ताव कशा प्रकारे सादर करावेत? ऑनलाइन अर्जांचा भरणा कसा करावा? त्यानंतर काय प्रक्रिया अंवलबिण्यात यावी. या विषयांवर साध्या व सोप्या भाषेत विद्यार्थी, पालक, प्राचार्य व कर्मचाऱ्यांना मार्गदर्शन करण्यात आले. राहाता, संगमनेर, नेवासा, श्रीगोंदा, पारनेर व कोपरगाव या याठिकाणी 2 ते 3 तालुक्यांच्या समावेशासह कार्यशाळा घेण्यात आल्या. कार्यशाळेतील मार्गदर्शनाचा व प्रमाणपत्र वितरणाचा लाभ जिल्ह्यातील 111 महाविद्यालयांमधील प्राचार्य, कर्मचारी व विद्यार्थ्यांनी  घेतला.  

समितीवर तीन सदस्यांचा समावेश 
https://bartievalidity.maharashtra.gov.in या संकेतस्थळावर सर्वसामान्य नागरिक व विद्यार्थ्यांना जातपडताळणी प्रमाणपत्रासाठी अर्ज करता येतो. निवडणूक, सेवा व शैक्षणिक कारणास्तव जातपडताळणी समित्यांकडे अर्ज करता येतो. समाजकल्याण विभागाच्या अंतर्गत कार्यरत असलेल्या या समित्यांकडे एससी, ओबीसी, एसबीसी, व्हीजेएनटी या जातप्रवर्गासाठी अर्ज करता येतो. ही प्रक्रिया ऑनलाईन झाल्याने कामात तत्परता आली आहे. अहमदनगर जिल्हा जात पडताळणी समितीवर तीन सदस्यांचा समावेश आहे‌. सध्या अहमदनगर समितीत अध्यक्ष म्हणून अपर जिल्हाधिकारी (निवड श्रेणी) विकास मारूती पानसरे, सदस्य तथा उपायुक्त अमीना शेख व सदस्य सचिव तथा संशोधन अधिकारी भागवत खरे हे कामकाज पाहतात. याशिवाय समितीला क्षेत्रीय चौकशीकामी सहाय्य करण्यासाठी पोलीस उपअधीक्षक, पोलीस निरीक्षक, पोलीस शिपाई यांचा समावेश असलेले दक्षता पथक कार्यरत असते.