Maharashtra Breaking News 15 June 2022 : अलिबाग शहरालगत असलेल्या पीएनपी नाट्यगृहाला आग

Maharashtra News LIVE Updates : दिवसभरातील ताज्या घडामोडी, महत्त्वाचे अपडेट्स, देशभरासह राज्यातील कोरोना संबंधित, राजकीय, सामाजिक, आर्थिक, क्रीडा तसेच इतर अपडेट्स या लाईव्ह ब्लॉगमध्ये...

Background

Maharashtra News LIVE Updates : दिवसभरातील ताज्या घडामोडी, महत्त्वाचे अपडेट्स, देशभरासह राज्यातील कोरोना संबंधित, राजकीय, सामाजिक, आर्थिक, क्रीडा तसेच इतर अपडेट्स या लाईव्ह ब्लॉगमध्ये..

आज दिवसभरात घडणाऱ्या काही पूर्वनियोजित घटना,कार्यक्रम असतातच.. त्याचाच दिवसभरात विस्तार होतो. त्या घटना-घडामोडींची पार्श्वभूमी-पूर्वपिठिका हाताशी असल्यावर या घटना-घडामोडी समजून घेणं सोपं होतं. आज दिवसभरातल्या कोणत्या महत्वाच्या बातम्यांवर आमचं लक्ष असेल किंवा महत्वाच्या घडामोडी आम्ही तुमच्यापर्यंत सविस्तर पोहोचवू याची ही थोडक्यात उजळणी... या नियोजित-घटना कार्यक्रमांसोबतच आयत्यावेळी येणाऱ्या घडामोडीही आम्ही तुमच्यापर्यंत पोहोचवू.

आज आदित्य ठाकरेंचा अयोध्या दौरा
राज्याचे मंत्री आणि शिवसेनेचे नेते आदित्य ठाकरे आज अयोध्या दौऱ्यावर असून आज ते अयोध्येत दाखल होणार आहेत. राज ठाकरेंचा अयोध्या दौरा रद्द झाल्यानंतर आदित्य ठाकरेंचं मात्र अयोध्येत स्वागत केलं जाणार आहे. या दौऱ्याच्या वेळी आदित्या ठाकरे हनुमान गढीचं दर्शन घेणार असून प्रभू श्री रामाचं दर्शन करणार आहेत. संध्याकाळी 6.45 वाजता शरयू नदीच्या घाटावर आरती करणार आहेत. 

आज सलग तिसऱ्या दिवशी राहुल गांधींची चौकशी सुरु राहणार
सूत्रांच्या माहितीनुसार राहुल गांधींना आज सलग तिसऱ्या दिवशी ईडीनं चौकशीसाठी बोलावलं आहे. सोमवार आणि मंगळवार असे दोन दिवस राहुल गांधींची नॅशनल हेराल्ड प्रकरणी ईडी चौकशी झाली. दोन्ही दिवस सुमारे 10 तास त्यांची चौकशी  करण्यात आली. 

राष्ट्रपतीपदासंदर्भात ममता बॅनर्जींनी बोलावली बैठक
राष्ट्रपतीपदाबाबत चर्चेसाठी ममता बॅनर्जींनी 22 पक्षांची बैठक बोलावली आहे. यासाठी शरद पवारांसह देशभरातील नेत्यांना निमंत्रण देण्यात आलं आहे. राष्ट्रपतीपदाबाबत विरोधी पक्षाची एकजूट करण्यासाठी दिल्लीत बैठक होणार आहे. या बैठकीला विरोधी पक्षातील 22 पक्षांतील सदस्य सहभागी होणार असल्याची माहिती आहे. या बैठकीत राष्ट्रपती पदासाठी नेमका कोण उमेदवार असेल हे स्पष्ट होणार आहे. बैठकीसाठी पश्चिम बंगालच्या मुख्यमंत्री ममता बॅनर्जी यांनी पुढाकार घेतला आहे आणि त्यांनीच विरोधी पक्षांतील नेत्यांना पत्र लिहिलं आहे. सोनिया गांधी, उद्धव ठाकरे, स्टॅलिन, के चंद्रशेखर राव, नवीन पटनायक, अखिलेश यादव, शरद पवार, केजरीवाल, लालू प्रसाद यादव यांच्यासह 22 नेत्यांना बैठकीसाठी निमंत्रण पाठवण्यात आलं आहे. 

राष्ट्रपतीपदाच्या निवडणुकीसाठी आज अधिसूचना जारी होणार
18 जुलैला होणाऱ्या राष्ट्रपती निवडणुकीसाठी आज अधिसूचना जारी होणार आहे. 29 जूनपर्यंत नामांकन दाखल करण्याची शेवटची तारीख असेल. 18 जुलैला मतदान होईल. तर 21 जुलैला मतमोजणी होणार आहे. जर एकापेक्षा जास्त उमेदवार असतील तरच मतदानाची वेळ येईल. 24 जुलैला राष्ट्रपती रामनाथ कोविंद यांचा कार्यकाळ संपणार आहे. 

आजपासून प्राथमिक आणि माध्यमिक विभागाच्या शाळा सुरु
उन्हाळ्याच्या सुट्टीनंतर आज शाळेची पहिली घंटा वाजणार आहे. आजपासून राज्यातील सगळ्या एसएससी बोर्डाच्या शाळा सुरु होणार आहेत. पहिली ते दहावीच्या शाळा आजपासून सुरु होतील. 

भाजपचा फडणवीस, दानवेंच्या नेतृत्वात जालन्यात जल आक्रोश मोर्चा
जालना शहरालातील पाणी प्रश्न, रखडलेल्या विकास कामासह इतर मुद्द्यावर सरकारचे लक्ष वेधण्यासाठी भाजपकडून जल आक्रोश मोर्चा काढण्यात येणार आहे. शहरातील मामा चौकातून हा मोर्चा निघून नागरपालिकेवर धडकणार आहे. या मोर्चाला राज्याचे विरोधी पक्षनेते देवेंद्र फडणवीस आणि केंद्रीय मंत्री रावसाहेब दानवे उपस्थित राहणार आहेत.

अनिल परब यांना ईडीचं समन्स
अनिल परब यांना ईडीचं समन्स बजावण्यात आला आहे. त्यांना आज चौकशीसाठी बोलावण्यात आलं आहे. दापोली रिसॉर्ट प्रकरणी अनिल परबांना आज पुन्हा ईडीकडून समन्स बजावण्यात आलं आहे. याआधी 26 मे ला ईडीच्या पथकानं अनिल परबांच्या घरी येऊन त्यांची चौकशी केली होती. आता परत त्यांना समन्स बजावण्यात आला आहे. 

मलिक आणि देशमुखांना विधानपरिषद निवडणुकीत मतदानाची परवानगी मिळणार?
मलिक आणि देशमुखांना विधानपरिषद निवडणुकीत मतदानाची परवानगी यासाठी न्यायालयात अर्ज करण्यात आला आहे. दोघांच्या याचिकेवर उच्च न्यायालयात आज एकत्रित सुनावणी होणार आहे. 20 तारखेला होणाऱ्या विधान परिषदेच्या मतदानाच्या परवानगीसाठी देशमुख आणि मलिकांनी उच्च न्यायालयात याचिका केली होती. मलिक आणि देशमुख सध्या न्यायालयीन कोठडीत आहेत. राज्यसभेच्या मतदानासाठी न्यायालयानं या दोघांना परवानगी नाकारली होती.

सुहास कांदेंच्या याचिकेवर आज सुनावणी
शिवसेना आमदार सुहास कांदे यांनी मुंबई उच्च न्यायालयात याचिका दाखल केली आहे. राज्यसभा निवडणुकीत त्यांचे मतदान रद्द करण्याच्या केंद्रीय निवडणूक आयोगाच्या निर्णयाला कांदेंनी आव्हान दिलंय. "निवडणूक आयोगाने माझी बाजू न ऐकताच निर्णय दिला आहे तो मला मान्य नाही", असा दावा कांदेंनी केलाय. या याचिकेवर आज हायकोर्टात सुनावणी होणार आहे.

केतकी चितळेच्या याचिकेवर आज सुनावणी
केतकी चितळेच्या याचिकेवर आज सुनावणी होणार आहे. न्यायालयानं यावरुन राज्य सरकारला खडसावलं होतं. सोशल मीडिया पोस्टवरून गुन्हे दाखल करत जाणं योग्य आहे का?, महिनाभर एका तरूणाला तुरूंगात डांबून ठेवणं हे पद्मविभूषण शरद पवारांना तरी आवडेल का? असे सवाल मुंबई उच्च न्यायालयाने राज्य सरकारला केले आहेत. आता गुन्हा रद्द करत या तरूणांना वाईट मार्गापासून परावृत्त करायला हवं, असं मत उच्च न्यायालयानं व्यक्त केलंय. शरद पवारांविरोधात पोस्ट करणाऱ्या नाशिकमधील तरूणाची गुन्हा रद्द करण्यासाठी उच्च न्यायालयात याचिका केली होती. याचसंदर्भात मराठी कलाकार केतकी चितळेच्या याचिकेवर आज सुनावणी होणार आहे.

कांजूरमार्ग मेट्रो कारशेड संदर्भातील एका याचिकेवर मुंबई उच्च न्यायालय निकाल देणार
एका खासगी कंपनीला बहाल केलेल्या मालकी अधिकाराला राज्य सरकारकडून आव्हान देण्यात आलंय. मालकी हक्काचा आदेश न्यायालयाची दिशाभूल करून मिळवल्याचा राज्य सरकारचा आरोप आहे. ऑक्टोबर 2020 मध्ये कांजूरमार्ग परिसरातील 6 हजार एकर जमीन 'आदर्श वॉटर पार्क अँड रिसॉर्ट' या खासगी कंपनीला देण्याचे आदेश उच्च न्यायालयानं दिले होते. या जागेवर केंद्र सरकारनंही आपला मालकी हक्क सांगितल्यानं मेट्रो कारशेडच्या कामाला न्यायालयानं स्थगिती दिली आहे- अमेय 

राणा दांपत्य आज सत्र न्यायालयात हजर राहणार
हनुमान चालीसा प्रकरण आणि राजद्रोहाच्या गुन्ह्याबाबत राणा दांपत्य मुंबई सत्र न्यायालयात हजर राहणार आहे. खासदार नवनीत राणांनी मुंबई पोलिसांनी अटकेत असताना आक्षेपार्ह वागणूक दिल्याची तक्रार लोकसभा विशेषाधिकार समितीकडे केली होती. या प्रकरणी या समितीनं राज्याचे मुख्य सचिव मनुकुमार श्रीवास्तव, डीजीपी रजनीश सेठ, पोलिस कमिशनर संजय पांडेंना बोलावलं आहे. 

19:34 PM (IST)  •  15 Jun 2022

नुपुर शर्मा यांच्यावर बीड मध्ये गुन्हा दाखल

भाजपच्या प्रवक्त्या नुपूर शर्मा यांनी काही दिवसांपूर्वी मोहम्मद पैगंबर यांच्याबद्दल आक्षेपार्ह वक्तव्य केलं होतं आणि त्यानंतर संपूर्ण देशभर याचे पडसाद उमटले होते. बीड निपुर शर्मा यांच्या विरोधामध्ये रोष व्यक्त करत बीड मध्ये देखील मुस्लिम बांधवांनी नुपुर शर्मा यांच्यावर गुन्हा दाखल करण्यात यावा अशी मागणी बीडच्या पोलिस अधीक्षकांकडे केली होती. त्यानंतर आता बीडच्या शहर पोलीस ठाण्यामध्ये सय्यद अजीम यांच्या फिर्यादीवरून कलम 505 आणि 295 अ नुसार नुपूर शर्मा यांच्यावर गुन्हा दाखल करण्यात आला आहे. 

 

 

19:15 PM (IST)  •  15 Jun 2022

महाराष्ट्र राज्य पोलीस दलातील कर्मचाऱ्यांसाठी खूषखबर 

महाराष्ट्र राज्य पोलीस दलातील कर्मचाऱ्यांसाठी खूषखबर... पोलीस उपनिरीक्षक पदाच्या 250 पदांच्या नियुक्तीसाठी लवकरच परीक्षा होणार आहे. 

 

सहायक पोलीस उपनिरीक्षक, पोलीस हवालदार, पोलीस नाईक व 
पोलीस शिपाई यांना मिळणार संधी

पोलीस उपनिरीक्षक मर्यादित 
विभागीय स्पर्धा मुख्य परीक्षा- २०२१चे आयोजन

18:55 PM (IST)  •  15 Jun 2022

विधान परिषद निवडणुकीच्या अनुषंगाने काँग्रेसची विधानभवनात बैठक सुरू

विधान परिषद निवडणुकीच्या अनुषंगाने काँग्रेसची विधानभवनात बैठक सुरू

बैठकीला काँग्रेसचे मंत्री अशोक चव्हाण, बाळासाहेब थोरात, अस्लम शेख, विजय वडेट्टीवार, वर्षा गायकवाड उपस्थित

मागील अर्ध्या तासापासुन विधानभवनात बैठकीला सुरुवात

बैठकी मध्ये आगामी निवडणुकीच्या अनुषंगाने रणनीती बाबत चर्चा सुरू

18:47 PM (IST)  •  15 Jun 2022

Aurangabad : काँग्रेसकडून मोदींचा पुतळा जाळला

Aurangabad News: काँग्रेस नेते राहुल गांधी आणि सोनिया गांधी यांच्यावर ईडीकडून करण्यात येत असलेल्या कारवाईच्या निषेधार्थ औरंगाबादमध्ये युवक काँग्रेस आक्रमक होताना पाहायला मिळाली. या कारवाईचा निषेध करण्यासाठी युवक काँग्रेसकडून पंतप्रधान नरेंद्र मोदी आणि ईडीचा संयुक्त पुतळा जाळण्यात आला. यावेळी भाजप विरोधात घोषणाबाजी सुद्धा करण्यात आली. 

17:32 PM (IST)  •  15 Jun 2022

Alibagh Fire : अलिबाग शहरालगत असलेल्या पीएनपी नाट्यगृहाला आग

अलिबाग शहरालगत असलेल्या पीएनपी नाट्यगृहाला आग लागली आहे. या आगीनंतर परिसरात धुराचे लोट पसरले आहेत. अग्निशमन दलाच्या गाड्या घटनास्थळी दाखल झाल्या असून आग विझविण्याचा प्रयत्न सुरू आहेत.