Devendra Fadnavis : हरित उर्जेच्या माध्यमातून महाराष्ट्रातील शेतकरी दुसरी हरित क्रांती घडवतील, देवेंद्र फडणवीसांचा विश्वास
Devendra Fadnavis : मुख्यमंत्री सौर कृषी वाहिनी योजना 2.0 ची सुरुवात करण्यात आली आहे. यावेळी वीजबिल माफीसोबतच दिवसा विजेचे स्वप्न पूर्ण करणार असा विश्वास देवेंद्र फडणवीस यांनी व्यक्त केला.
मुंबई : राज्यभरात सौर उर्जेचा वापर करणारे सौर ग्राम तयार करण्यात येत आहेत. यामुळे शेतकऱ्यांना दिवसा वीज उपलब्ध होणार असून भविष्यात या हरित उर्जेच्या माध्यमातून महाराष्ट्रातील शेतकरी दुसरी हरित क्रांती घडवतील, असा विश्वास मुख्यमंत्री देवेंद्र फडणवीस यांनी व्यक्त केला.
मुंबईतील सह्याद्री अतिथीगृह येथे आयोजित कार्यक्रमात मुख्यमंत्री सौर कृषी वाहिनी प्रकल्प 2.0 अंतर्गत वाशिम जिल्ह्यातील उंबरठा आणि धाराशिव जिल्ह्यातील नारंगवाडी येथील प्रकल्पांचे लोकार्पण मुख्यमंत्र्यांच्या हस्ते दूरदृश्य प्रणालीद्वारे करण्यात आले. यावेळी मुख्य सचिव सुजाता सौनिक, ऊर्जा विभागाच्या अतिरिक्त मुख्य सचिव आभा शुक्ला, जलसंपदा विभागाचे अतिरिक्त मुख्य सचिव दीपक कपूर, गृहनिर्माण विभागाच्या अतिरिक्त मुख्य सचिव वल्सा नायर-सिंह, वित्त विभागाचे अतिरिक्त मुख्य सचिव ओ.पी. गुप्ता, सहकार विभागाचे अतिरिक्त मुख्य सचिव राजगोपाल देवरा, मुख्यमंत्र्यांच्या प्रधान सचिव अश्विनी भिडे, मुख्यमंत्र्यांचे सचिव डॉ. श्रीकर परदेशी यांच्यासह विविध विभागांचे प्रमुख उपस्थित होते.
काय म्हणाले देवेंद्र फडणवीस?
शेतकर्यांना एकूण 1600 मेगा वॅट इतकी वीज लागते. हे सर्व फिडर सौर उर्जेवर आणण्यासाठी राज्य शासनाने 2 वर्षांपूर्वी कार्यक्रम हाती घेतला होता. यामार्फत टप्प्या-टप्प्याने एक-एक गाव सौर ऊर्जित होते आहे.
शेतकर्यांना याआधी दिली जाणारी वीज सरकारला 7 रुपये प्रती युनिट पडत असून शेतकर्यांकडून यासाठी 1.5 रुपये आकारले जात असत. त्यामुळे सबसिडीचा बोजा सरकारवर पडत होता. या योजनेमुळे या वीजेसाठी आता केवळ 3 रुपये लागणार असल्याने मोफत विजेच्या योजनेचा सरकारवर बोजा पडणार नाही. यासोबतच या योजनेला पुढे देखील सातत्याने चालवता येणार आहे.
यावेळी मुख्यमंत्री सौर कृषी वाहिनी योजना 2.0 च्या मदतीने हरित उर्जेमार्फत शेतकरी आपल्या गावांमध्ये हरित क्रांती आणतील हा विश्वास मुख्यमंत्री फडणवीस यांनी व्यक्त केला. या कार्यक्रमाला उंबरठा आणि नारंगवाडी गावातील शेतकरी दूरदृश्य प्रणालीच्या माध्यमातून सहभागी झाले होते.
महत्त्वाच्या बातम्या
