Crime News : मृत महिलेची संपत्ती लुबाडण्याचा डाव; मन्नत बाबासह सात जणांविरोधात गुन्हा दाखल

कॅन्सरच्या तिसऱ्या स्टेजमध्ये असलेल्या रुग्णाला डॉक्टरांच्या सल्ल्याविरुद्ध आरोपींनी रुग्णालयातून बाहेर घेऊन जात बक्षीसपत्र आणि मृत्यूपत्र बनवून घेतले होते. चौकशीनंतर हा प्रकार उघडकीस आला.

symbolic image

Nagpur News : एका मृत कॅन्सरग्रस्ताची (Cancer Patient) मालमत्ता स्वतःच्या नावावर करण्याचे षडयंत्र रचल्याप्रकरणी सदर पोलिसांनी सात आरोपींविरुद्ध फसवणुकीचा गुन्हा दाखल केला आहे. आरोपींमध्ये भोपाळचे प्रसिद्ध मन्नत बाबा उर्फ संजयकुमार सिंग, देवीदास गावंडे (गड्डीगोदाम), गीता देवीदास गावंडे, धीरज गावंडे, कुणाल गावंडे, दिनेश आजारी (शिवाजीनगर), प्रमोद डवले (सुरेंद्रनगर) यांचा समावेश आहे.

याबाबत मोहननगर येथील रहिवासी प्रियांका शंभरकर यांनी तक्रार दाखल केली होती. प्रियांकाच्या वडिलांची मावशी कुसुम शंभरकर यांना मूलबाळ नव्हते. मध्य प्रदेश मंत्रालय (भोपाळ) येथे कार्यरत असलेल्या कुसुम शंभरकर यांनी प्रियंकाला बालपणी दत्तक घेतले होते. ते मूळचे नागपूरचे रहिवासी असल्याने त्यांची सर्व मालमत्ता नागपुरात आहे. प्रियांकाच्या संगोपनाची जबाबदारी कुसुम शंभरकर घेत होत्या. दरम्यान आरोपी मन्नत बाबाशी कुसुम शंभरकरची भोपाळमध्ये ओळख झाली. पूजेच्या निमित्ताने ती बाबाला भेटत असे. 2009मध्ये सेवानिवृत्त झाल्यानंतर कुसुम शंभरकर या नागपुरात एका घरात राहत होत्या. कॅन्सरमुळे त्यांना 9 सप्टेंबर 2021 रोजी त्यांना मानकापूर येथील खासगी रुग्णालयात दाखल करण्यात आले होते. त्यांचे 30 ऑक्टोबर 2021 रोजी निधन झाले.

तिसऱ्याच दिवशी मन्नत बाबा पोहोचला घरात

कुसुम शंभरकर यांच्यावर अंत्यसंस्कार झाल्यानंतर तिसऱ्या दिवशी पूजेच्या वेळी मन्नत बाबाने त्यांच्या घरी पोहोचून प्रियांकाची भेट घेतली. कुसुम यांनी मोहननगर येथील फ्लॅट व नारीचा प्लॉट माझ्या नावावर व बाबादीपसिंग नगर घर येथील मामा देवीदासचा मुलगा धीरज याच्या नावे केला असल्याचे सांगितले. मन्नत बाबाने केलेल्या या दाव्यानंतर प्रियांकाला आपल्याविरोधात काहीतरी मोठे षडयंत्र रचल्याचा संशय आला. चौकशीत त्यांना रुग्णालय प्रशासनाकडून समजले की कुसुम यांना 15 सप्टेंबर रोजी संजयकुमार सिंग उर्फ मन्नत बाबा आणि त्याच्या मामाच्या कुटुंबियांनी डॉक्टरांच्या सल्ल्याविरुद्ध अचानक रुग्णालयातून बाहेर काढले होते. कुसुम कॅन्सरच्या तिसऱ्या टप्प्यात असल्यामुळे त्यांना डॉक्टरांच्या देखरेखीखाली ठेवणे आवश्यक होते.

रुग्णालयातून बाहेर काढताच बक्षीसपत्र आणि मृत्यूपत्र

15 सप्टेंबर रोजी रुग्णालयातून बाहेर आणल्यावर दुसऱ्या दिवशी 16 सप्टेंबर रोजी मन्नत बाबाला त्याच्या नावावर फ्लॅट आणि प्लॉटचे गिफ्ट डीड केली. त्याच्या मामाच्या कुटुंबियांनी बाबाच्या संगनमताने आरोपी धीरजच्या नावे बाबादीपसिंग नगर येथे एक मजली घराचे मृत्यूपत्र केले होते. ही कागदपत्रे तयार करण्यासाठी इतर आरोपींनी मदत केली. यानंतर 16 सप्टेंबर रोजी कॅन्सरग्रस्त कुसुमला आरोपींनी गंभीर अवस्थेत रुग्णालयात दाखल केले. मात्र, प्रियांका आणि शंभरकर कुटुंबियांना कोणतीही माहिती देण्यात आली नाही.

आरोपींविरोधात गुन्हा दाखल

यासंदर्भात केलेल्या तक्रारीकडे पोलिसांनी गांभीर्याने लक्ष दिले नाही. अखेर एनजीओ कृती समिती आणि अॅड. व्ही.व्हगी. महंत यांनी न्यायालयात दाद मागितली. न्यायालयाने आरोपीविरुद्ध गुन्हा दाखल करण्याचे आदेश दिले आहेत. सदर पोलिसांनी आरोपीविरुद्ध कलम 406, 420, 468, 471 व 34 अन्वये गुन्हा दाखल केला आहे.

इतर महत्त्वाची बातमी