साताऱ्यातील दोन 'राजें'मधला संघर्ष मिटला! खासदार उदयनराजे-रामराजे नाईक निंबाळकरांची खास भेट!

रामराजे नाईक निंबाळकर आणि उदयनराजे भोसले या दोन्ही राजघराण्यांमध्ये गेल्या कित्येक महिन्यांपासून वाद टोकाला गेल्याचे चित्र संपूर्ण साताऱ्यासह महाराष्ट्राने पाहिले आहे.जे दोन राजे एकमेकांकडे कट्टर विरोधक म्हणून गेल्या काही महिन्यांपासून पाहत होते ते दोन राजे समोरासमोर बसून गप्पा मारताना दिसले.

सातारा : साताऱ्यातील रामराजे नाईक निंबाळकर आणि उदयनराजे भोसले या दोन्ही राजघराण्यांमध्ये गेल्या कित्येक महिन्यांपासून वाद टोकाला गेल्याचे चित्र संपूर्ण साताऱ्यासह  महाराष्ट्राने पाहिले आहे.  लोकसभा-विधानसभेच्या कालावधीत तर हा वाद खूप विकोपाला गेला होता. त्यात लोकसभा निवडणुकीच्या काळात तर उदयनराजे भोसले यांनी फलटण येथे रामराजे यांच्या निवासस्थानी जाऊन राडाही घातला होता. तशी नोंदही पोलीस ठाण्यात आहे. त्याचबरोबर दोन राजघराण्यातील संघर्षामुळे राजकीय वर्तुळात मोठी चर्चा सुरू होती.

उदयनराजे यांच्यामुळेच अनेकांनी भाजपची वाट स्वीकारली आणि राष्ट्रवादीला रामराम ठोकला अशी चर्चा मोठ्या प्रमाणात रंगताना पाहायला मिळाली. मात्र या दोन राजेंचा संघर्ष मिटला असे चित्र काल दिसले. रामराजे नाईक-निंबाळकर हे जिल्हा शासकीय निवासस्थानी म्हणजे सर्किट हाऊसमध्ये बसलेले असताना उदयनराजे भोसले हे अचानक त्या ठिकाणी आले आणि रामराजेंना हात जोडून नमस्कार केला.

रामराजे यांनीही त्यांना हात जोडून नमस्कार करून बसण्याची विनंती केली. दोघेही समोरासमोर बसल्यानंतर मात्र प्रशासन यंत्रणेसोबत पोलीस खात्याचीही भांबेरी उडाली. नुसती भांबेरी उडाली नाही तर राजकीय वर्तुळातही मोठी चर्चा सुरू झाली. कार्यकर्ते सैरभेर झाले. जे दोन राजे एकमेकांकडे कट्टर विरोधक म्हणून गेल्या काही महिन्यांपासून पाहत होते ते दोन राजे समोरासमोर बसून गप्पा मारताना दिसले. चर्चा नेमकी काय झाली हे जरी समजू शकले नसले, तरी या दोघांची झालेली ही भेट म्हणजे यांच्यातील वाद संपुष्टात आला असे म्हणायला हरकत नाही.

दोघांच्या दिलखुलास गप्पानंतर कोरोना विषयावरही चर्चा झाल्याचे बोलले जात आहे. जाताना रामराजे यांनी त्यांना कोरोनाच्या अनुषंगाने काळजी घेण्याचा सल्ला दिला. उदयनराजे भोसले यांची झालेली ही बैठक योगायोग होता की अजून काही हे मात्र समजू शकले नाही. तरी एकमेकांचे राजकीय आस्तित्व संपवू पाहणारे हे दोन दिग्गज राजे मात्र  एकमेकांच्या समोर बसून गप्पा मारताना पाहिल्यावर सातारकरांना मोठा दिलासा मिळाला.